[RantauNet] Pasambahan II

[Damrus Lukman]

Manolah Sutan Bandaro, sipangka alek dibaleroang nangko. Sungguhpun Sutan surang nan basabuik namo baimbaukan gala. Nan tinggi tampak jauah, dakek joloang basuo. Wujuik sambah nan talewakkan, salam taseba ka nan banyak. Ninik mamak rang sipangka, nan gadang basa batuah. Nan bapucuak sabana bulek, nan baurek sabana tunggang. Taruih kapado candiak pandai, langkok jo nan mudo arif budiman. Cukuik jo mandeh bundo kanduang, dalam panggilan ambo sadonyo. Salam di Sutan batimpokan.   Limbak nan dari pado itu, dalam hari sahari nangko. Puntiang talatak di hulu, di bawah kiliran taji. Asa rundiang kato dahulu, tigo limbago nan tajadi. Partamo baso jo basi, kaduo sambah manyambah, katigo makan jo minum Tantangan baso jo basi, dek diundang kami datang. Karano dipanggia kami tibo, lah tibo kami di siko. Dek elok baso rang sipangka, tibo kami di bukakkan pintu. Datangnyo kami dibantangkan lapiak. Langkok jo minum dengan makan. Minum lah tibo di nan sajuak, makan lah tibo dinan kanyang.   Sutan Bandaro, Batanyo kan iyo sasudah minum, barundiang sasudah makan. Dek minum alah tibo di nan sajuak, makan lah tibo dinan kanyang. Lai koh dalam barih jo balabeh, kok diangsua mambukak rundingan. Ado kolah barek nan ka samo dipikua, ringan nan ka samo dijinjiang. Kok lai di barih ambo mamahek,  di rasuak manjariau. Bapituahlah Sutan panjang-panjang, Basipaik mananti kami tantang itu. Sakitu sambah bakeh Sutan. Pulang maklum dek rang sipangka.   Pakieh Sutan, Bekasi (Muaropaneh, Solok)