1/2 Paralunyo masalah iko kito bincangkan�! Assalamu'alaikum wr.wb. Walaupun urang-urang Islam pado umumnyo mamuliakan Nabi Isa, namun mareka labiah mamuliakan Nabi Muhammad SAW sabagai Nabi Tarakhir pambawo agamo yang juo adolah agamo tarakhir yaitu Islam. Indak ado sabananyo diantaro awakko sacaro batarang-tarang atau ekplisit mampicayoi Nabi Isa tu adolah Tuhan nan identik jo Allah sandiri sabagaimano nan diyakini dek urang-urang Kristen tu, namun dek banyak pulo diantaro urang-urang Islam tu mayakini Nabi Isa tu masih iduik juo sampai kini diateh langik , indak bisa tidak sacaro tasirek kayakinan awak tu tantu sajo mangarah-ngarahkan awak untuak mamuliakan Nabi Isa malabiahi kamuliaan nan kito barikan ka Nabi Muhammad SAW. Suatu kanyataan pulo, bahaso dari kalangan Mainstream Islam nan mayoritas ko , baitu juo Ulama-Ulama nan dijadikan �suluah bendang� dalam nagari tu indak malu-malu pulo mangecekkan bahaso dek Kuaso Tuhan Allah mako Nabi Isa tu sacaro jasmani diangkekNyo kaateh langik, ka haribbaanNyo , katiko urang-urang Yahudi sadang bausaho untuk manyalibnyo dan nan nanti bilo kiamaik lah datang baliau akan turun kabumi mamacah salib jo mambunuah babi , dan mang Islamkan sadonyo urang-urang Kristen� Dek kini alah hampia duo ribu taun pulo sasudah paristiwa panyaliban tu , dan Nabi Isa tu alun juo turun kabumi , mako Ulama-Ulama awak tu lalu maambiak kasimpulan bahaso Nabi Isa tu iyo masih iduik juo sampai kini , yaitu sajak duo ribu taun nan lampau baliau lahia kabumi dari mandehnyo banamo parawan suci Siti Maryam tu� Nah, kayakinan nan bantuak ikolah , nan dijadikan pulo dek Pandeta-pandeta Kristen samisal mandiang Hamram Ambrie, Yusuf Roni, Rifai Burhanudin, Akmal Sani, Rusli Nurpea ( kasadonyo adolah mantan muballigh Islam nan bapindah ka agamo Kristen dan namo tigo tarakhirko adolah urang-urang Minang asli ) sabagai bumerang nan ditembakkan mareka baliak kapado awak. Mareka salalu sajo mampabandiang-bandiangkan antaro Nabi Muhammad SAW dan Nabi Isa. Dan dek bakatepatan pulo jo kayakinan sabagian gadang urang-urang Islam tantang diangkeknyo Isa kaateh langik dan masih iduiknyo baliau sampai kini samantaro Nabi awak Muhammad SAW alah wafat dalam usia 63 taun ) dijadikan pulo dek mareka sabagai bukti bahaso Nabi Isa tu labiah mulia kadudukannyo disisi Allah dibandiangkan jo Nabi Muhammad SAW. Manuruik mareka kamuliaan Nabi Isa tu alah sasuai dan sajalan pulo jo apo nan diyakini dek urang-urang Islam nan banyak tu� Dan kalau saandainyo memang iyo Nabi Isa tu masih iduik juo sampai kini, tantu sajo awak indak bisa mambantah apo nan disampaikan dek urang Kristen tu bahaso baliau memang labiah mulia dan tinggi kadudukannnyo dibandiangkan jo Nabi Muhammad SAW nan samo-samo awak yakini memang indak iduik lai�Itu kalau saandainyo memang Nabi Isa tu iyo masih iduik juo sampai kini. Dan indak ado urang nan bisa mambantah bahaso urang nan batahan iduik amo( apolagi sampai duo ribu taun�indak makan, indak minum , indak pulo dibumi bahkan diateh langik disisi Tuhan Allah) tantu sajo labiah tinggi kadukannyo dibandiangkan jo urang nan umuanyo tabateh ( hanyo 63 taun) dan alah wafat pulo di bumi� Naudzubillah mindzalika� Adolah suatu keanehan pulo , nan indak tamakan dek aka , baa dek masih bisa juo awak-awak urang Islam ko mampicayoi Nabi Muhammad SAW sabagai �khairul mursalin�, nabi yang paliang mulia diantaro nabi-nabi nan diutus dek Tuhan, padohal baliau alah wafat mandahului Nabi Isa nan datang labiah dahulu daripado baliau SAW� Dan indak ado diantaro awak-awakko nan mangecekkan bahaso Nabi Muhammad SAW nan diutus untuak sagalo bangso didunia ko masih iduik juo sampai kini , namun untuak Nabi Isa , nan misinyo tabateh untuak urang-urang Yahudi malah kito yakini masih iduik juo sampai kini. Bukankah iko adolah suatu kontradiksi dalam keimanan nan tantu sajo marupokan suatu ganjalan dek awak untuak manyampaikan tabligh tantang katinggian Islam kapado urang-urang Kristen tu? Apokah awak lai sanggup manyampaikan kabenaran Islam kapado mareka samantaro Nabi Muhammad SAW pandiri agamo Islam tu sandiri alah wafat disatu pihak, dan Nabi Isa pandiri agamo Kristen tu malah awak yakini pulo masih iduik juo dipihak lain? Ciek lai, kayakinan urang-urang Islam tantang iduiknyo Nabi Isa diateh langik, baitu juo adonyo mukjizat dan kuaso Nabi Isa maiduikkan urang mati kabanyakan urang Islam memang indak mampicayoi bahaso Nabi Muhammad SAW punyo kuaso pulo maiduikkan urang mati�.) dengan sandiri mampakuek hujjah urang-urang Kristen tu bahaso Isa tu iyo identik jo Allah. Baa dek kaindak, indak ado do manusia normal nan bisa batahan atau dihiduikan dek Tuhan sajak duo ribuan taun nan lampau, indak makan indak minum. Dan nampaknyo disikolah latak kunci pamecahan masalahnyo dan itulah sababnyo masalah iko sangaik paralu kito bincangkan . Sababnyo indak lain adolah karano dalam kamatian Nabi Isa ko lah lataknyo kahidupanIslam. Disikolah rahasio dan makna nan tasambunyi, bahaso �kahidupan Islam� tu justeru tagantuang kapado matinyo nabi Isa tu�Dan sangaik sulik untuak dibantah bahaso Islam tu indak kajago dari laloknyo dan indak kabangkik dari kamatiannyo kalau saandainyo Nabi Isa , nan dipaTuhan dek urang Kristen tu masih iduik juo diateh langik sampai kini. Sasungguahnyo iman nan sarupo iko , walaupun kabanyakan awak manganuiknyo indak bisa tidak akan manopang kayakinan Kristen. Apolai asumsi Nabi Isa iduik diateh langik tu samo sakali indak badasar , indak ado landasan dan pijakannyo dari Al-Qur�an dan Hadits Baa nyo awak managakkan kapalo dimuko urang-urang Kristen, jo parasaan randah diri, kahinaan dan tantu sajo awak tapaso manunduakkan wajah dek malu. Tantu sajo awak-awak indak katalok do mamandang muko urang-urang Kristen tu , katiko mareka manyampaikan ajaran mareka kapado awak, sasuai jo misi mareka untuak mangajak awak masuak Kristen. bersambung Wassalamu'alaikum wr.wb. Indra Intansati RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
