assalamu'alaikum wr wb; satu- minta ma'o, kalua masuak surau 'ko ndak pernah mambaco salam
duo- minta ma'o kalau ado nan tasingguang; bakecek kasa, sombong, tinggi hati, ongeh, dll. tigo- ambo urpas, bisa urang pasa, ado nan mangutuak urang pasiek; padialah, mungkin kadang-kadang iyo agak pasiek, indak bisa berang disabuik urang pasiek do; alah acok disabuik coitu diberbagai forum; ado pulo mangecek tadi ambo ko dajjal; bialah, mudah-mudahan pengorbanan ambo manjadi "dajjal" "pasiek", "gilo" iko ada kontribusinyo ka awak kasadonyo; kok indak bia pulo lah! ampek- ambo indak pernah banieik malawan hukum allah, indak ka malawan; kalau ambo menentang penerapan syariat islam; mayoritas dari dunsanak di siko coitu pulo nampak dek ambo; bataun-taun bapadiakan seh hukum nan balaku 'ko hukum republik indonesia; bataun-taun bapadia kan sajo dunsanak, karabaik, konco-konco nan khilaf salah, indak baterapkan syariat islam do; kawan-kawan nan mancilok, maliang, korupsi di kantua, indak bakarek tangannyo; zinah baserak-serak, urang 'tatngkok' bapadiakan sajo, paliang bakawinkan paso; indak ado nan taniek marajam; artinya dunsanak 'koo MENENTANG rajam; pas ambo basuaro menentang rajam, basorak kasadonyo sarupo nan ta'aik bana kasadoalahnyo; samantaro itu misalnyo, bataun-taun bariba-riba jo bank; alasan karano indak ado alternatif; alah ado bank syariah dari bataun-taun nan lalu, indak sabara incek nan manutuik rekeningnyo do, pindah ka bank syariah; otah seh nan kareh; bara persen di siko ko nan indak bahubuangan jo bank nan riba tu? limo - baa kok idank biadab rajam tu? talapeh iko parintah tuhan atu indak, sampai kini masih diperdebatkan, buktinya MUI, muhammadiyah, nu, dll; seh indak ado manyuruah urang dirajam di siko do; biadab, iyolah kalau matinyo batembak atau bagantuang; tapi bahampok jo batu badarah-darah, sambia tararau-rarau, taruih sampai sayuik suaro padusi tu, sampai pudua angoknyo; baa curitonyo kok indak biadab? baa caritonyo? anam- urang awak ko munafik, tamasuak ambo tantu; adaik basandi syarak, syarak basandi kitabullah; kecek seh nan banyak nyo, pantun, patuah baserak-serak;caliaklah kampuang kito; zinah batebaran di padang, bukiiktinggi, dll.; vcd porno baserak-serak sampai ka palosok-palosok; jaan pulo munafik beristighfar; indak picayo ambo kalau sanak-sanak di surau ko ado nan alun pernah manonton film porno tu; kok iyo saketek bana, tarutamo nan induak-induak mungkin; jadi ndak usah pulo banyak gaya banyak karengkang mangaluah urang kampuang kito banyak nan manonton vcd porno; samo seh kito 'ko nyo; apo pulo pangkaik kito marutuak, mauruik dado vcd porno masuak kampuang, kalau kito juo balaku sarupo? saroman bana jo kawan ambo aktivis islam nan basorak-basorak film-film indonesia banyak baadegan porno, banyak beredar di daerah-daerah; tapi kito di kota ko karajo manonton film porno barat nan labiah parah dari itu; karek talingo ambo, kok ado nan di surau ko, tarutamo nan mudo, nan indak pernah mancaliak situs-situs porno di internet, bakirin-kirim gambar porno jo email; kito 'ko munafik; tapi kalau adao nan salah saketek, nyariang suaro tu kalua kasadonyo; jajok ambo, serius; bagalak-galak indak baparasaan mancaliak vcd urang nan dicilok dan dipamalukan kesalahannyo bazinah; sato basanang-sanang, sato mancacek-cacek, mahukum sakalamak hati jo hinaan dll. indak ado raso ibo jo tenggang; kok iyo banci bana jo kalakuan urang tu musnahkan, jaan ditonton; iko bacari-cari; banyaaaak kalakuannyo nyo nan sarupo nantun; jajok ambo; 'jajap' kecek urang jawa; tujuah- salamo kito masih munafik, picayolah banyak urusan nan indak ka salasai; salapan- ambo banyak kenal nan di surau ko, bahkan babarapo sabananyo kawan ambo; tamasuak nan basorak-sorak di rantaunet; tau ambo baa kawan-kawan saumua tu kalakuan sahari-harinyo; cuman ambo iyo manayamarkan namo, sahari-hari ambo samo seh nyo kalakuan; jo namo aseli, indak pulo talok dek ambo mangaluakan nan taraso di dado ko do sambilan - nan masih tasingguan, berang, jo tulisan ambo nan ciek ko berang lah; kok ka berang-berang lah, coi itu kecek lagu lamo; sapuluah - nan simpati jo tulisan ambo 'ko jaan talampau basimpati bana, nanti-nanti manyasa dunsanak; sabaleh - ambo iko urang biaso-biaso sajo, indak elok-elok bana, indak pulo kurang aja bana; tapi antahlah, ambo acok indak tahan mancaliak kekejaman, kesewenang-wenangan, sarato ketidakadilan; ciek lai ambo iko kadang-kadang kareh angok; kadang-kadang elok ati, santun; duo baleh- rajam tu yo biadab. alah, pas salusin,; pulang ambo lai, langik di jakarta alah mulai mangalam, sabanta 'ko azan mugarik mangalun di radio; segerakan sumbayang, kecek rasul, jaan mambaco email jo dunsanak lai, matian lah komputer; tagak, bajalan lah ka sumua, basuah muko jo sagalo badan nan patuik, bawudhua, sumbayang sudah tu; kok ambo baeko seh lah sumbayang di rumah, rumah dakek; mudah-mudahan indak lupo dan idnak maleh; kadang iyo lupo, kadang iyo maleh, kadang lupo dek maleh, kadang balupo-lupoan. wassalamu'alaikum wr wb; =urpas= RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
