Uda Dutamardin Umar dan sanak RN kasadonyo, Assallamualaikum Wr. Wb.,
Tarimokasih ambo sampaikan untuak e-mail da Umar. Sabananyo indak banyak nan dapek ambo caritokan soal ri rayo di kampuang untuak taun ko. Sacaro rasmi ambo jo kaluarga memang mandarek di Padang tanggal 11 Desember (limo ari sabalun rayo). Tapi tibo-tibo ambo dapek undangan untuk menghadiri duo acara di Jakarta. Sacaro tapaso, tanggal 12 ambo tabang baliak ka Jakarta. Induak bareh jo anak-anak barangkek tanpa ambo ka Payakumbuah. Ambo baru tibo di Payakumbuah pado tanggal 14 malam. Jadi sacaro panuah ambo anyo tigo hari di kampuang, sebab tanggal 18 pagi ambo jo kalaurga lah barangkek ka Tabiang untuak ba ari rayo di Jakarta. Walau pun baitu, sakadar buah tangan, barikuik ambo sampaikan tigo catatan singkek ambo dari pangalaman ba ari rayo di kampuang untuak taun ko. Patamo, sarupo lah manjadi tradisi di kampuang awak, ba ari rayo di kampuang memang balainan jo di tampek lain (di Jawa atau di mancanegara). Makasuik ambo, tradisi untuak saling mangunjungi masih tatap tapaliaro. Ambo sendiri, salasai shalat ied, sacaro barombongan singgah ka tigo rumah. Dan alah manjadi tradisi pulo, di satiok rumah wajib hukumnyo untuak makan. Akibatnyo, sasampai di rumah, paruik iyo lah bana-bana kanyang. Manuruik carito nan ambo danga, ri rayo taun ko di Koto Tangah Simalanggang labiah rami daripado taun nan lalu. Patando lai banyak rang rantau nan pulang kampuang untuak ba ari rayo. Salapeh pai ka rumah dusanak, salanjuiknyo tantu tibo giliran ambo untuak duduak manunggu tamu di rumah. Di siko sakalai lai taraso bana bedanyo ba ari rayo di kampuang jo di tampek lain. Tamu nan datang lai indak putuih-putuih. Nan jadi masalah, mungkin dek banyak nan tau soal keterlibatan ambo dalam masalah spin-off simin Padang, di ari rayo ko ambo indak bisa mailak bacarito soal spin-off ko. Sabanyak nan mandukuang, sabanyak itu pulo nan ragu-ragu dan mambantah. Ambo sanang, minat urang awak untuak ba bincang-bincang soal kehidupan bermasyarakat tanyato lai tapaliaro pulo. Kaduo, soal isi perbincangan. Ambo sempat badebat jo adiak ambo nan datang dari Bogor soal keterlibatan perusahaan asing dalam manyuburkan korupsi di Indonesia. Kecek ambo, perusahaan-perusahaan asing salamo ko turuik manyuburkan korupsi di Indonesia. Kecek adiak ambo, hal itu mereka lakukan dek 'tapaso.' Salain tu, bagi perusahaan-perusahaan asing tu, soal sogok manyogok ko indak labiah daripado soal tuntutan bisnis. Artinyo, dek tuntutan bisnis lah hal itu mereka lakukan. Kesan ambo, sacaro diam-diam, sabagai sabuah kategori kegiatan, bisnis tampaknyo lah bakambang manjadi sabuah kategori kegiatan yang berdiri-sendiri. Dalam ba bisnis tampaknyo indak ado soal doso jo pahalo, soal halal jo haram, dan soal manfaat atau soal mudharat. "Biznis is biznis," bottom line nyo adolah soal untuang atau rugi. Baa pandapek da Umar? Katigo, ambo sempat pulo babincang-bincang jo mamak ambo nan datang dari Pakanbaru soal zakat. Kecek mamak ambo, ado kebutuhan mendesak untuak menggeser pemanfaatan hasil pemungutan zakat terhadap kegiatan-kegiatan nan produktif. Kecek ambo, umat Islam saharusnyo batindak sacaro saimbang antaro memungik zakat (ba amar ma'ruf) jo mamarangi korupsi (ba nahi mungkar). Tapi kiniko tampaknya sabagian urang (khususnyo nan bapunyo), labiah suko ba amar ma'ruf sajo tapi sagan ba nahi mungkar. Sabagian lain mungkin malah barusaho untuak tampak rajin ba amar ma'ruf jo sumber pembiayaan nan ba asa dari kegiatan super mungkar tu. Kalau diliek patunjuak agamo, dalam beramar ma'ruf nahi mungkar, kito dapek mamiliah tigo tingkek kegiatan: melalui wacana, melalaui praksis, dan melalui do'a. Hemat ambo, salain banyak warga masyarakat nan suko ba amar ma'ruf jo sumber pembiayaan kegiatan super mungkar, ado pulo sabagian lain nan hanyo suko bawacana dalam ba nahi mungkar. Tapi kalau diajak bana ba praksis, atau disarankan untuk bado'a sambia bawacana, rato-rato inyo langsuang mambaliak badan. Urang nan ba amar ma'ruf jo sumber pembiayaan mungkar jo urang dan anyo suko bawacana dalam ba nahi mungkar, adolah duo titik ekstrim nan indak talalu banyak bedanyo. Nan kito paralukan kiniko adolah urang-urang nan amuah ba amar ma'ruf jo ba nahi mungkar sacaro bakasaimbangan nan indak sagan-sagan pulo untuak mamasuki wilayah praksis pado kadua bidang tu. Baa pulo pandapek da Umar? Tarakhir, walau ambo anyo tigo ari di kampuang, ambo lai sempat maajak induak bareh jo anak-anak pai balanjo ka pasa pabukaan di Padang jo Payakumbuah. Salain tu, di ari rayo, ambo lai sempat menginyam sate danguang-danguang, lamang jo durian (nan memang sadang musim), plus soto Padang di Kiambang. Itu sajo carito ambo da Umar. Ambo takuik uda tabayang-bayang jo lamang jo durian Kayu Tanam tu. Sabana padek da ..... (he, he, he...). Wassallamualaikum Wr. Wb. Revrisond Baswir PS. Salam untuk adiak ambo Yuno Baswir di Washington. ----- Original Message ----- From: <[EMAIL PROTECTED]> To: <[EMAIL PROTECTED]> Sent: Tuesday, December 25, 2001 1:13 AM Subject: [RantauNet] Carito Kampuang > Assalaamu'alaikum WW., > > Sanak Sony Baswir dan sanak lainnyo nan mudiak dirayoko, > tolonglah babagi carito kampuang awak. Ambo sanang bana > mandanga berita kampuang halaman, terutamo nan bukan > dari koran. > > Ambo tunggu > > Dutamardin Umar > Washington, DC > > RantauNet http://www.rantaunet.com > > Isikan data keanggotaan anda di http://www.rantaunet.com/register.php3 > =============================================== > Mendaftar atau berhenti menerima RantauNet Mailing List di > http://www.rantaunet.com/subscribe.php3 > > ATAU Kirimkan email > Ke/To: [EMAIL PROTECTED] > Isi email/Messages, ketik pada baris/kolom pertama: > -mendaftar--> subscribe rantau-net [email_anda] > -berhenti----> unsubscribe rantau-net [email_anda] > Keterangan: [email_anda] = isikan alamat email anda tanpa tanda kurung > =============================================== > RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
