Assalamu'alaikum wr.wb., Sabagian ketek urang awak, tarutamuno nan masih mudo-mudo, nan biaso gadang di 'petak' atau di parantian oto, nan biaso bagaua 'kapareman-paremanan', sangaik bana minim dalam hal ba baso - basi, bahkan 'cenderung' kagadang-gadangan, masa bodoh, indak padulian, sampai bateh tatantu bahkan 'cenderung' agak kurang aja kalau dicaliak jo kacomato nan umum. Urang-urang mudo sarupo iko, adolah nan bakarajo di lingkungan parantian oto baiak di Bukik Tinggi, Padang, Payokumbuah atau dimaa sajo di nagari awak. Ado nan muloi jadi tukang mandian oto, kenek oto, baraja saketek-saketek jadi supir oto baiak oto kaciak sabangso angkot, ado juo nan sampai jadi supir oto bus nan gadang-gadang. Sabagian ado nan jadi tukang angkek, jadi agen oto (istilahno) atau tukang mancarian panumpang, baitu pulo ado nan jadi urang panggaleh, bajojo diparantian oto tu. Kahidupan saari-ari di lingkunganko biasono 'kareh', jo kato-kato kasa, jo caruik, ringkasno jo caro kagadang-gadangan tadi tulah. Kalau awak lalu di parantian oto, basilunak-silunak, gadang kamungkinan awak kadipalakukan pareman petaktu jo caro mareka nan kasa tu. Ataupun kalau awak turun diparantian ototu mambao baban saketek, mungkin awak kabaurusan jo pareman-pareman nan kasa-kasatu nan mamintak upah sakandak hatino surang. Paralu bana awak bahati-hati, batanyo jo kasabaran talabiah dulu sabalun mampabiakan barang awak diangkekno, sabab kalau indak sangaik mungkin awak ka'dipangua' no.
Kalau awak masuak kaparantian oto, biasono awak langsuang disongsongan urang-urang nan manyasak batanyo, 'ka kama pak? ka Padang?'. Kok di jawek iyo, awak langsuang pulo dipasarigiakanno, diirik kian - diirik kamari, kadiabaono kaotono masiang-masiang. Kalau awak pakak sajo, kalua caruikno. Contoh nan lain, sakali wakatu di ateh oto 'angkot' di Kiktinggi, kaset musik dangdut babunyi sabana mamakakan talingo, ado amai-amai manyuruah mangetekan suaro kaset tu. Apo kecek anak mudo supir angkot tu, kalau indak katuju jo musik karehtu manga manumpang jo oto den. Kecek amai tu pulo, aden kan mambayia ko. Baa pulo kecekno baliak, ko den baliak pitih amai baliak ah, turun sin lah di siko. Urang-urang sarupo iko, sakali lai iyo bana indak paduli, indak tau diistilah babaso basi, apo lai diistilah 'urang nan manumpang dan mambayia tu paralu dilayani elok-elok'. Bagi urang sarupo iko, ado urang nan karugi, ado urang nan ka-jaran manumpang jo otono, ado urang nan kamanjadiaan usao angkutan itu jadi buruak namono, mareka indak maraso rugi bagai doh. Ambo raso contoh di tunjuakan dek patugeh oto ANS nan jadi topikko tamasuaklah kadalam contoh kabobrokan sistim palayanan dari kelompok urang sarupo iko. Iko memang suatu kandala nan paralu juo awak pikiakan caro mampaelokino, mungkin barupo saran kapado pemilik oto. Caro urang awak manggaleh atau malayani jo sopan santun sabananopun cukuik banyak. Takana-kana juo di ambo baso basi urang manggaleh nasi Kapau di Bukiktinggi, walaupun jo baso nan sabana sakadar baso. "Singgahlah makan minantu! Joa ka makan minantu? Kababayia pulo goh? Bao sinlah pitih minantu." Wassalamu'alaikum wr.wb., Lembang Alam __________________________________________________ Do You Yahoo!? Send your FREE holiday greetings online! http://greetings.yahoo.com RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
