Assalamualaikum w.w.

ambo salinkan dari buku kato pusako Bab I, 
mudah-mudahan paguno

wass.

adyan
        I. ALAM MINANGKABAU

Elok ranahnyo Minangkabau
Rupo karambie tinggi-tinggi
Cando rumpuiknyo gantie-gantielan
Rupo pinangnyo linggayuran
Bukik baririk kiri kanan
Gunuang Marapi jo Singgalang
Tandikek jo gunuang Sago
Pasaman jo gunuang Talang
Aienyo janiah ikannyo jinak.

        Laweh alamnyo bakeh tagak
        Sawah batumpak di nan data
        Ladang babidang di nan lereang
        Sawah bajanjang banda buatan
        Sawah ladang labuah nan pasa
        Taranak kambang pad manjadi
        Buah jaguang maampai suto
        Padi masak jaguang maupiah
        Lah masak padi di sawah
        Padi ladang manguniang pulo
        Ladang tabu manyintak rueh
        Pisang badukuang di tandannyo
        Antimun mangarang bungo
        Batang labu marantang tali
        Buah taruang ayun-ayunan
        Buah lado mambintang timue
        Buah kacang taji-tajian
        Anak rancak minantu malin.

Sajak durian ditakuak rajo
Sialang balantak basi
Buayo nan putiah daguak
Sirangkak nan badangkakng
Sampai taratak Aie Hitam
Sampai riak nan badabue
Sampai ka bateh Indopuro
Sampai ka Siak Indogiri
Hinggo Sipisak Pisau Hanyuik
Sampai Sikilang Aie Bangih

        Di mano asa titiak palito
        Di baliak telong nan batali
        Dimano asa niniak kito
        Dari lereang Gunuang Marapi
        Di lagundi nan baselo
        Dakek bukik Siguntang-guntang
        Di sinan lurah satungka banang
        Sinanlah lurah tak baraie
        Di sinan bukik tak barangin
        Sinanlah banto tak barayun
        Di sinan batuh amparan putiah.

Panakiak pisau sirauik
Ambiak galah batang lintabuang
Salodang ambiak ka nyiru
Nan satitiak jadikan lauik
Nan sakapa jadikan gunuang
Alam takambang jadi guru.

        Bungka ganok manahan cubo
        Ameh batue manahan uji
        Naraco pantang bapaliang
        Anak nagari sakato hati
        Satapak bapantang suruik
        Salangkah pantang kumbali.


                ----------


Kirim email ke