Assalamu'alaikum wr.wb., Carito mak Marah jo si Udin Japang pakaro palanta.
Wassalamu'alaikum wr.wb., Lembang Alam �Palanta�.., baa mangko banamo palanta mak? Apo bana arati palanta ko? Palanta lapau pulo, apo mukasuik sabanano dari lapau jo palanta tu?� tanyo si Udin Japang ka mak Marah. Si Udin Japangko laia di Batawi, gadang di Japang, tapi anak urang Bukiktinggi. Baru kapandai babahaso awak, tapi lai sabana rajin batanyo. �Mangko curitono. Di nagari awak di Minangkabau tampek urang duduak-duduak sambia basantai-santai biasono di lapau. Namun lapau ko bamacam-macam pulo. Ado lapau sajo, ado lapau kopi ado lapau nasi. Nan disabuik lapau sajo adolah toko ketek tampek urang manggaleh barang ketek-ketek pulo, biasono barang nan paralu di dapua, barang nan paralu di rumah, ataupun barang nan paralu dek anak-anak. Tampek urang mambali jarun pinjaik, paniti, gulo agak satangah kilo, atau rokok, atau minyak agak saboto, atau gulo-gulo dek anak-anak ketek. Lapau sarupo iko bukan tampek urang banyak duduak-duduak, urang biasono datang mambali sasudah itu langsuang pai. Sudah itu ado lapau nasi, aratino lapau tampek makan. Bisa sarupo restoran ketek atau bisa juo tampek basuduang-suduang di kaki limo. Datang ka lapau nasiko biasono urang iyo sabana untuak makan sajo. Nan katigo lapau kopi. Di sikolah biasono urang bisa duduak-duduak sambia maota, sasudah mamasan kopi, katan jo pisang goreang. Duduak bisa agak balamo-lamo, katiko aia kopi atau teh di galeh abih, buliah mintak ditambah baliak jo aia angek sampai kopi cako indak itam lai corakno. Tampek duduak ko biasono bangku panjang mangalilingi meja panjang pulo. Tapi di lapau tu biasono ado pulo tampek duduak nan agak laweh satinggi bangku panjang tu, indak ado bameja, biasono pulo agak dakek ka tungku lapau, jadi agak angek saketek duduak disinan. Buliah kok ka maunjua-an kaki bagai. Iko nan disabuik palanta. Duduak di palanta sambia basangai-sangai maadoki katan jo pisang goreang, sambia maota kailia kamudiak, indak taraso ari abih.� �Oo baitu rupono mak� jawek si Udin mangarati . �Tapi kini alah ado pulo palanta lapau nan lain tadanga. Tampek urang maota juo tapi di alam maya. Kok ka minum kopi juo buek surang-surang. Maota jarak jauah. Nan surang di Japang, nan surang lai di Amrik, nan lain pulo di Parancih. Buliah kok maota-ota panjang.� �Iyo lai pulo tadanga di ambo tu mak. Tapi kabano pulo agak heboh kudian ko. Sabab ado juo urang nan masuak ka lapau maya tu nan indak baniaik baiak. Sakadar mancari cabuah sajo.� �Apo pulo ka bedono jo lapau kopi cako. Indak juo kasadoan urang baniaik elok masuak ka lapau tu doh. Ado nan manompang duduak, ado nan ka baampok, ado nan ka manompang manonton tivi atau mandanga-an radio. Kasudahanno kan tapulang ka urang lapau juo. Kok di taruahno batu damini, datang urang ka main damini, muloi dari bataruah rokok, bataruah te talua atau kok ka bataruah nan lain bagai. Di palanta tu bisa pulo urang kok ka �baburu babi� bagai, kalau urang lapau manyadioan �karateh kuniang�. Jadi nan tiangno bana tapulang ka urang lapau.� �Tapi kok pambangih amek urang nan punyo lapau tantu indak amuah pulo urang masuak mak, baa tu?� �Pambangih tantu indak buliah. Tapi sagalo buliah indak pulo elok. Paralu juo ado aturan, paliang indak supayo jaan sampai awak malendo urang ka suok - ka kida.� �Iyo tu mak. Banyak ambo baraja ka mamak hari ko. Alah pandai namono ambo babahaso Bukiktinggi ko mak?� �Alah sabana santiang� jawek mak Marah. __________________________________________________ Do You Yahoo!? Yahoo! Movies - coverage of the 74th Academy Awards� http://movies.yahoo.com/ RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
