Assalamu'alaikum wr.wb.,
Maa Bandaro,
Akan tatapi satantangan sambah manyambah, sambah jo
sujuik pado Allah, salam salawaik bakeh nabi, maoh
dimintak kapado baliau angku nan tuo, pangulu nan
gadang basa batuah, sarato imam nan jo manti, langkok
jo ipa dangan bisan, nan samo adang adok di ateh
palanta nangko.
Barabah lalu balam mandi
Mandi bakusuak bungo rayo
Sambah lalu salam kumbali
Salam tapulang ka Bandaro
Sapanjang buah panitahan Bandaro nan katangah, nan bak
mamang di nan tuo, kajadi sabutan di nan mudo;
Tumangguang malapeh badia,
badia dilapeh tangan patah
tak dapek manembak lai.
Basuo untuang jo takadia,
sarato garak dari Allah
indak dapek mahinda lai.
Nan dek karano lah balaku takadia Allah, alah tibo
jangko wakatu, alah panuah cupak jo sukatan , Allah
Ta'ala nan bakandak, singkek langkah dari dunsanak
sudaro kito, :
Yofi Andri MKom.
nan mandaulu di ari Kamih tanggal 9.5.02, nan alah
dianta karumpuik nan layua, katanah nan lambang,
katampaik nan sanyok sarato sunyi, alah dikubua di
pandam pakuburan suku sako mandiangko, di
kampuang baliau di Talago - Balai Gurah - Ampek Angkek
- Agam.
Limbak nan dari pado itu, ado lai nan takana diati
tahelang dimato dipihak ahli warih :
Gajah tadorong dek gadiangno,
harimau tadorong dek balangno,
manusia khilaf dek muluikno.
Kok adolah hutang kato nan bajawab, hutang kain
nan bacabiak, hutang pitih nan babilang, hutang ameh
nan batahia, sado nan mungkin kamambarekkan jalan ka
akhirat dek mandingko, iyolah nak minta dibari maoh jo
redha, disanak sudaro di balerong Rantaunet nangko
ataupun dimano sajo, kan baitu bana bunyi panitahan
Bandaro nan katangah.
Sapanjang buah panitahan Bandaro nan katangah, iyo
alah di adaik nan bapakai, alah dicupak nan barisi
alah di barih makan baek. Namun samantangpun baitu,
dek ambo lai baduo jo batigo pulo, jo baliau angku nan
tuo, lah ambo renjeng kato jo mupakaik, di bao kato jo
baiyo, manjapuik nan kabuah barino. Lah bulek kato di
mupakaik, kok bulek alah sagoloang, kok picak alah
satapiak, a nan kajadi buah bari di baliau, alah
sabana dalam adaik nan baitu, alah dalam limbago nan
batuang. Tantangan dunsanak kito Yofi Andri, salamo
bagaua di palanta nangko, dek manusia basifaik khilaf,
kok ado tadaulu jo tadorong, kok lai nan tasingguang
sambia lalu, kok lai nan talendo indak sangajo, alah
pado tampaikno kok awak maafkan, laia batin dunia
akhiraik. Baitu pulo dari pihak si ahli warih, kok ado
salah jo khilaf, kok ado gawa jo sumbang, dari baliau
angku nan tuo, nan samo duduak di palanta nagko
taradok dunsanak kito Yofi Andri, alah talabiah daulu
pulo dimaafkan. Limbak nan dari pado itu, samo maminta
kito pado Allah, mudah-mudahan almarhum dibari ampunan
Allah, ditarimo amal ibadahno, mandapek tampaik nan
elok di sisi Allah. Sakitu pulo rundingan nan ambo
anta bakeh Bandaro, alah kasanang ati Bandaro.
Wassalamu'alaikum wr.wb.
Lembang Alam
--- Bandaro <[EMAIL PROTECTED]> wrote:
>
> SIPANGKALAN (SP) : A Bandaro, Banuampu
> ANAK NAGARI (AN) : DS St Lembang Alam
>
> Pasambahan Minta Ma'af dan Redha
> SP ;
> Manyambahkan sambah lah ambo kapado panghulu nan
> basa batuah,
> tuanku nan duo tigo parsilaan, sarato sanak sudaro
> nan hadir
> dibalerong nangko tampat hambo mamuhunkan sambah.
> Tidak tarhatap tarbilang gala akan pahatap jo
> pambilang,
> nak sambah lah dimuliakan jo sambah.
> Bukanlah ambo maraso malampau jo maminteh, disilang
> nan bapangka
> karajo nan bapokok ataupun ahli warih dari nan
> hilang
> nangko, lah balapeh jo hati nan suci jo muluik nan
> janiah.
> Lai dari ambo tabikno parsambahan, sambah tibo
> kapado
> St Lembang Alam.
>
> Adopun parsambahan nan dipuhunkan kapado St Lembang
> Alam,
> bak mamang dinan tuo pakaian urang mudo matah.
> Tumangguang manenggak badia,
> badia ditenggak tanganpun patah
> tak dapek manembak lai.
> Basuo untuang jo takadia,
> sarato garak Allah
> tak dapek mahinda lai.
> Karano lah singkek langkah panjang parmintaan dari
> sudaro kito :
> Yofi Andri MKom.
> Lah dianta karumpuik nan layua, katanah nan lambang,
> katampaik
> nan amaek sunyi, aratino bana lah dikubua di
> kampuang baliau
> di Balai Gurah - Ampek Angkek - Agam.
> Aa to nyo lai nan banamo takana diati tahelang
> dimato dipihak ahli
> warih :
> Gajah tadorong dek gadiangno,
> harimau tadorong dek balangno,
> manusia khilaf dek muluikno.
> Kok adolah hutang kato nan bajawab, hutang kain
> nan bacabiak,
> hutang pitih nan babilang, hutang ameh nan
> batahia, sado nan
> mambarekkan jalan ka akhirat di nan berpulangko,
> nak minta
> dima'af diredhakan, disanak sudaro di balerong Rn
> ataupun
> dimano sajo.
>
> Sabaitulah sambah dipuhunkan ka St Lembang Alam
=====
__________________________________________________
Do You Yahoo!?
LAUNCH - Your Yahoo! Music Experience
http://launch.yahoo.com
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Mendaftar atau berhenti menerima RantauNet Mailing List di:
http://www.rantaunet.com/subscribe.php3
ATAU Kirimkan email Ke/To: [EMAIL PROTECTED]
Isi email/Messages, ketik pada baris/kolom pertama:
-mendaftar--> subscribe rantau-net [email_anda]
-berhenti----> unsubscribe rantau-net [email_anda]
Keterangan: [email_anda] = isikan alamat email anda tanpa tanda kurung
===============================================
