|
-----Original Message----- Selamat
Datang di Minang Incorporated 1. Dunsanak kasadonyo, bundo kanduang, anak jo kamanakan nan ambo
hormati. Assalammualaikum Wr. Wb. Alhamdulillah, akhirnyo karajo kareh salamo ampia duo tahun
nantun mulai manampakkan hasil. Bak urang kasawah, baniah nan tiok hari disiram
jo kasiah sayang kini alah mulai badaun, batangnya lai boneh. Insya Allah lai
ka elok patahunan kini nangko. Lai ka taisi rangkiang untuak makan anak jo
kamanakan. Lai ka samparono baniah tahun muko. Kok taruih sarupo iko, lai
kabalabiah padi di kapuak, saparo buliah dijamua, ditumbuak, di antakan ka
pakan Kamih di Batusangka, dijua ka panyakolahan anak jo kamanakan, untuak
ongkos pai mangaji, baka ka baraja silek, manjadi pandeka ka paga kampuang
halaman, untuak panjago dunsanak limpapeh rumah nan gadang, manjago bundo kanduang,
manjago kehormatan nagari, mambaliakkan tuah nan lah lamo hilang, Insya Allah. Alah sapakaik awak jo tujuan nan ka awak capai. Awak bamukasuik
mambangkik batang nan tarandam, manyuluah baliak tuah nan ‘lah lamo
hilang, bausaho mamelok-i badan nan sadang sangsaro, baliak ka posisi dulu
sebagai center of excellence, bak urang nan lai agak babaun sajak dahulunyo,
nan babangso jo baharago diri. Untuak itu awak badiskusi, batangka-batangka
ketek di palanta ko, kadang-kadang bakareh arang – batagang urek mariah
di kadai kopi hotel atau di lapau nasi nan ado di darek. Kini sampai awak ka
kasimpulan : kok iyo nak mambangkik batang nan tarandam paralu strategi dasar,
grand strategies kato orang subarang. Sasuai jo pandangan nantun, strategi dasar awak barupo: (1).
Mamberdayakan ekonomi rakyat, (2). Manjalin karajo samo strategis antar
parantau, urang kampuang jo sumber daya lain, (3). Meningkekkan pendidikan nan
labiah fokus sesuai jo keunggulan komparatif urang awak salamo nangko, (4).
Membadayokan bundo kanduang jo kaum padusi Minang, dan (5). Menggali keunggulan
komparatif Minang, nan jarang basuo di tampek lain. Sabaliaknyo dalam
implemantasi, basamo samo awak mendukuang misi (1). Meningkekkan kapasitas
produksi komoditas unggulan masyarakat, (2). Membangun sistem jalur distribusi
dan pamasaran, (3). Membangun sistem pendanaan, (4). Optimalisasi keunggulan socio
kultural Minang untuk pemberdayaan masyarakat, (5). Peningkatan kualitas Sumber
daya Manusia Minang sasuai jo kemajuan zaman, dan (6). Mengambangkan jaso lain
sesuai keunggulan Minang. Manuskrip langkok rencana kerja strategis 25 tahun
nyo dapek diminta ka Mak Darul Makmur atau kamanakan ambo Ronal Chandra. Kiniko
awak alun punyo webside untuak menyimpan sagalo keterangan nan diparalukan
masyarakat, Insya Allah awak usahokan supayo ado, sabanta lai kalau diizinkan
Allah. Untuak mandukung strategi 1 jo 2, jo untuak melaksanakan misi
1, 2, 3 paralu awak siapkan organisasi untuak pangabek kekuatan urang Minang
nan tapacah-pacah supayo manjadi kuek dalam ma-adoki perkembangan dunia nan
sangaik bapangaruh ke tatanan hidup rakyat maso kini. Kekuatan dunia alah manyatu,
karanonyo indak dapek lai diadok-i jo kekuatan sorang-sorang. Diparalukan
organisasi nan ampuh nan mampu mahimpun berbagai kekuatan nan awak miliki
untuak membangun sinergi nan labiah kuek. Tapi untuak urang awak tantu paralu
organisasi nan sasuai jo kepribadian Minang nan egaliter, nan demokratis. Di
dalam pergaulan awak indak ado nan tinggi dan indak ado nan randah. Awak
tabiaso duduak samo randah, tagak samo tinggi, panghulu ditinggikan sarantiang,
di dahulukan sa langkah sajo. Masyarakat nan manuruik kajian Oleh sebab itu organisasi nan cocok untuak masyarakat nan
sarupo itu iyolah koperasi sasuai jo warisan mamak kito Bung Hatta nan layia sa
abad nan lalu. Karano itu di hari layia mamak nan awak banggakan nantun, pado
tanggal 12 Agustus 2002, diputuihkan untuak mambantuak badan hukum koperasi nan
ka jadi holding usaho
ekonomi, organisasi induak dari usaho mansejahterakan masyarakat
Minang di maso datang. Badasarkan undang-undang nan balaku, koperasi itu indak
buliah mamakai namo suku atau ras sabab harus tabukak untuak umum. Karano itu
disepakati disabuik Koperasi Marapalam Inkorporasi Indahcemerlang, nan di singkekkan
jadi Min. Inc sebagai merek
kegiatan usaho. Pemerintah, melalui keputusan Manteri Negara Urusan Koperasi
dan Usaha Kecil dan Menengah, tanggal 2 September 2002, nomor
225/BH/MENEG.I/IX/2002, maresmikan badirinyo Min.
Inc nantun. Tabantuaklah Minang
Incorporated nan awak idam-idamkan salamo ko. Alhamdulillah. Badan hukum iko bukan badan hukum koperasi model biaso sabab
susunan organisasinyo nan balain jo nan pernah ado di nagari awak. Malalui
perdebatan nan cukuik lamo jo kareh-karehan saketek sarato gagah gagahan
managakkan santiang masiang-masiang, akhirnyo pamarentah mangalah, asalkan awak
bajanji indak ka gagal dan koperasi ko tumbuah jo bakambang. Karano itu bana
nan jadi tujuan awak, bak pucuak di cinto ulam tibo, syarat pamerintah nantun
awak tarimo jo sanang hati. Bak mandapek durian runtuah, indak paralu basusuah
payah manjuluak untuak mamakan buah nan ranum nantun, tingga mangubak sajo lai. Sampai disiko sajolah dulu, bisuak ambo sambuang baliak, supayo
indak talalu panjang. Billahi taufiq wal hidayah, Wassalammualaikum Wr. Wb. M.C. Baridjambek *************** |
