----- Original Message -----
Sent: Sunday, October 27, 2002 3:15
PM
Subject: [RantauNet.Com] Buliah ambo sato
ciek.......
Assalamualaikum ww.
ambo adolah pandatang baru di apalanta RT ko...untuak itu
ambo mangucapkan salam kenal untuak mamak, etek uni, uda, adiak nan ado di
komunitas rantau.net ko. Ambo adolah urang kiktinggi tapeknyo bukikbatabuah,
ampek angkek nan sadang sikola di japang.
ambo baru duo minggu ko ikuik mailing list iko dan ambo
sangaik kagum dek banyaknyo lalu lintas mail di siko. samulo niek ambo ikuik
di palanta ko adolah untuak malapeh taragak maota jo urang awak di sampiang
untuak mandanga-danga kaba kampuang halaman dan jauah di mato.
wakatu ambo mambaco visi dan misi sarato sajarah badirinyo
komunitas rantau.net iko, ambo sangaik baruntuang bana manamukannyo. tapi
satalah tiok ari ambo tarimo mail dari RT ko, rasonyo isinyo jauah dari nan
ambo arokkan sarupo nan ditulih di sejarah, tata tertip dari komunitas ko.
hanyo babarapo sajo dari puluahan mail tasabuik nan sasuai jo visi dan misi
komunitas ko. banyak diantaro anggota palanta ko nan basitagang urek lihia jo
masalah nan rasonyo indak mungkin disalasaikan pado komunitas ko.
sampai-sampai ado nan lah naiak darah karano pandapeknyo balain.
Ambo jadi bapikia surang...apo sarupo iko gambaran dari
urang minang di rantau nan maninggakan kampuangnyo. Ambo yakin
sayakin-yakinnyo bahaso awak nan ado dipalanta ko adolah urang nan
bapendidikan tinggi nan tau "ereng jo gendeng", tau nan elok jo nan buruak,
tau jo nan bamanfaat dan jo mudarat. Apokoh indak labiah rancak awak maota
tantang hal-hal nan bisa bamanfaat untuak komunitas ko dan kalo dapek
bamanfaat juo untuak nagari minang nan awak tinggakan. dari pado awak
basitagang urek lihia politiknyo Amerika atau Inggirih atau juo Australia dan
sabananyo indak bisa awak singguang saketekpun juo. Cuma nan bisa awak pabuek
adolah mampataba iman dalam dado awak surang-surang basarato keluarga awak.
Cubolah kito bapikia realistis sajo...apokoh bisa awak meluruihkan anggapan
mereka tu nan salah tantang agamo awak. Ambo raso nan bisa awak pabuek adolah
manunjuakkan jo sikap dan parbuatan awak baa sabananyo urang islam tu.indak
bisa jo kato-kato sajo.
dulu wakatu di kampuang ambo mandanga dari ustad bahaso nabi
Muhammad pernah bersabda bahaso pado suatu maso nanti akan ado sakitar 72
macam aliran dalam agamo islam, dan diantarao-nyo hanyo ciek nan diredhai oleh
Allah SWT. Indak dapek awak pungkiri dan dapek kito caliak kiniko memang alah
banyak aliran islam nan babeda-beda tapi masih bapadoman ka Al Quran sarupo
darul arkham, islam lahore dan lain sabaginyo nan indak apa pulo dek ambo
kasadonyo. Sampai sampai juo ado nan mangaku manarimo wahyu dari Allah lewat
malaikat Jibril nan di-posting-kan dek salah surang anggota RT ko. Iko adolah
salah satu dari tando-tando hari kiamat alah dakek. Di sampiang itu ambo
mandanga dari Ustad di kampuang dulu bahaso Nabi Muhammad juo panah bersabda
dan dalam Al Quran juo disabuik bahaso pado suatu maso Islam ko akan
tapacah-pacah (banyak aliran) sahinggo tibo pado maso nan sangat mendihkan.
Dan disaat itulah Allah akan kembali mengutus Nabi Isa ka bumi ko
untuak kembali managakkan kapalo urang islam di muko bumi ko, dan iko juo
adolah salah satu dari tanda-tanda kiamat semakin dakek. Cubolah kita tanyo diri awak masiang-masing di aliran nan maa awak
sadang barado kiniko...jaan asal di daram sajo kalo urang bacarito tantang
islam......
kalo buliah ambo mausul...baa kalo ota awak di komunitasko
labiah awak arahkan sasuai jo visi dan misi nan alah di tantukan dek para
pendiri dari komunitasko dulu. salain malapeh taragak bisa juo awak mambahas
hal-hal nan bamanfaat. contohnyo, tantang sabuah artikel
dari penelitian BPS nan manampilkan bahaso para petani di sumbar samakin
miskin. samantaro anggota DPRD-nyo raun-raun sarupo "mangkutak raun sabalik"
ka nagari urang. cubolah kaluakan ide-ide nan "excellent" nan bisa diterapkan
sabagai solusi dari hal tasabuik. Ambo raso itu akan labiah bamanfaat untuak
awak sarato urang kampuang kito di minang. Dan kalo dapek komunitas ko punyo
"power" untuak maagiah masukan ka pemerintah daerah awak di
padang.
sakian dulu ota ambo nan batele-tele ko
AND
Hiroshima
