Assalamualaikum, Ado ucapan tarimokasih dari mamak awak disurau, ambo yakin, walau dikirim ka rantau juo, tapi ndak sampai do, karano penulisan addressnyo salah.
Wassalam, ----- Original Message ----- From: "Muhammad Dafiq Saib" <[EMAIL PROTECTED]> To: <[EMAIL PROTECTED]>; <[EMAIL PROTECTED]>; <[EMAIL PROTECTED]> Sent: Wednesday, January 01, 2003 5:36 PM Subject: [surau] Berita Duka Assalamu'alaikum wr.wb., Tarimo kasih banyak kapado mamak, angku, sanak, sudaro, rangkayo, kamanakan nan alah manyampaikan simpati jo ungkapan dukacita katiko berpulang kerahmatullah ibunda ambo, Hj. Zakiah Tamin di rumah sakik Rumbai Pakanbaru di ari Sabtu tanggal 28 Desember 2002 nan lapeh. Ungkapan ikut berduka cita baiak nan dari palanta RantauNet maupun nan dari Surau, baik nan bakiriman malalui pasan sms, ataupun nan datang ka rumah duka di tampek adiak ambo kaluarga Isman Galvani di Pakan Baru sarupo guru ambo Bpk Zaimir Gazali, dunsanak Elthaf. Tigo kali ambo pulang baliak ka Pakan Baru sajak sapuluah hari puaso, maadoki baliau nan sakik sajak awal puaso kapatangko. Nan tarakhir sajak ari Sabtu tanggal 21 Desember. Kasihatan baliau samakin manurun dari sahari kasahari. Banyak usaho nan alah dicubo dek dotor, dek parawat nan manolong ataupun dari karik kirabaik untuak manolong pangobatan baliau. Banyak tolong dari dari dunsanak, dari adiak ambo Aijub Muchtar sarato kakakno Rachmat Muchtar di Rumbai dan lain-lain. Allah Taala Kayo Sungguah, nan alah maakuak manantukan. Mako pado ari Sabtu 28 Desember 2002, batapekan jo 23 Syawal 1423 H, pukuah 13.45 siang ari sampai janji baliau. Inna lillahi wainna ilaihi raaji'uun - kami datang dari Allah dan kapado Allah kami kembali. 'Takicuah' juo ambo saketek, alah sajak hari Jumahaik pagi baliau ambo unyian sampai sapanjang patang Jumahaik, sampai pagi ari hari Sabtu pukuah sabaleh. Taraso latiah, ambo pai baistirahat sabanta ka rumah adiak ambo di Pakan Baru sabalun luhua, mukasuik kabaliak ka rumah sakik pukuah satangah t igo. Sasudah sumbahyang luhua, mancubo bagolek sabanta, rasono baru ampia ka lalok, badariang talipon, dari rumah sakik, manyuruh capek baliak sabab kaadaan baliau samakin 'buruak'. Tabang hambua ambo, manalepon ka HP adiak nan sadang manunggu di rumah sakik. Indak kunjuang batarimo. Baru tatarimo katiko ambo alah sampai di lampu merah sabalun bakelok ka Rumbai, adiak ambo alah manggaruang di ujuang talepon. Rupono alah kahandak Allah ambo indak malapeh baliau. Ari Akaik kami salanggarokan janazah baliau, sampai salasai tabanam di Sigungguang di Pakan Baru. Kami iringi pajalanan baliau jo doa, samoga Allah mangampuni baliau, marahmati baliau, manyalamatkan baliau, mamaafkan baliau. Ambo mohonkan ridho jo maaf kok nyampang ado diantaro mamak, angku, sanak, sudaro, rangkayo, kamanakan nan panah mangenal baliau samaso iduik baliau, kok nyampang ado kasalahan atau kakaliruan nan mungkin baliau pabuek. Wassalamu'alaikum wr.wb., Muhammad Dafiq Saib St. Lembang Alam RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Tanpa mengembalikan KETERANGAN PENDAFTAR ketika subscribe, anda tidak dapat posting ke Palanta RantauNet ini. Mendaftar atau berhenti menerima RantauNet Mailing List di: http://www.rantaunet.com/subscribe.php3 ===============================================
