Alaikum salam Maxaciak,
Ambo sanang bana mambaco apo nan disampaian dek Mamak ko, ditambah pulo jo pantunnyo. Iyo ambo angkek topi ka Mamak, nan pasieh bana bapantun sambia manyampaian isi hati. Kok Mamak lai namuah manarimo pintak ambo, tolonglah ajaan baa carono bapantun tu Mak, karano ambo baru umua sataun jaguang.
Walaupun Mamak ndak manampaak an raso cameh jo gamang, tapi alah tabaco dari pasan Mamak. Kok indak ado nan manggantian urang nan alah banamo dulu. Manuruik ambo Mak, urang awak alah talalok, tarutamo nan mamaciek tampuak kuaso. Ambo alah sabuik an dalam masalah KA, baa kok KA di awak dilapeh an ka urang lain?
Kok Mamak ragu sia nan ka jadi Presiden, tarutamo dari sanak awak nan baugamo Kristen, ambo raso Mak, ndak ado gunonyo kito ragu, asa inyo lai bisa mamimpin negara ka jalan nan batua. Nan presiden ko, kan indak ka mancumpuakan urusan negara jo ugamo do Mak?
Contohnyo, Mak, kini di Parancih, salain Mak Ajo Buyuang di Marseille nan jadi walinagari, di Parieh io sanak kito dari Sumut nan kabatulan babeda ugamo, nan jadi Camaik nyo. Nan alah dirasoan dek saluruah masyarakat Indonesia di Parancih, iyo suasana kakaluargaan. Dulu , tiok abieh 17 Agus, rirayo, apolai natalan, sadonyo SMP ( sudah makan pulang atau setor muka pulang ), tapi kini Mak, alah batuka, sadonyo duduak maota suok kida jo nan alah lamo ndak basuo. Pak Camaik awak tu, kok ado pidato nan dari Jakarta nan mamakai pambuko nyo Assalamualaikum, liau sato pulo baco salam tu. ( Walaupun kok hanyo sakadar baso basi ), tapi apo ado urang awak Minang nan namuah mampalajari atau sakadar mangatahui caro sanak awak tu manjalankan ugamo nyo Mak ? ambo raso saketek bana. Ciek lai Mak, sajak labiah kurang 10 tahun ko, Islam alah jadi agamo nan ka duo di Parancih ko Mak, tapi presiden nyo, prefet (setingkat gubernur jo aparat pemerintahan lain, sadonyo Kristen.) Sadangkan nan Islam ko, buliah dikatoan 99 % dari Maroko , Aljazair, Turki, Tunisia, Mesir nan lah jadi WN siko. Tapi ndak ado tadanga tu Mak, baa kok presiden Perancis ndak urang Islam sae? Baa tu Mak Ajo Buyuang? Tolong diluruih an kalau salah, maklumlah, ambo alun baumua lai. Baa dek Maxaciak tu?
Ambo raso, kalao bingkai kabudayaan awak alah lapuak, apo ko ndak paralu para Mamak jo Bundo Kanduang sakampuang maatur baliak caro hiduik kamanakan nyo nan alah mulai sasek di jalan? Kalau sadonyo balapeh tangan, tantu iyo ndak ka salasai kaji tu Mak. "Oh iko ndak salah di awak ko, si anu nan punyo karajo, manga pulo awak nan diberangi? " Apo mungkin papatah " barek samo dipikua, ringan samo dijinjiang" bisa ka dijalankan Mak?
Sabananyo, ambo ingin bana punyo Nik Mamak nan bisa maaja ambo bapantun jo mangarati soal budaya jo adaik awak, tapi liau ko alah dulu dijapuik dek nan Kuaso. Ciek lai, ambo pun ndak lo ado wakatu tu. Liau ko hanyo didampingi dek Ibu ambo wakatu tu karano sadang dipajalanan. Iyo sansaro bana ambo. Tapi saketek banyak nyo ambo lai ado diaja dek mamak ambo, dan sampai kini lai tapakai. Kok ado mamak mamak nan lain di palanta ko nan namuah maaja ambo, ambo tarimo jo sanang hati.
Sakitu dulu Mak, kok ado nan tasingguangbelek nyo, tolong dimaafkan, ambo tarimo kritik sanak sadonyo.
Wasalam,
Rang Tabiang (39)
-----------------------Sangajo ndak dikuduang-------------------------
maxaciak minang <[EMAIL PROTECTED]> wrote:
Assalamualaikum Wr.Wb.
Dunsanak-dunsanak nan salingka palanta ko, nan kamek jo nan gagah baiak nan duduak baselo atau pun nan bajuntai kaki, rasono no lah patuik pulo ambo mancogokkan diri baliak sapulang batapa didalam biliak.
Manolah dunsanak nan nyo denai urang gadang basa batuah, nan babudi nan elok baso, urang tasabuik dalam kampuang nan taimbau dalam nagari. Alah sabulan pulo ambo mahilang raso no ado juo nan takana-kana iyo "sasek diujuang jalan babaliak kapangka jalan " mako no ambo mancubo baliak duduak jo dunsanak disiko. Kapatangko ambo cubo tagak bapacik takuik katarambau, dialiah duduak selo pulo nan sasuai. Beko basuo pulo nan kato urang kaca langan lah balangan kaca batih lah batih, busuang dado pado muko, raso badoso ambo dibuek no sabab dalam agamo alah dikatokan sampaikanlah nan bana walau paik, walau satu ayaik.
Manolah mamak Bandaro, Mamak Damrul, Mamak Mohtar Naim, Mak Sati Ibu Rahima, Bundo, Angku Zaimi Gazali, Angku Z. Chaniago, Urang Hotel Bapusako, Angku Irdamsyah sarato dunsanak-dunsanak nan duduak salingka Palanta nan ndak taimbau gala ndak tasabuik namo bari maaf jo rila tantang antun. Tarutamo kapado Angku Miko nan manjadi supir di palantako.
Salamo ambo mahilang mancubo ambo mambaco-baco curito minang Magek Manandin nan tacampak dilurah situngka banang dek dibuang di Mamak kanduang, lamo badan raso no dalam lurah antun tapi tapacak juo kasudahan no aie mato mandanga kaba di palantako. Dari nan pulang kampuang, sampai nan bapulang kerahmatullah, dari nan baminantu sampai ka nan bapisah di parak urang.
Dek awak alah duduak samo randah tagak samo tinggi tantu alah samo pulo pikiran nan kadiharu daalam RN ko. Mungkin kareh no ampeh batu domino, sanang no tabuka kalorok ndak tau bagai bahaso kampuang lah dialiah urang lalu, alah tajua kanagari urang. Saisuak ado papatah batu jatuah ka lubuak lai ibi hati konon parmato jatuah ka lubuak, tapi iyo juo nan parmato kalua no iyo dari lubuak atau juga dari kubangan mako no jan heran urang Guguak mandulang Ameh dalam lubuak tapi harago no maha. Apo tu kini nan lah hilang iyo babaliak awak ka curito Dibawah Lindungan Ka'bah by Buya Hamka ado kureta malinteh di Lembah Anai kini no hilang dari matotak ubah no basuo diawak kini sajak tahun 79 jo 80 baturuik-turuik Buya Hamka jo M. Hatta maninggakan awak alun ado juo ganti no. Lai ko teh talua gai di Palanta ko, bia lamak curito ambo agiah lah sagaleh dek dingin-dingin tangguang badan ko mah.
Nan tingga di Piaman kureta api ko banamo je bi jeh, di Padang Panjang Cicuiiiiiiiiiit, di Bukiktinggi Mak Itam di Simp. Haru Padang kureta puong. Ado papatah bakato hilang dimato lai kabasuo hilang dihati kadipangakan, samolah kini kureta iyo hilang dimato tapi bisa basuo di Batawi, tapi ano hilang dihati masyarakaik urang minang. Baitu pulo Buya Hamka hilang dimato masih banyak urang nan banamo buya, banyak pulo nan banamo Hatta tapi hilang dihati kadipanggakan sampai kini alun lah baganti. Lai ko sasuai juo pantun lamo ramo-ramo sikumbang jati, katik endah pulang bakudo patah tumbuah hilang baganti, urang mamakai pusako no. Ba ansua-ansua hilang mungkin punah kebanggaan urang minang nan alah dirintis oleh M.Hatta, Agus Salim, Moh. Yamin dan sebagainya, baa peranan nan mudo-mudo dalm mengambil sikap. Istilah kini estafet alah ko mampu nan mudo-mudo kini manarimo tongkat estafet samantaro banyak nan damam dari zaman Boney M, Berak Dance sampai Poco-poco jo Aserehe tantu kasudahan no bisa manjadi Esek lah he.
Kutiko ambo menghadiri Seminar Budaya Minang nan kebetulan Mamak Mohtar Naim turut memberikan pandangan tentang Budaya Minangkabau nan masih tarekam kini adolah " Bingkai nan lah lapuak kini tantu tak akan samo jo bingkai layang-layang nan katiko patah bisa dicari buluah untuak marauik no baliak, melainkan bingkai-bingkai nan alah tasusun sajak zaman ninik moyang saisuak apakah akan manjadi nan lambek laun dimakan api, padahal dalam adaik minangkabau ado dikatokan Lapuak-lapuak dikajangi, usang-usang dipabaharui" apokoh kini alah bisa awak bapikia tantang itu nan manjadi getaran bagi generasi juda minangkabu dalam menjawab tantangan dimaso datang. Bilo iyo urang "K" nan ka mamimpin (Presiden) awak kiro-kiro alah siap awak nan mamiliki bingkai adaik jo budaya dalam Adaik basandi syarak, syarak basandi kitabullah, sedangkan kini sebagian masyarakat minangkabau nan ado dikampuang banyak nan lah baraliah agamo (red.Singgalang) baa bagi awak nan ka manarimo estafet, eloklah lah awak sabalun talanjua tajadi daari kini awak basam o bapikia untuak manatap nagari nan alah dibantangkan dek urang gadang-gadang nan meng ikrarkan no tahun 1928. Mako dalam hal ko ambo ulang-ulang juo baliak jan awak sibuk ba organisasi sajo ko iyo sasek salamo ko mari awak baliak ka pangka jalan, nan masih takana di ambo kato BungHatta tahun 58 kutiko bapisah jo Bung Karno " Bila panas terik janganlah main ditengah lapangan, Bila hujan lebat berteduhlah agar tidak basah, Bila air sungai deras dan keruh jangan kamu mandi dan mencuci" itulah kutipan Bung Hatta kepada Keumala dan Mutia ketika ditanya anaknyo kenapa berhenti jadi Wakil Presiden, kini baa ka adaan nagari awak (Indonesia) .
Hari lah malam bialah ambo pulang bangih lo biai di rumah, ano garik tingga dek paja-paja lah dirantau sado no, labiah jo kurang bari maaf ambo manolah kato urang talantuang kanaik tasingguang ka turun teh talua cako bautang ambo abih bulan di baie tarimokasih.
Wassalam
Aciak St. Sarialam
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Tanpa mengembalikan KETERANGAN PENDAFTAR ketika subscribe,
anda tidak dapat posting ke Palanta RantauNet ini.
Mendaftar atau berhenti menerima RantauNet Mailing List di: http://www.rantaunet.com/subscribe.php3
===============================================
With Yahoo! Mail you can get a bigger mailbox -- choose a size that fits your needs
Do You Yahoo!? -- Une adresse @yahoo.fr gratuite et en fran�ais !
Testez le nouveau Yahoo! Mail
