Mamak jo dunsanak,
Nan iko ambo salinkan dari buku "Kato Pusako" karangan AB Dt.Majoindo, halaman 40-43.
Mohon maaf kalau alah mambaco.
Wassalam
Adyan
- - - - - - - - - - - - -
Randah bilang-bilang disuruak-i
Tinggi kayu aro dilangkahi
Ketek banamo gadang bagala
Manyuruak bungkuak, malompek patah.
Pai jo rundingan, tingga jo mupakaik
Bapailah batinggalah
Nan capek tibo daulu
Nan lambek datang kudian.
Muluik manih kucindan murah
Kato daulu basitinah
Kato kudian basicapek.
Jikok pai ka paralatan
Duduak tagak ado jangkonyo
Baso jo basi usahlah lupo
Nan tuo dipamuliekan
Nan ketek dikasihi
Samo gadang dipabasokan
Adopun nan disabuik parampuan
Mamacik taratik sopan
Tahu mamakai baso basi
Tahu diereang dengan gendeang
Mamakaikan raso jo pareso
Manaruah malu jo sopan
Manajauhi sumbang jo salah
Muluik manih baso katuju
Kato baiak kucindan murah
Baso baiak gulo di bibie.
Indak nan sirah salain kundi
Indak nan bulek salain sago
Indak nan indah salain budi
Indak nan elok salain baso.
Budi haluih bak lauik dalam
Muluik manih baso katuju
Dibagak urang kito tak ganta
Karano kito indak pacakak
Dikayo urang kito tak sagan
Karano kito indak mamintak
Dipandai urang kito indak kabatanyo
Karano kito indak ka baguru
Dipangkek urang kito tak malu
Karano kito indak mintak karajo
Dikuaso urang kito tak patuah
Karano kito bukan pisuruah
Dibudi jo baso sajo kito nan tunduak.
Talangkang carano kaco
Badarai carano kendi
Padi nan samo digantangkan
Bacanggang karano baso
Bacarai karano budi
Itu nan samo dipantangkan.
Ilmu padi nan dipakai
Makin barisi makin tunduak
Marandah hati dari kawan
Nan tuo dipamuliekan.
Kok sairiang jo nan tuo
Usah langkah mandahului
Jikok bagageh dek takaja
Mintak maaf jo karilaan
Mintak tabiak nak daulu.
Kok duduak di nan tinggi
Sugirolah capek tagak badiri
Mintak baganti tampek duduak
Eloknyo nan tuo nan di ateh.
Kok samo makan jo nan tuo
Tunggu daulu basuah tangan
Kalau daulu nak sudah makan
Nantikan salasai nan tuo-tuo.
--del---
Kok duduak basamo jo nan tuo
Banyak rundiang nan disabuik
Banyak pitua nan didanga
Patatah patitih salo manyalo
Banyak pangaja nan kadiambiak
Dapek baraja indak baguru
Dapek pitua sadang duduak
Bak bilalang dapek dimanuai
Bak dapek ikan sadang basiang.
- - - - - - - - -
