RE: [RantauNet.Com] palarai

[FST-IAMS-Elect]

 

-----Original Message-----
From: hendrif hendrif [mailto:[EMAIL PROTECTED]
Sent: Thursday, May 29, 2003 11:30 AM
To: [EMAIL PROTECTED]
Subject: [RantauNet.Com] palarai

Puntiang talatak di hulu, dibawah kiliran taji

Dirundiang asa dahulu, tigo limbago nan tajadi

Partamo sambah manyambah

Kaduo baso jo basi

Katigo siriah jo pinang

Sambah manyambah dalam adaik, tali batali dalam undang

Tasabuk bamuluk manih, muluk manih pangarang baso

Budi baiak tali pikatan banamo adaik sopan santun

Tumbuah sarupo iko kini, basiang di nan tumbuah

Dipatah-patahlah kalam, dipatah Bagindo Ali

Dala lauk ado no kolam, dalam kolam sumua tajadi

Biriak-biriak tabang kasamak,

Dari samak turun halaman

Dari niniak turun ka Mamak

Dari Mamak turun ka kamanakan

Assamulaiakum Warahmatullahi wabarakatuh.

Sabalun kalam ka dipatah, sabalun kato kadisusun, elok dicaliak tampaik tagak, elok dialeh kato sampai, lorong kapado diri ambo, ambo nan urang mudo matah, badarah baru satampuak pinang, baumua baru satahun jaguang, santiang indak pandai pun tido, kian kamari taraso gamang, ibaraik biduak nan balaia, biduak ketek pandayuang singkek, gamang jo galombang nan manguluang, garik jo karang nan ka manyakek, balaia ditapi-tapi, sapantun Mamak juo. "Pancaringek ditapi aia, babungo mangko babuah, ingek-ingek sutan balai, lautan sati rantau batuah", mako ambo susun jari nan sapuluah, ditakuakkan kapalo nan satu, dihujamkan lutuk nan duo, kapado Allah ampun diminta, rila jo maaf disampaikan kapado Niniak dengan Mamak, nan manjunjuang sako dalam adaik, Imam dengan Katib nan alim lagi alamah, siang rintang bapituo, malam rintang baibadat, nan mangatahui hala jo haram, Cadiak Pandai palito alam, sarato Rang Mudo pamaga Nagari, Bundo Kanduang limpapeh rumah nan gadang, sumarak kampuang jo nagari, sarapek papek no lah kapado Sidang Rantaunet nan dimulyakan Allah..

Bana dikatangahkan bakeh Sidang Rantaunet.

Adopun bana nan kadikatangahkan kapado Sidang Rantaunet :

Karano bapakai manuruk adaik, manjadi undang di nan tuo, : Gulamo mudiak ka hulu, mati disemba ikan tilam, kanailah anak bada balang, Pusako niniak nan dahulu, lai babuhua bakanakkan, kini manjadi undang.

Adopun nan manjadi ka dipacik arek, Basilang kayu ditunggku, mangko no api ka hiduk, limbak na dari pado itu, Kaki tataruang lai inai padahanno, muluk tasorong ameh padahan no.

Lorong kapado kini nang ko, Pandang jauh balayangkan, caliak dakek iyo batukiakkan. Lah dibaka kumayan putiah, asok manjulang ka udaro, sampaik kalangik tujuah sigi, lah diinok dimanuangkan, dipikia dikalaka, ditukiakkan caliak nan dakek, adok tantangan nan tumbuah kini, tumbuah di Palanta Rantaunet nangko, nan isi no bana, tantangan silang pandapek sidang majilis, masalah Aceh

Kok "kalam" nan tatulih, lah dibaco basamo-samo, disimak nan dari awa sampai akhia, Indak tarago diulang, kok diulang sinan juo katibo no, elok diambiak nan paralu. Nan isino bana, kato bajawek, gayuang basambuk, jawek bajawek antaro kito, sambuk-sambuk basamo-samo, tapi tantangan jawek jo sambuk kini nan tu, kok kusuk alun kamanyalasai, kok karuah alun kamanjaniahi, karano arok mambunuah kapindiang nan sikua, rumah nan gadang nan babaka, arati no bana, dalam jawek majawek, sambuk manyambuk kini nagko, lah ta cukam jajak mandaki, tasidorong jajak manurun, kato kalua kato baujuang, ujuang nan indak basalasai, kato manyipak madok suruk, kanai nan urang suok kida, apokoh lai urang nan dituju. (basuluah matohari, bagalanggang mato rang banyak)

Ba a tu kini lai.

Elok dipinteh capek kini sabalun hanyuk ka muaro, elok dibilai tali silaturrahmi pado manjadi silang sangketo. Nan mukasuk no bana, lorong kapado tantangan Aceh elok dilipek sajo dahulu, lain wakatu dibukak baliak. Nyampang kok dibukak-bukak juo, tolong jo kato nan manyajuak, kok kusuk lai kamanyalasai, karuah nan lai manjaniahkan, dipakai raso jo pareso, sarato ereang dengan gendeang, jan sampai mangulenseng tangan, jan manyipak ka paranak-an, manuduah nan buka-bukan, janiah salasai nan indak dapek, karuah jo kusuk tambah jadi no.

 

 

Wattawwa ul bil haq,

Innamal a'malu binniat,

Balighul anni wallauayah.

 

Nan Kuriak iyolah gundi

Nan merah iyolah sago

Nan baiak iyolah budi

Nan indah iyolah baso

 

Talangkang carano kaco

Badarai carano kendi

Padi nan samo rang randangkan

Baganggang karano baso

Bacarai karano budi

Itu nan samo rang pantangkan

Dari Barunai ka Patani

Namo daerah tanah malaka

jikok pandai bamain budi

dalam aia badan tak basah

 

Kaki tatarung inai padahan no

Muluk tadorong ameh padahan no

 

Sakitu lah bana nan katangah dari ambo, limbak nan dari pado itu, kok lailah tipak di ambo kinitu, tadorong dalam bakato, tasabuik di nan bukan, tasingguang kalo kanaik, talendo jikok katurun, bajalan indak di nan pasa, baranti indak pado titiak, patuik diateh ta kabawahan, nan ditangah ta katapian, sarato lupo mambaok katinggalan, tingga nan indak disangajo, ka Allah ambo minta ampun, ka Niniak Mamak, Alim Ulama, Cadiak Pandai, Rang Mudo Pamaga Nagari, saratu Bundo Kanduang limpapeh rumah nan gadang, sidang Rantaunet ambo minta maaf.

Wassalamu'alaikum panyudahi.

 

St. Bandaro Labiah

---

Yahoo! Plus - For a better Internet experience