Waalaikumsalam
Assalamu'alaikum.
Uada Zul Amri
Iyo juo kato Uda Zul Amri, pintak ciek nak duo, buliah duo nak tigo, lah lazim disyarak, lah kawi di adaik,
Insyaallah, nak dicubo manjawek no. tapi sungguah kadijawek,
Baburu katanah data
dapek ruso balang di kaki
balang no asok nan kulabu
kulabu no alun pakek bana
Baguru baru kapalang aja
buku ilang guru lah mati
tapaso dibilang sado nan tahu
Tahu nan alun jaleh bana.
Partamo
Alhamdulillah, nan salamo ambo mandanga, iyo alun ado dalam malekkkan gala (Soko) nan tapakaikan "baju" urang lai, karano sabalun malakekkan gala tu, bak kecek Uda Zul Amri juo, iyo baguakan canang talabiah dahulu, diadokan pulo rapek Karapatan Panghulu, wakatu disiko, dicaliak, disigi tantangan gala nan kadilakekkan, sia nan kakamamakai, lai buliah urang tu mamakai gala nan kadipakai tu, nyampang tapakaikan "baju" urang, insyaallah, lai pulo panyalasaianno dalam adaik, antaro lain " Kato Asa Kato Dahulu, Kato Kudian Kato Batapek-i" isino bana, apobilo ado kaputusan nan kurang tapek, mako diambiak kaputusan lain, tahadok kaputusan ko iyo sapakaik manjalankan.
Jikok nan mamacik gala nantun, babuek nan bukan-bukan (bahutang sacaro adaik), mako nan kamambaia adolah anak kamanakan, karano Mamak dipintu Hutang, Kamanakan dipintu Baia, caro jo bantuak mambaia no ba a ? kamanakan mambaia sacaro adaik pulo, nan ka mangadang jo maninggikan Mamak adolah anak kamanakan sandiri,
kok lah basuluah mato hari, bagalanggan mato rang banyak tahadok karajo jo karenah Mamak Nan tun, mako anak kamanakan mampunyai hak untuk ma-aliahkan tugeh jo kawenangan Mamak (sebagai Panghulu) kapadu anak kamanakan nan lain, umpamono kapado Panunggkek no, tantunyo kahandak ko disampaikan pulo kapado Karapatan Panghulu dan dinyatokan dalam kaputusan Karapatan Panghulu pulo, sahinggono nan kasato rapek Panghulu jo nan manjalankan tugeh panghulu kaum salanjukno iyolah nan pangganti Mamak nantun
Kaduo.
Dalam malaksanakan tugeh sabagai Panghulu Kaum, tantuno Mamak (Panghulu) nangko ma-atehkan namo kaumno, apobilo tahutang sacaro adaik, mangko anak kamanakan nan kamambaia, bak kecek diateh cako, karano diangkek ateh parmintaan jo kasapakatan kaumno pulo, dan juo kan alah tasabuk bahwasono Mamak lai basawah panggadangan, jo hasia sawah panggadangan ikolah hutang Mamak tu dibaia.
Balain kalau Mamak ko babuek nan bukan-bukan dalam bantuak parbuatan Pidana atau babuek sacaro pribadi, mako nan ka mambaia iyo badan diri Mamak tu sajo, bak kecek Uda Zul Amri juo, baia sen lah surang, karano parbuatan nantun manjadi parbuatan pribadi.
Sakitulah Uda Zul Amri, di ambo mamintak kurang-kurang, mambaia panuah-panuah di Mamak-mamak sarato di Sidang RN.
Wassalamu'alaikum
Bandaro Labiah
zul amri <[EMAIL PROTECTED]> wrote:
Assalamualikum Wr.wb :
Batanyo kanan Pandai , mamintak kanan barado , iyo sabana lasuah .Nan ditanyo jaleh , nan dimintak buliah . Tarimo kasih sanak Z. Sutan Bandaro Labiah ateh sagalo jawaban partanyaan ambo satantang gala pusako nan alah dicurai papakan salangkoknyo , ditambahi pulo jo patatah patitiah sahinggo batambah pulo ilmu awak ciek lai tantang adat dan budaya Minang .
Namun iyo juo bak kecek sanak , mintak ciek nak duo , diagiah duo nak tigo, baa janyo kalau ,….diagiah bana..!
Partamo
Samantang tajadi baju salah pakai , baju urang nan tapakaikan . atau baju kaciak nan tasaruangkan , atau tasaruangkan baju kanan indak bamoral , sarupo datuak runciang tanduak baa caro maurak maungkainyo ???,
Kaduo
Apobilo urang alah bagala , mako kultus individu indak ado lai , sakironyo urang nan lah bagala tu babuek baiak mako kaumnyo nan mandapek tuah , kan baitu pituah sutan…… , namun paralu diingek kabalikannyo , Samantang tajadi buruak cando , nan mambuek malu anak kamanakan dalam nagari , bukan marupokan tanggung jawek nan punyo gala , tapi tangguang jawek talimpah kapado kaum , barati sorang makan cubadak kasadoe kanai gatahnyo , sikua kabau bakubang sakandang kanai luluaknyo . Hal iko nan balun sasuai jo badan diri awak ,dan indak pulo cocok jo ABSSBK , agamo kito indak mangana doso kolektif , kacuali fardhu kifayah , sorang sajo nan mangarajokan lansailah sagalo doso , contonyo sarupo mangurus mayik nan indak bakubua
, namun doso nan dikarajokan pribadi , sarupo datuak runciang tanduak tu , mako tangguanglah dosotu surang , jan urang lain dibao rendong , kan iyo baitu kaji nan biaso tu Sutan Bandaro Labiah ..?
Wabillahi taufik walhidayah !
Wassalam : Zul Amry Piliang (54+11 bln) di Kuta Bali
Do you Yahoo!?
SBC Yahoo! DSL - Now only $29.95 per month!
