Assalamu�alaikum w.w.
Talabiah dulu ambo mintah maaf kapado Angku-angku Niniak Mamak Nan Gadang Basa Batuah, Cadiak Pandai, Alim Ulama, sarato Bundo Kanduang tamasuak jo Nan Mudo pamaga Nagari nyampang kok ado salah jangganno tantantang nan kadisabuk dibawah nangko.
Karano ado topik tantangan pambarian gala, ambo cubo pulo manyampaikan agak saketek, untuang-untuang lai paguno di ambo sandiri baitu juo dek awak nan basamo.
Sabalunno elok dipacik papatah nan tuo : "Adaik Salingka Nagari", karano mantun mungkin babedo jo kampuang jo nagari nan lain, nan ambo sampaikan adaolah nan ambo katahui nan balaku di daerah Banuhampu, Kabupaten Agam.
Di Banuhampu, tantangan gala nangko iyo dapek dibarikan dikalo :
- Wakatu saurang anak laki-laki lah ka malangkah (barumah tanggo), sabalun diantakan karumah Anakdaro, biasono malam hari sasudah sumbayang Isya (acarako banamo Malapeh jo Maanta), mako bamupakaiklah para Niniak Mamak, Alim Ulama, Sumando sarato Amai-amai, untuak macrikan Gala nan kadipakai Marakpulai,. Adopun gala nan kadipakai bisa Gala Pusako (Gala nan ado di Pasukuan Marakpulai) atau Gala Limbago (Gal nan ado di Pasukuan Apak Marakpulai). Anak dari Marakpulai ko buliah pulo mamakai Gala nan ado dipasukuan Marakpulai, tapi apobilo Gala nan dipakai Marakpulai adolah Gala Limbago, mako anak katurunan dari Marakpulai indak buliah doh mamakaino..
- Wakatu anak kamanakan kito nan Padusi barumah tanggo jo Laki-laki nan barasa dari lua Minangkabau, mako ateh mupakaik Niniak Mamak nan Minantu tu dibari Gala.
- Wakatu Batagak Gala PUSAKO, adolah mabarikan Gala Panghulu kapado anak kamanakan nan laki-laki, nan kadiangkek manjadi Panghulu, manjadi Mamak dalam Pasukuan, disabuk sabagai Datuak. Gala nan dipakai / dilakekkan dek Datuak tu adolah Gala Datuak nan ado dalam Pasukuanno, indak buliah Gala Datuak nan ado dalam pasukuan nan lain (tasabuk "Baju surang nan bakanak-kan). Dalam Batagak Gal ko, kok Bulekno indak basagi, kok picakno inda basumbiang, lah sapakaik sagalo niniak mamak sarato kaum nan ado dalam pasukuan, lah dibaok pulo kapado Karapatan Adaik Nagari
- Pambarian Gala SANGSOKO, alah pernah kito bahas basamo dalam RN nangko, nan intino adolah gala penghargaan nan dibarikan kapado urang-urang nan dianggap bajaso kapado nagari nan maagiah gala tu. Gala nan dibarikan ko indak dapek diturunkan kapado anak kamanakan dari nan manarimo, jadi apobilo nan manarimo Gala tu alah maningga, mako gala tu indak bisa dipakai dek anak kamanakanno doh. Pambarian gala ko saharusno alah manjadi kaputusan Niniak Mamak sarato Karapatan Adaik Nagari.
Adopun Gala nan dibari adolah Gala "Nagari" atau "Lauk" umpamono Sutan "Makmur", kok anno anamo Anwar bisa pulo diagiah Gala Sutan "Anwar" . Gala "Nagari atau Lauk" ko adolah Gala nan indak tamasuak (indak ado) dalam daftar Gala Pasukuan.
Bisa pulo Minantu natun dibari Gala jo Gala nan ado dalam dalam Pasukuan. , tapi sabalunno harus maisi adaik, carono adolah MAAMBAKAN / BAAMBAKAN, mukasukno adolah Minantu nantu Diambakan (bamasuakkan) manjadi anak kamanakan dari salah satu pasukuan nan ado dikampuang tu, umpamono masuak kadalam pasukuan Bako dari Anakdaro, tapi indak buliah masuak kadalam pasukuan Anakdaro karano samo sapasukuan indak buliah saliang manjapuik doh. Tantuno dalam MAAMBAKAN ko, ditarimo atau indakno tagantuang kapado KAPUTUSAN dari Niniak Mamak nan ado dalam Pasukuan tampaik nan ka diambakan. Apobilo alah ditarimo, mako Minantu tu alah buliah pulo mamakai Gala nan ado dalam Pasukuan nantun, sabaliakno tantu indak.
Wakatu batagak gala Datuak ko, ditantukan pulo parangkaik panghulu tu, antarono lai ado Pensehat Datuak nan banamo ANGKU, baitu pulo ado panungkek no nan banamo BAGINDO, disampiang itu, sado anak kamanakan laki-laki diagiah Gala, Gala ko pulo nan kadipakai wakatu anak kamanakan nan laki-laki ko barumah tanggo. (paralu pulo diigek, salain nan diatehko adopulo bantuak Batagak Gala nan lain)
Sakitulah dulu dari ambo, tukuak tambahno iyo bamintakkan juo ka awak nan basamo
Wassalamu�alaikum w.w.
Bandaro Labiah
