Kisah / catatan pribadi ambo di bawah ini sangajo ambo lewakan hari ini , karano ado berkaitan sedikit di akhir kisah jo kejadian 30 September , 38 tahun nan lampau , semoga sanak anggota rantaunet senang membacanya , bagi yang tidak mohon diabaikan sajo .
Zul .
Salamek tingga Taluak Bayua
Pado bulan Juli tahun 1965 , ambo telah luluih dari smp negeri 1 Solok . Mako lah tagurih didalam hati handak malanjuikkan sakola ka Jakarta . Kabatulan sajak peristiwa prri kaduo rang gaek ambo lah pindah ka jakarta mulai tahun 1960 , sadangkan ambo tetap tingga dikampuang ambo di Saok Laweh , dengan gaek dan etek ambo . Baa mako sampai rang gaek ambo ka Jakarta iyo agak panjang pulo caritonyo..
Dimaso peristiwa prri th 1958 sampai tahun 1959 masih angek , masih banyak pertempuran disana sini , khususnyo didaerah Kiliran Jao sampai dengan Muaro Sijunjuang . Rang gaek ambo bapandapek bahaso kalau nak aman pai bana kapangka badie , artinya harus pai ka Jakarta . padahal untuak mancapai Jakarta tu allah hu rabbi suliknyo . Mako diambiaklah jalan pinteh mailie ilie sapanjang Sungai Batang Hari naiak parahu tempe dek bapak sarato amak ambo dan tigo urang adiek ambo nan masih ketek ketek , akhirnyo sampai lah kanagari Jambi , tujuan utamo adolah Padang tapi diambiak jalan babelok via Jakarta , mako dengan
manompang kapa lawik dari Jambi perjalanan ditaruihkan ka Jakarta . Sajak tibo di Jakarta rang gaek ambo manompang dirumah dunsanak baliau nan banamo Mudana gelar Ombak di Gurun didaerah Kramat Sentiong .Dek lah babarapo hari tingga di Jakarta , tabukaklah pangana dek rang gaek ambo untuak mancubo bausaho dikota Betawi nangko , kan pangalaman lai ado , baliau salamo tingga di Sungai Dareh adolah tukang ameh , sakalian pamilik dari toko ameh nan ado dinagari tu , Iyolah dengan modal pertamo nan diagiah dek adiak baliau tu ditambah siso pitih nan dibaok dari Sungai Dareh mako dibukaklah kadaian ketek dikawasan Pasa Matraman Jl .Pemuda kiniko , dan untuak tampek tingga baliau mangontrak rumah di Salemba Tegalan gang IX. Masuak dari rumah makan Padang Roda , Dek wakatu tu persaingan usaho alun lai sarupo kiniko , mako usaho baliau tu lai lanca sajo jalannyo .
Namun manusia berencana tuhan manentukan lain , karena pas di daerah pasar Matraman tersebut akan dibangun jalan tembus antara Matraman Raya dengan jalan Bypass disebelah timur maka semua pedagang dan rumah rumah disepanjang jalan tersebut mengalami penggusuran ,termasuk kadaian mas orang gaek ambo , maka sejak waktu itu terpaksa pindah usaho dari dagang emas ke usaha martabak terang bulan dan martabak talua dikawasan Jl KH. Achmad Dahlan Kayu Manis dekat stasiun Solitude Jatinegara , usaha digeluti sampai th 1965.
Kambali ka bakeh diri ambo setelah tahu lulus dari SMP negeri 1 Solok , makonyo mangurus sagalo sasuatu sarupo salinan ijazah , surek pindah , surek jalan dan surek lainnyo untuak kaparluan sakola di Jakarta nantiknyo. Pado tanggal 14 Juni th 1965 , dengan manumpang Kapa Koan Maru ambo barangkek dari Taluak Bayua manuju Jakarta , basamo surang kawan yang akan melanjutkan sakola ka Jakarta . Kapa Koanmaru ko adolah satu satu transportasi lauik waktu itu , kapanyo sandiri warnano putiah barasiah , dan kabanyakan awak kapanyo urang Japang sadoe .
Naik kapa klas dek waktu itu iyo bana basigincik , bantuak sardencih . Sangkek tu alun ado lai lagu �Selamat Tinggal Teluk Bayur � yang dinyanyikan Erni Djohan tu , mako sabalun kapa barangkek hanyo lambaian sapu tangan atau tangan sajo untuk mangucapkan parpisahan dengan ranah Minang . Lambat lambat kapal Koan Maru meninggalkan Pelabuhan Teluk Bayur menuju Samudera Hindia . Duo hari duo malam taombang ambiang dilauik mako sampailah ambo di Jakarta , sabalunnyo kapa singgah labiah dulu di Bangkahulu manurunkan panumpang tujuan Bangkulu dan Palembang . Kapa balabuah ditangah lawik , karano kapa indak bisa marapek ka pantai , dan panumpang baturunkan jo sikoci , kadang iyo ngari ambo maliek wakatu panumpang turuntu , kalau salah salah paritungan bisa tacabua
kalawik.
Sasampainyo ambo di Tanjuang Priuk , kabatulan dijapuik dek famili nan tingga di Bukik Duri . Dan famili ambo tulah nan maantakan ambo sampai katampek ranggaek ambo di Salemba Tegalan Matraman Jakarta . Setelah saminggu ambo di Jakarta mulai lah mancari sikola , babarapo SMA ambo datangi , ternyata penerimaan siswa wakatu tu indak samudah nan ambo bayangkan , apolai kalau barasa dari daerah , dan harus sadio pitih banyak untuak bisa masuak . Untuang lah ado kenalan rang kampuang ambo nan manjadi guru di STM negeri III Kebon Sereh Jakarta , namonyo Bpk Drs . Zabir nan barasa dari Tanjuang Paku Solok . Dengan perantaraan jasa baik baliaulah ambo bisa masuak , walaupun sacaro formalitas harus melewati test sagalo macam . Tigo bulan sasudah ambo masuak STM III , pacahlah peristiwa G 30 S PKI , yang mano pado malam kajadiantu ambo masih sempat mangikuti malam temu teknik saluruh Indonesia yang diikuti saluruh mahasiswa teknik dan siswa teknik batampek di Istora Senayan dan kabatulan BungKarno hadir di acara tersebut . Karano acarano berakhir tengah malam dan sudah tidak ada lagi kendaraan untuk pulang mako ambo bajalan kaki dari Senayan sampai ka Matraman , lumayan jauh , tapi karano malam dan barami ya indak taraso . Tak terbayangkan maso itu , kalau peristiwa G 30 S akan terjadi satalah ambo sampai dirumah kiro kiro jam 2 pagi .
Wassalam : zul amry di kuta bali
Do you Yahoo!?
The New Yahoo! Shopping - with improved product search
