Assalaamu'alaikum wa rahmatullahi wa barakaatuhu
Manolah pak Saaf nan ambo hormat-i'
"Dr.Saafroedin BAHAR" <[EMAIL PROTECTED]> wrote:
Wassalamualaikum w.w. Sanak St Lembang Alam,
Tarimo kasih ateh penjelasan Sanak. Jo 'malakok' itu
aratinyo ambo punyo duo 'kewarganegaraan', Padang
Panjang dan Pariaman. Kudian-kudian ko ambo memang
mandanga tantang konsep 'malakok' ko, tapi katiko
ketek indak paranah tahu soal tu, apalagi Ayah ambo
kan manganggap diri baliau punah. Artinyo gadang
kamungkinan baliau juo indak tahu. Kalau baliau tahu
tantu indak baitu gadang bana tekanan bathin nan
baliau darito sampai akhir hayat baliau.
Tarimokasih kumbali pak. Manuruik pandangan ambo, satiok manusia, indak
kacuali awak urang Minangkabau adokalono tatap ka kalua dari tatanan nan lamo,
pindah ka tampek nan baru, dan itu dikarajoan urang sajak saisuak. Iko
pangaratian ambo tantang tabang mancangkam - inggok manumpu ko sajauah nan ambo
pahami. Sajak itu pulolah inyiak awak saisuak alah manyabuik, dimaa bumi
dipijak, disinan langik dijujuang. Nampak di ambo urang awak indaklah fanatik
bana jo lingkuangan baiak nan lamo ataupun nan baru, dek parinsip di maa bumi
dipijak disinan langik dijunjuang taditu.
Ambo raso pasti Anduang ambo Siti Fathimah indak tahu
soal malakok ko, karano baliau kan datang ka Padang
Panjang sabagai samacam 'TKW' caro kini. Inyiak ambo
Saora rasonyo juo indak paranah manawarkan untuak
malakok ko. Gadang kamungkinan baliau juo indak tahu.
Adapun tantang datuak-datuak suku Koto dari pihak Ayah
ambo, nan takana di ambo hanyo sibuk jo manjuai harato
pusako sajo. Kini rumah Inyiak ambo Saora di Silaiang
Padang Panjang tu alah dijua dek datuak nan kini ka
Pemerintah Kota Padang Panjang. [Tantu baliau dapek
juo rasaki saketek].
Manuruik pandapek ambo, arato pusako tinggi tu, indak jaleh pamiliak nan
sabanano, kacuali 'adaik' itu sandiri nan mamiliki. Jadi indak ado nan berhak
untuak manjua. Baiak dicaliak dari kacomato adaik maupun dari kacomato syarak.
Kalau sacaro syarak, awak indak buliah mampajuabalikan arato nan bukan miliak
awak. Disko tampak diambo ado ciek poin nan patuik bana diluruihan dalam rangko
panerapan ABS BSK. Dan kabaliak-anno pulo, saandaino ado pasukuan nan punah,
sarupo nan pak Saaf kecek-an, sainggo nan tingga maraso 'alah' buliah no manjua
arato pusako cakotu, mako harato nan alah dipajuabalikan tu dek pamiliak nan
baru indak lai no manjadi arato pusako adat. Malainkan alah jatuahno manjadi
pusako randah. Di sabagian masyarakaik awak, tamasuak di kampuang ambo iko
masih rancu. Urang laki-laki mambali sawah, untuak anak binyino, kudian dek
binyino dimasuak-anno baliak kadalam bagian pusako tinggi, diwarihkanno ka anak
padusino. Iko tantu indak batua lai, sacaro syarak.
Sadiah rasonyo. Nan dapek ambo pabuek adolah mambuek
surek ka Pemerintah Kota Padang Panjang jo DPRD Padang
Panjang supayo SD nan ka dibangun di ateh eks tanah
parumahan Inyiak ambo tu diagiah namo "SD Saora",
supayo ado juo kenangan ka baliau.
Barek juo rasonyo tibo-tibo ambo nan salamoko maraso
urang Padang Panjang tibo-tibo sadar bahaso maanuruik
adat Minang ambo bukan baitu. Ambo maraso saroman
urang Cino Indonesia, nan manyangko inyo urang
Indonesia tapi dipalakukan sabagai urang Cino juo !
Salamo ko sabagai jalan kalua, ambo jo saluruah
anak-anak ambo marumuskan diri sabagai urang Indonesia
sajo, talipuik sadonyo. Apolagi karir ambo kan labiah
banyak di lua Minang.
Nan iko kan alah awak kaji di ateh pak. Ambo sapandapek bahaso pak Saaf
justru mampunyoi duo kawargaan. Sah sabagai urang padang panjang dan sah juo
sabagai urang Piaman.
Pangalaman ketek ambo ko barangkali bisa manjadi
alasan tambahan untuak manulihkan hukum adat
Minangkabau tu sacaro langkok, supayo sadonyo kito
urang Minang nan alah bakambang biak di seluruh dunia
ko ado kasamoan pangaratian. Indak samonyo pangaratian
bisa punyo akibat nan jauah, paling indak timbua salah
mangarati, dan bukan mustahil timbua silang sangketo.
Untuak manulihan hukum adat sakali lai ambo indak yakin ambo mampunyoi
kamampuan dan kasanggupan. Ambo labiah acok manjadi pangamat lalu kudian
manyimpulkan apokoh nan dikarajoan dunsanak-dunsanak awak tu batua atau salah.
Baresiko atau indak. Sarupo nan pak Saaf kecek-an, apokoh mungkin ka manimbuaan
silang sangketo di kudian ari. Ambo sapandapek bahaso banyak nan musti
dipelok-i dalam lingkup kahidupan urang Minangkabau, nan manjadi bagian juo
dari kahidupan baradat, bagi nan masih tingga di kampuang. Sabuah contoh nan
sangaik rawan adolah mambagi tanah parumahan di kampuang. Tanah pasukuan nan
ketek, nan cukuik untuk tigo buah rumah bagi enek-enek awak saisuak, kini ado
anak cucu (nan padusi) nan ingin nak mambuek rumah baru di ateh tanah 'adat'
tadi. Soal nan partamo gadang tanah indak mancukuik-i, soal nan kaduo, acok
tampak diambo, nan bapitih, basilanteh angan sajo dulu mambangun, indak
mamikia-an dunsanak padusi no nan lain. Soal nan katigo, katiko di ateh tanah
adat tu dibangun rumah baru, baa kaduduakan rumah baru tu? Arato adat no atau
arato warih pusako randah. Iko paralu pulo disiangi.
Sairiang jo itu, sasuai jo sifat dan isinyo, baiak
supayo kito jan salah mamakaikan maupun untuak
manampuang kaparaluan manyasuaikan hukum ABS SBK kito
jo kabutuhan zaman,adat dan hukum adat tasabuik paralu
dikalompokkan dalam ampek kalompok, yaitu adat nan
sabana adat, adat dan teradat, adat nan diadatkan,
sarato. adat istiadat Nan indak buliah diubah kan
hanyo adat nan sabana adat. Lainnyo buliah diubah jo
bakarilahan ['abih adat jo bakarilaan'\.
Sajujurno, ambo bukanlah urang nan mangarati tantang adat ko pak Saaf. Jauah
dari itu. Ambo bangga sabagai urang Minangkabau, manarimo bagian-bagian nan
elok dari aturan adaik Minangkabau, namun tatap maujino baliak jo kabanaran
agamo. Katiko balago kapantiangan adaik jo kapantiangan agamo, untuak diri ambo
insya Allah ka ambo ambiak nan dibanaan dek agamo. Dan ambo mancaliak banyak
bagian-bagian adat nan bisa di patamukan jo urusan agamo. Kecek-anlah misalno
pakaro nasab sarupo nan panah pak Saaf tulih dilain kasampatan dulu. Islam
manyuruah umaik banasab ka ayah. Ikopun di tarimo dek adat Minang. Itulah nan
ditarimo jo adono pambagian duo macam pusako. Adono pangakuan adat Minangkabau
taradok pusako tinggi jo pusako randah. Pusako randah nan turun dari ayah ka
anak. Pusako tinggi memang iyo indak mungkin diturunan do sabab sarupo ambo
tulih sabalunko kapamilikanno kabua. Indak tau awak sia nan sabana mampunyoi
arato pusako tinggi, kok nyampang awak ingin manurunkan
sarupo pusako randah pulo. Dari maa ka dimuloi.
Bukti kaduo, urang Minang tataplah manjadi wali nikah bagi anak gadihno,
bukan do mamak nan manikahkan kamanakanno. Bahaso sasudah itu ado kakraban atau
kumpulan nan labiah dakek malalui garih ibu, indak ado bagai laranganno dalam
agamo do. Idiom anak di pangku kamanakan dibimbiang sabanolah alah sangaik
islami manuruik pangamatan ambo. Anak dipangku, sajak dari bayi sirah, diuruih
digadangan, namun kamanakan di paratian pulo. Indaklah batua dalam islam kalau
awak indak paduli saketek juo ka dunsanak padusi awak dek awak lah babinyi.
Indak paduli saketek juo lai ka kamanakan awak dek awak alah baranak. Tatap ado
kasaimbangan antaro mamangku anak jo mambimbiang kamanakan. Indak ado nan salah
dalam hal iko manuruik kayakinan ambo.
Sabalun ko ambo alah mancubo mambuek matriks analisis
ampek macam adat ko, nan kalau paralu bisa ambo
kirimkan baliak.
Sasuai jo kasapakatan samantaro di rumah Bundo
Hayatun, ambo harokkan Sanak St Lembang Alam basadio
sato untuk manulihkan draft hukum adat Minangkabau nan
badasar ABS SBK tu basamo jo Sanak Bandaro Labiah. Iko
akan jadi amal jariah sanak baduo ka kampuang halaman
kito. Kok paralu kito buek bana panitianyo, misalnyo
diminta kasadioan pak Amir MS Dt Mangguang nan Sati
dan lain-lain untuak sato bagabuang.
Agak barek di ambo untuak sato mambuek rumusan aturan adat ko, sabab itu
tadi, ambo bukanlah nan mangarati sangaik pakaro adatko.
Ambo raso dalam tempo paliang lamo duo tahun kito alah
punyo draf Kompilasi Hukum Adat Basandi Syarak, Syarak
Basandi Kitabullah (ABS SBK) dan alah lamo kito
nanatikan.
Mudah-mudahan ado nan labiah ahli nan ka bisa mangaluaan pandapek nan boneh.
Insya Allah, samo awak doakan.
Manuruik pandapek ambo, nan berhak mangesahkannyo
adolah saluruah urang Minang, baiak di Ranah maupun di
Rantau, mungkin malalui samacam Kongres Akbar
Minangkabau.
Bak raso ka barek, tapi malah diansua mamikianno pak.
Sampai disiko dulu Sanak. Sakali lai tarimo kasih.
Tarimo kasih kumbali.
Wassalam,
Saafroedin Bahar
Wassalamu'alaikum,
St. Lembang Alam
http://lembangalam.multiply.com
http://360.yahoo.com/stlembang_alam
---------------------------------
Be a better Globetrotter. Get better travel answers from someone who knows.
Yahoo! Answers - Check it out.
--~--~---------~--~----~------------~-------~--~----~
Berhenti (unsubscribe), kirim email ke: [EMAIL PROTECTED]
Webmail Mailing List dan Konfigurasi keanggotaan lihat di:
http://groups.google.com/group/RantauNet/subscribe
Dengan terlebih dahulu mendaftarkan email anda pada Google Account di:
https://www.google.com/accounts/NewAccount?hl=id&cd=US&service=groups2.
-~----------~----~----~----~------~----~------~--~---
