Assalamualaikum w.w. para sanak sapalanta,
Dalam rangka malala ka Amrik, ambo sakaluarga dapek kehormatan diundang
oleh Dinda Dutamardin Umar sarato para panguruih MinangUSA nan lain, saparati
Sanak Malik Abdullah, Dr Syafrida Hasan, Firdaus, dan Sukiman. Ado duo acara
nan ambo ikuti, yaitu 1) acara kegiatan sosial saparati piknik ka St George
Island di Cheaseapeake Bay,Maryland, dan kanduri sunatan di Washington DC, dan
2) batuka pikiran tentang hal-hal nan paralu dikoordinasikan antaroMinangUSA
dan MAPPAS, sarato untuak maagiah masukan tantang pakambangan ABS SBK.
Barikuik ko adolah babarapo pokok-pokok nan paralu ambo sampaikan ka sanak sa
palanta.
MinangUSA.
Organisasi iko dahulunyo diinginkan manjadi cabang Gebu Minang di USA, dan
untuak tu alah dikirimkan surek kapado panguruih Gebu Minang Pusat di Jakarta
untuak mandapek pengesahan, tapi karano indak panah dapek jawaban, mako
diputuihkan untuk mambantuak sajo MinangUSA sabagai badan hukum USA. Para
pagiat MinangUSA mampunyoi hubuangan arek baiak jo masyarakat Minang maupun jo
Kedutaan Besar RI di Washington DC. Untuak mangatahui bara jumlah perantau
Minang, akan diadokan pendaftaran anggota dan pembantukan cabang-cabang di
seluruh USA. Para pegiat MinangUSA ko ingin maagiah bantuan dan dukungan untuk
pembangunan nagari-nagari di Sumatera Barat, tapi alun dapek mitra nan pas
untuk pelaksanaannyo di maso datang. Salamo ko alah dimuloi menyalurkan dana ka
BPR-BPR Gebu Minang, misalnyo di Pariaman, sebagai saham atau deposito dengan
syarat asal dipinjamkan ka pengusaha kecil jo bungo murah.
Pulang Basamo 2008 (PB2008)
PB2008 nan diprakarsai dek MinangUSA tetap dilaksanakan sasuai jo rencana.
Pado bulan Juni 2008 diharapkan akan pulang sekitar 300 orang, dan pada saat
iko sudah mendaftar kl 180 orang, terdiri dari para perantau Minang sarato ipa
bisan dan handai tolan, termasuk ipa bisan dan handai tolan orang bule. Untuak
mencegah timbuanyo kasan nan indak-indak, pengurus PB2008 mengharapkan agar
INDAK diadokan kegiatan khusus untuak manyambuik PB2008 ini, karano mereka
ingin pulang sebagai perantau biaso nan pulang kampuang. [Seluruh persiapan
teknis menurut rencana akan ditangani oleh PT Tigo Balai Tour.].Rombongan akan
ado di Sumatera Barat salamo saminggu, antaro tanggal 9 Juni 2008- 15 Juni
2008, dan mengunjungi Anai, Bukittinggi, Payakumbuh, Maninjau, Pantai Bunguih,
Pulau Sikuai, dan Padang. Gadang kamungkinan para perantau Minang dari
negara-negara lain saparati dari Singapura juo akan bagabuang dalam rombongan
USA ko. Sekedar sabagai catatan, salamo di Ranah para perantau ko
baniaik akan maagiahkan bantuan a la kadarnyo langsuang ka nagari asa
masiang-masiang. Kalau usaho ko barhasil, direncanakan kagiatan ko bisa
dilangsuangkan sacaro berkala.
Saran-saran untuak MAPPAS.
Supayo MAPPAS dapek mancetak ulang buku-buku nan bakaik jo sejarah
Minangkabau , saparati: 1) buku 'Sejarah Minangkabau" karangan Drs MD Mansur,
Dra Asmaniar Idris, Drs Amrin Imran dkk, tahun 1970; 2) buku foto
'Minangkabau' nan disusun dek Sanak Ed Zulverdi dan ditabikkan dek Gebu Minang
tahun 1993, dan ditambahkan foto-foto tantang urang Minang di parantauan.
Supayo dapek dibuek DVD tantang obyek wisata Sumatera Barat, nan diagiah
penjelasan dalam bahaso Inggeris, sabagai bahan pemasaran.
Penjelasan tantang ABS SBK. Tanyato para sanak kito di Amrik tatap baminat
untuak mangatahui pakambangan kaminangkabauan, tamasuak tantang ABS SBK, nan
sudah tantu ambo sambuik jo sanang hati. Saparati kito katahui basamo, masalah
ABS SBK ko samo sakali indak manyangkuik jo soal ibadah saparati soal rukun
iman atau rukun Islam, tapi labiah banyak manyangkuik soal duniawi/ muamalah,
saparati hukum perkawinan, hukum kekerabatan, dan hukum waris, dimano akar
masalahnyo talatak pado adonyo perbedaan antaro sistem kekerabatan matrilineal
nan diajakan adat Minangkabau jo sistem kekerabatan patrilineal --atau
parental-- nan diajakan Islam. Dalam adat Minangkabau ko masalah pokok nan
salalu muncul adolah soal sako dan pusako.
Dalam maagiah penjelasan, supayo otentik ambo sampaikan inti makalah
Angku Bachtiar Abna SH MH dan makalah Ananda Dra Rahima Rahim MA, nan
baliau-baliau paparkan dalam semiloka Komnas HAM di FH Unand bulan Juni nan
lalu. Inti dari kaduo makalah iko adolah bahaso baiak dalam sistem nilai maupun
dalam pelaksanaannyo dalam kehidupan memang alun bisa lai dipatamukan antaro
ajaran adat Minangkabau jo ajaran Islam, apolagi untuak dipasatukan. Hal itu
bapangaruah taradok susahnyo mancari pasamoan paham tantang ABS SBK ko. Kapado
Adinda Ajoduta alah ambo email kaduo makalah tasabuik, dan dek baliau alah
ditaruihkan pulo kapado paminat-paminat nan lain.
Baiak badasar hasil semiloka di Padang tasabuik, maupun badasar wacana
ambo jo Angku Azmi Dt Bagindo di RN nan taganang tu, ambo manyampaikan bahaso
sacaro pribadi ambo bapandapek -- paliang indak untuak samantaro -- indak
paralu ditaruihkanlai usaho untuak manyusun SATU kompilasi hukum ABS SBK tu.
Aratinyo duo jinih pamahaman taradok ABS SBK ko bialah dibantuak manjadi DUO
versi ABS SBK, nan bisa jalan surang-surang, dan antaro kaduonyo bia
bakompetisi sasuai jo ajaran Islam tantang 'fastabiqul khairaat'. DUO mazhab
ABS SBK nan bisa dikambangkan surang-surang tu adolah 1) ABS SBK MAZHAB RANAH
nan labiah gadang pangaruah norma adat Minangkabau daripado ajaran Islam, dan
2) ABS SBK MAZHAB RANTAU nan labiah gadang pangaruah agamo Islam daripado
ajaran adat. [Tantu sajo tiok urang buliah mamilih ABS SBK ma nan cocok di
pahamnyo. Sanak di Ranah sacaro pribadi bisa manganuik ABS SBK MAZHAB RANTAU,
dan sanak di Rantau tantu sacaro pribadi bisa manganuik ABS SBK MAZHAB
RANAH].
Untuak manyusun ABS SBK MAZHAB RANTAU ko ambo alah mandorong pengurus
MinangUSA untuk maambiak prakarsa. Apolagi ado urang awak nan manjadi WN
Malaysia nan bamukim di Washington DC - Dr Djamaluddin, sosiolog- nan baminat
untuak malakukan panalitian soal ABS SBK ko. Sacaro pribadi ambo ingin sato
sakaki manyusun ABS SBK MAZHAB RANTAU ko, tantu dalam bidang nan ambo kuasoi.
Sampai di siko lah dahulu.
Wassalam,
Saafroedin Bahar
---------------------------------
Sick sense of humor? Visit Yahoo! TV's Comedy with an Edge to see what's on,
when.
--~--~---------~--~----~------------~-------~--~----~
===============================================================
Website: http://www.rantaunet.org
===============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email besar dari >200KB akan di banned, sampai yang bersangkutan
menyampaikan komitmen akan mematuhi Tata Tertib yang berlaku.
- Email attachment, DILARANG! Tawarkan kepada yang berminat dan kirim melalui
jalur pribadi.
===============================================================
Berhenti (unsubscribe), kirim email kosong ke: [EMAIL PROTECTED]
Webmail Mailing List dan Konfigurasi keanggotaan lihat di:
http://groups.google.com/group/RantauNet/subscribe
Dengan terlebih dahulu mendaftarkan email anda pada Google Account di:
https://www.google.com/accounts/NewAccount
===============================================================
-~----------~----~----~----~------~----~------~--~---
