Waalaikum salam, wr, wb. Dunsanak kasadolahe di salapan pinjuru angin, ketek indak basabuik namo gadang indak baimbau gala, salam jo sambah manyampaikan. Satantangan rundingan atau informasi nan disampaikan dek dunsanak kito Sutan Bandaro Labiah, urang nan memang banyak kalabiahannyo tu, urang nan arih bijaksano, muluik manih kucindan murah, nan suko bagurau di udaro, di RRI Bogor AM 1242 dan FM 93,75 untuak saputaran JABOTABEK nan alah sukses maadokan Acara Bagurau di Udaro Manjalang Puaso baru2 ko, masih hangek taraso acara tu. Apolai diisi dek penyanyi senior seperti Mak Uncu Rustam Raschani nan terkenal jo lagunyo TARAPUANG-APUANG tu, Yunus Chan dan lain sebagainyo dengan permainan KIM nyo nan marupokan kesenian bagurau dalam lagu.
Oleh karano itu pulo, kami rang Minang nan ado di Palembang, indak pulo namuah katinggalan. Tadi malam (Sinayan, 10 September 2007), kami rang Minang di Palembang baralek gadang sahubuangan dengan Bapak Katuo kami BMKM Sumsel, Yth angku H. Syahrudin Ismail Dt.Bagindo Malano maadokan walimah (kecek rang Jawo, ngunduh mantu) ateh pernikahan putra beliau nan tantara tu nan banamo Lettu Inft. Thomas Rajunio Syahhery Iskamwijar,B.S jo surang Mojang Sumedang (Juaro I tahun 2002) dan pernah manjadi Putri Pariwisata Jawa Barat tahun 2004 nan banamo Ni A Herlina,A.Md nan acara pernikahannyo dilaksanakan beberapo bulan nan lalu di Kota Sumedang. Dek karano putra angku datuak tu mandapek tugeh baraja tambahan ka Australia (Royal Australian Infantry - Regimental Officer Basic Course) salamo +/- 2,5 bulan salapeh acara nikah tu, tapaso rencana walimah atau ngunduh mantu di Palembang nan samulo dijadwalkan pado akhir bulan Juni nan lalu diundur ka tanggal nan ambo sabuik diateh atau tadi malam. Acara nan cukuik spektakular, untuak hiburan sangajo didatangkan artis kondang dari Sumatera Barat seperti : Mak Lepoh, Mak Itam, Fitri nan dari Padang Panjang dan grup saluang, rabab dan bansi "Parewa Limo Suku" - Padang dari Padang. Acara baralek gadang tu diadokan di Gedung Serba Guna PT.Pusri Palembang dengan dihadiri oleh pejabat tinggi Pemerintahan, Sipil maupun Militer, anggota Dewan, Pengurus Sriwijaya FC beserta pelatihnya Rahmad Darmawan, Ketua Umum DPP SAS beserta rombongan, Walinagari Sulit Air dan urang Minang sakota Palembang. Dek karano tampek terbatas, gaduang Serba Guna Pusri nan hanyo bisa manampuang undangan kurang dari 1.000 urang. Mako itu tadi malam tu hadir labiah dari 900 urang undangan. Sabalun acaro resmi dimulai, sasuai tradisi nan balaku di Tantara, mako diadokan acara Pedang Pora, acara nan dibuek oleh rekan-rekan perwira nan sakorop jo mempelai pria untuak malapeh abangnyo ka pelaminan.. Kato sambutan dari kaduo pihak kaluarga, disampaikan oleh Bapak Wakil Gubernur Sumsel Bpk. Prof. Dr. H. Mahyudin.N.S, Spog. Bapak Gubernur Sumsel Ir. Syahrial Oesman, MM Tuanku Bagindo Basa nan Kayo nan dicanangkan akan mambari kato sambutan dari pihak tamu undangan, dek karano beliau mandapek tugeh nagara barangkek ka ibukota sarato bapak Walikota Palembang Ir. H. Edi Santana Putera Sutan Rangkayo Basa Batuah baitu pulo, mako sambutan dari pihak tamu disampaikan oleh Kabanpora Propinsi Sumsel Bpk Dr. H. Aidit Azis. Pado sesi acara hiburan, Mak Lepoh jo Mak Itam mandendangkan sabuah lagu non kocak dan dilanjuikkan jo Fitri sabuah lagu nan merdu "Pasan Mandeh". Sasudah itu, Sanggar Carano nan marupokan sanggar dibawah asuhan Ibu Hj. Herawati Syahrudin (rangtuo mempelai pria) mempergelarkan sendra tari kolaborasi antaro Minang jo Sunda. Ado ampek tarian nan ditampilkan dek Sanggar Carano ko nan personilnyo di bantu dek tim kesenian nan dari Padang dan Padang Panjang tu. Penonton terkesima mancaliak penampilan dari anak2 sanggar Carano ko, seakan wakatu indak taraso alah hampia jam satangah sapuluah malam, Urutan tarian nan ditampilkan tu adolah : Tari Indang, Tari Piriang dolak dolai, Tari Jaipongan dan Tari Sarompak. Dek karano wakatu juo, tapaso acara hiburan dihantikan dan ditaruihkan pembacaan doa dan foto kenangan, tapi angku Datuak Bagindo Malano akan manyambuang acara hiburan ko baliak malam ko (Silasa, 11 September 2007), acara hiburan dari artis nan dari Sumatera Barat ko di Gedung Serba Guna SAS Palembang di Jl. Penyaringan Air-Lemabang Palembang (subalah kantua angku Datuak Bagindo Malano) mulai sasudah sholat Isya sampai salasai. Acaro memang diperuntuakkan oleh Kaluarga angku Datuak Bagindo Malano untuak masyarakat Minang di Kota Palembang nan indak bisa hadir pado acara walimah tadi malam. Paralu kami informasikan bahwa pelaminan nan dipakai adolah pelaminan dari SAS Wanita Palembang nan baru dibali dari Bukittinggi setahun nan lalu, sedangkan sanggar Carano adolah sanggar milik keluarga angku Datuak Bagindo Malano dengan merekrut beberapo sarjana seni dari STSI untuak pemusik maupun pelatih tari. Kapado dunsanak nan berdomisili di Kota Palembang, silahkan datang malam baeko untuak menyaksikan kekocakan Mak Itam dan Mak Lepoh dan merdunyo suaro Fitri sarato diselingi jo Rabab, Bansi, Saluang dan kesenian tradisional Minang lainnyo. Tantunyo diiringi dek musik hiduik dari sanggar Carano. Itulah kaba nan dapek ambo sampaikan, pasai pulo jari-jari tangan mangetik kato2 nan tatulih diateh. Mohon maaf kalau ado kato2 ambo nan tadorong, jangga dan salah nan indak singajo. Dek bulan puaso alah diambang pintu, bari maaf lah ambo. Sabalunnyo ambo alah mambari maaf dunsanak kasadoalahe. Wassalam, HM Dt.Marah Bangso (50+) Dari internet rumah (sadang istirahat siang) > Assalamu'alaykum w.w. > > Kapado Niniiak jo Mamak, Alim Ulama , cadiak pandai, Bundo Kanduang > sarato nan Mudo, indak ambo sabuk namo ciek-ciek, indak ambo imbau gala > surang-surang > > karano badan taraso panek > wakatu pulo nan indak taeco > kaba dari ambo nan talambek > kini baru bisa bacarito > > satangtangan "Bagurau Manajalang Puaso" nan diadokan kapatang tu, tgl > 5September 2007, Alhamdulillah lai bajalan baiak, aman, ndak ado galeh > nan pacah,a ratino lai indak ado nan basitangka, indak ado basigaduah > doh, sabana taraso kalau acara tu adolah acara awak basamo, disampiang > itu iyo indak pulo ado kato sambutan dari "panitia", karano awak manggap > iko adolah acara awak basamo > > bamulo-i acara jan satangah lapan, jo lagu-lagu Pop Minang, sasudah tu > tapek pukua salapan, langsuang ON AIR malalui FM 93,75 jo AM 1242 > > acar dibuka pukua salapan jo jo pambukaan Baguaru Di Udaro, langsuang > disambuk jo saluang "Singgalang", sasudah itu basambuang pulo jo > palayaran, sambia ciloteh bantuak di palanta bana, sakiro alah cukuik > tigo ampek dendang saluang, mako dialiah pandangaran ka Lagu POP Minang. > Alhamdulillah Penyanyi (artis) Minang nan tampil malam tu lai nan > boneh-2 pulo, alah masuak dapua rekaman umumno, tamasuak panyanyi senior > Rustam Raschani , Yunus Chan > > Kok mancaliak masyarakaik nan tibo, batambah laruk malam, batambah rami, > iyo sabana sanang hati dibuekno, karano kuris 1000 labiah nan > disadiokan, iyo indak cukuk doh, labiah banyak pulo nan tagak pado nan > duduak, sampai ado nan mangatokan, indak amuah dibuek acara disinan lai > doh, tapaso pindah tampaik, saindak-indakno bantuak tgl 14 April > kapatang tu, dibuek di halaman Balai Kota, buliah agak lapang saketek, > indak bagajipik sarupo kini kok doh, Kajawek dari ambo wakatu itu > adolah, : nan kini ko gurau salek, nan gadang kito buek maso katibo > > Kutiko uncu Rustam Raschani mambaokkan lagu Gamad dan lagu > Tarapuang-apuang, bi basorak kasadono, baitu pulo wakatu main KIM, nan > katuju bana di urang adolah mandangakan dendang KIM tu, kalau nan peres > iyo indak jadi tujuan utamo doh > > Indak tantu na kadisabuk lai, kalau mancaliak situasi kapatang tu, > sabana taubek jariah jo panek jadino sabalunno > > kalau nan klasik kalua pulo Rabab jo saluang sarato gandang, lah pukua > ampek baru salsai acara. > > ragam masayarakaik nan tibo, iyo mulai dari nan manggaleh di kaki limo, > sampai ba toko gadang, baitu pulo nan pangkaik dari bawah, sampai ka > mayjend, dari pagawai randah, sampai pagawai tinggi, niniak mamak nan > gadang basa batuah, cadiak pandai, tamasuak pulo "bundo kanduang", apo > lai nan mudo-2, lah bacampua kasadono, lapeh sagalo pangkaik jo jabatan, > lapeh sagalo gala kesarjanaan, babaua kasadono, > > sambia mandanga lau jo dendang, buliah pulo malapehkan salero, nak ka > makan martabak mesir, sate, katupek, sampai ka lamang jo tapai, sari > kayo jo lapek bugih lai tasadio, indak katinggalan TEH Talua, > > tagah dek indak pandai manyampaikan > mungkin sakitu sajo caritono > mako bantuak si bisu barasian, > takana lai takatokan tido > > pado kasampatan kini ko, ambo manyampaikan tarimo kasi banyak kapado > niniak mamak, cadiak panda, alim ulama, "bundo kanduang", urang mudo, > nan alah sato mansuksek acara kapatang tu, baiak dukungan moril maupun > materi, baitu pulo nan lah datang, sarato nan lah mandangakan di radio > > limbak nan dari pado itu, maaf pulo nan basampaikan, karano ramino > umaik, jiko datang indak tasapo, tasapo lai indak tapabasoi, kok lai > bana tapabasoi tapi indak tabaok duduak, nyampang lai tabaok duduak tapi > indak tabari minum jo makan, sakali lai rilah jo maaf nan bamintak > > wasssalamu'alaykum w.w. > > Bandaro labiah --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti (unsubscribe), kirim email kosong ke: [EMAIL PROTECTED] Webmail Mailing List dan Konfigurasi keanggotaan lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di: https://www.google.com/accounts/NewAccount =============================================================== -~----------~----~----~----~------~----~------~--~---
