Kato urang tuo-tuo, karajo tukang batu ijan sampai dikakok dek tukang kayu. Indak ka salasai, picayolah!
Kato agamo, sagalo karajo mustilah dikakok dek urang nan ahlinyo. Kalau indak, mako tunggu se lah kahancurannyo. "Kini, ambo caliak lah bacampua se galamai jo cik kudo. Ado pulo kini polisi jadi-jadian manangkok kayu." Baitu Kari Garejoh mamulai ota di lapau Uwo Pulin pagi kapatang. Tantu sajo banyak urang di lapau tu nan maraso heran. Indak jaleh, apo nan dimukasuik dek Kari. Apolai, inyo manyabuik-nyabuik istilah 'polisi jadi-jadian'. Kinilah urang-urang tu mandanga istilah saroman itu. Kalau nan biasonyo, salain polisi sabananyo, ado istilah polisi hutan, polisi aia atau polisi gadungan. Tapi kini, istilah polisi jadi-jadian, tantu sajo ado nan baasumsi samo jo hantu jadi-jadian. Sudah tu ado pulo istilah Kari 'bacampua galamai jo cik kudo'. "Indak jaleh dek ambo, apo nan Kari mukasuik ko, ha?" Tanyo Udin Kuriak. "Eyayai..., bacolah surek kaba 'Singgalang' ko. Ijan dibaliak-baliak se. Iko kan ado barita anggota satpol pe-pe manangkok kayu dikapuang dek urang banyak. Apo indak samo jo polisi jadi-jadian dek Udin? Karano, iko indak karajo inyo lai nan dikamehinyo, tapi lah karajo polisi. Tapi kalau ado rumah indak pakai i-em-be, atau urang manggaleh di di ateh trotoar, itu memang iyo urusannyo inyo. Ko indak, karajo inyo indak salasai, tapi karajo urang lain dikakok pulo. Apo indak bacampua galamai jo cik kudo namonyo tu?" Baitu jawek Kari sambia manjalehan, apo bana nan inyo mukasuik. Bajadi-jadilah ota urang di lapau tu. Baa ka indak? Barita 'Singgalang' soal pol-pe-pe manangkok kayu adolah nan kaduo kalinyo, dan kaduonyo samo-samo baliak awah panabangan. Partamo pai manangkok kayu da Simpang Akirat Kuranji. Disangko ado kayu ilegal, tapi nyatonyo cuma duo kabek kayu api. Walau mancubo mambao kayu nan ado di kadai urang, tapi kudian tapaso diturunkan baliak dari ateh oto, dek ulah indak ado surek tugas. Kini, kajadiannyo masih dalam kawasan Kuranji, pai manangkok kayu tangah malam aniang, tapi dilalah dek urang kampuang. Itu dek ulah indak mangarati jo apo nan musti dikarajokannyo. "Jadi, batua kato agamo awak, kalau suatu karajo dikakok dek nan indak ahlinyo, mako kahancuran akan tibo. Tu, mah, ijankan kayu nan dapek, malah awak dilalah dek urang banyak," kato Kari baliak. "Satuju ambo jo istilah Kari. Karajo mustilah jo ahlinyo. Manangkok kayu maliang atau kayu ilegal indak karajo pol pe-pe gai tu doh, tapi karajo polisi sabananyo, bukan karajo polisi jadi-jadian bantuak istilah Kari tadi," salo Tan Baro. "Si kuduang dapek cincin, mah, Tan!" Sorak Pak Osu sato sakaki. "Atau pol pe-pe nio jadi anggota polisi sabananyo, ndak?" potong Angah Piyan. "Buliah-buliah se tu nyo, kalau lai manuruik prosedurnyo. Masuak sikola polisi dulu. Manga jadi polisi, jadi komandan polisi sabananyo bisa isuak, kalau lai manuruik jalannyo," jawek Tan Baro. "Tapi, sarancaknyo, karajoan se lah apo nan jadi tugas awak. Ijan ditabeh pulo parak urang lain. Apolai, kalau karajo awak indak salasai, sudah tu karajo urang lain dikakok pulo. Apo indak malu, tu?" kecek Kari baliak nan disambuik jo angguak kapalo dek kawan-kawannyo dalam lapau. Espe St.Soeleman (Singgalang OnLine) --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Jika anda, kirim email kosong ke >>: berhenti >> [EMAIL PROTECTED] Cuti: >> [EMAIL PROTECTED] digest: >> [EMAIL PROTECTED] terima email individu lagi: >> [EMAIL PROTECTED] Webmail Mailing List dan Konfigurasi keanggotaan lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di -~----------~----~----~----~------~----~------~--~---
