"Ikolah urang maliang, samo bana jo pancilok!" Kato Kari Garejoh nan sadang duduak sambia marokok di lapau Uwo Pulin.
"Namonyo urang maliang, tantu iyo pancilok! Lah batele Kari nampek di den," baleh Ajo Tondeh. Baitulah gambaran suasana ota lapau Uwo Pulin pagi kapatang. Namonyo hari libur, tantu banyak se masalah nan jadi bahan ota. Mulai dari isi barita surek kaba sampai ka carito-carito lapeh lainnyo. Kari maosong ota bantuak itu sasudah mambaco barita surek kaba 'Singgalang' Minggu. Di situ ado barita utamonyo bajudul 'Benda-benda Cagar Budaya Dicuri'. Manuruik pandapek Kari, kini ko indak pitih jo ameh sajo nan jadi incaran urang maliang. Samakin hari, samakin banyak se urang di nagari ko nan kailangan oto, sepeda motor, kabau, jawi, kambiang, ayam, itiak sampai maliang urang. "Nah, kini barang-barang basejarah nan diciloknyo. Apo indak katalaluan namonyo tu? Di maa latak utak urang maliang tu, tu?" "Namonyo se urang maliang, pasti utaknyo duo. Ciek di kapalo dan nan ciek lai di ampu kaki. Utak di kapalo gunonyo untuak maatur strategi, di maa urang lain indak tau jo karajonyo. Malah, utak di kapalonyo tu labiah hebat pulo dari patugas. Buktinyo, ado gai rumah polisi kanai maliang, rumah tantara juo dirapunnyo. Sadangkan utak nan di ampu kaki tu, indak paralu bapikia. Kalau aman kato utak di kapalo, inyo lansuang se bajalan ka sinan. Indak paduli itu rumah polisi, rumah pajabaik. Juo indak paduli nan dimaliangnyo tu pitih infak musajik, harato anak yatim, oto karidik atau benda-benda basejarah nan sarupo dalam barita surek kaba ko," kecek Tan Baro pulo. "Nan anehnyo, ado pulo barang-barang basejarah tu dimaliangnyo, tapi dituka jo nan palasu. Kalau lah bantuak itu, tantu sejarah nagari awak ko juo palasu," kecek Kari baliak. "Tapi alah ambo katokan tadi. Urang maliang tu indak ka pernah gai bapikia bantuak itu doh. Nan tapikia dek inyo, baa bisa dapek pitih banyak. Indak karajo babulan-bulan atau bataun-taun bagai, tapi bisa bapitih banyak. Kan awak lah samo tau, barang-barang paninggalan sejarah tu maha haragonyo? Kan juo awak pernah mandanga urang mancari barang-barang antik? Malah, pitih limo rupiah saisuak, bisa dibalinyo ribuan rupiah. Baitu, mahanyo barang-barang antik dan barang basejarah tu," baleh Tan Baro. "Kalau bantuak itu kajadiannyo, ambo punyo usul. Sakalian benda-benda basejarah nan ado di museum atau di tampek-tampek lain sarancaknyo diuji baliak kaasliannyo. Mano tau, barang-barang nan ado di museum siko juo lah batuka jo nan palasu," tibo-tibo Angah Piyan mangaluakan pandapek. Agak boneh ide Angah sakali ko. "Wah, lah tambah hebat se Angah kini mah!" sorak Tacin. "Hebat baa?" "Usul atau ide tadi tu sabana cemerlang manuruik ambo. Karano, alun tadanga ado usul saroman itu dari pajabaik atau dari wakia rakyaik bagai. Nan ado hanyo pajabaik nan manyuruah awak manjago dan malestarikan benda-benda basejarah tunyo," kato Uncu Labai pulo. Samakin ramilah ota di lapau tu soal karajo urang maliang nan sabana pancilok. Utak urang maliang tu sabana ka ampu kaki. Barang-barang nan jadi bukti sejarah di nagari awak jio diciloknyo. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---
