Parintang rintang patang jo ota-ota dilapau Minang Singgalang. -------------------------------------------------------------------------------
Pagi kapatang, lapau Uwo Pulin dapek tamu baru. Walau baru, namun samaso Uwo balapau di Tunggua Hitam, urang tu dulunyo lai pernah manjadi palanggannyo. Namonyo Malin Kacindin. Inyo tingga dakek pasia di daerah Aia Tawa. Karano itu pulolah, barangkali dulunyo Malin Kacindin acok pai minum ka lapau Uwo di Tunggua Hitam. "Ha...., mancogok Malin kini, mah!" Sapo Udin Kuriak nan baru masuak lapau. Malin Kacindin hanyo bisa tagalak sengeang. Karano, tanyo-tanyo saroman itu tadinyo juo kalua dari muncuang Tan Baro, Kari Garejoh, Uncu Labai sarato Angah Piyan. Malah, Uwo tadinyo mangatokan Malin barasian, jauah-jauah bana pai minum. "Kabatulan, ambo pai mancaliak kamanakan nan tingga di Taruko. Nah, sabalun ka sinan, takana dek ambo lapau Uwo ko. Ciek lai, ambo iyolah rindu bana jo kawan-kawan," jawek Malin. "Baa kaba di tampek Malin?" Tanyo Udin baliak. "Ah, biaso-biaso se. Sarupo taun-taun lapeh, kini kami juo sadang dikaja hantu," jawek Malin. Kontan sajo ado nan takajuik mandanga kato dari Malin tadi. Baa ka indak? Lah bantuak iko majunyo teknologi, masih banyak juo urang nan picayo jo hantu. Apolai, urang-urang tu tingga di kota gadang, indak di kampuang bantuak zaman saisuak. "Hantu lunak? Hantu kareh?" Tanyo Uncu Labai. "Indak aki oto doh, Ncu! Aki oto iyo pakai aia kareh aia lunak bagai. Nan dikatokan Malin tadi tu adolah hantu," potong Kari Garejoh. Urang-urang tu tagalak. "Bukan hantu lunak dan indak pulo hantu kareh. Kami kini ko sadang dihantui dek angko 23," kato Malin. Tantu sajo jawek Malin mambuek kawan-kawannyo binguang. Kini pulolah baru tadanga ado urang nan takuik jo angko-angko. Nan pernah tadanga cuma sial tigo baleh dan itu balaku di etnis tatantu di nagari ko. "Carito bonehlah nan ka dibao ka mari, Malin! Kami sangko Malin batambah cadiak tingga dakek ka paguruan tinggi, tapi tambah ongok taraso dek ambo. Kini pulolah kami mandanga ado urang nan takuik jo angko," kato Tan Baro. "Batua, Tan! Nan ambo katokan tu sabana kajadian. Sajak duo pakan ko kami sabana takuik jo 23, yaitu tanggal 23 Desember barisuak ko ha," kecek Malin. "Baa tu?" Tanyo Tan Baro. "Sajak duo pakan ko ado kaba bahaso tanggal 23 Desember barisuak ka tibo gampo gadang. Dek gadangnyo, gampo tu mambao sunami pulo. Nah, sia nan indak takuik mandanga kaba saroman itu? Kami tingga dakek jo lawik. Kok urang-urang di siko iyo lai aman dari sunami. Tapi, sungguah pun baitu, ambo raso takuik juo kanai gampo," kato Malin mampajaleh apo nan dikatokannyo tadi. Baru paham Tan Baro sarato kawan-kawannyo bahaso nan dimukasuik Malin Kacindin adolah isu-isu nan katonyo dari pakar gampo di lua nagari. Padohal, di surek kaba 'Singgalang' lah puluahan dan bahkan ratusan kali dibaritakan, gampo indak bisa diprediksi dan juo indak bisa diramal. Alun ado sampai kini alaik canggih nan bisa mangatahui bilo gampo jo sunami tu tibo. Nan ado hanyolah pakakeh untuak maukua kakuatan gampo. Kalau gampo bakakuatan tatantu bisa mambao sunami. Dek itu pulo, pamarentah basamo-samo lembaga nan mambidangi gampo jo para ahli hanyo bisa mamintak supayo saluruh urang waspada. Kalau tibo gampo, sugiro sajo lari kalua rumah. "Malin. Kecek para ahli, gampo tu indak bisa diramal-ramal. Inyo bisa tibo bilo dikahandaki dek Tuhan. Karano itu, rancak awak waspada se, dan basarah diri ka Tuhan. Kalau ado nan mangatokan tibonyo tanggal 23 atau tanggal baraa sajo, ijan dipicayo bana. Bisa-bisa itu hanyo isu urang maliang. Ijan jadikan pulo tanggal 23 tu hantu lai. Tolong katokan ka jiran-jiran Malin, nan paralu waspada se," giliran Angah Piyan nan mangecek sambia maagiah saran ka konco lamonyo tu. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---
