Maliang Kelas Barek
Kari Garejoh geleang-geleang kapalo surang sasudah mambaco barita surek kaba ‘Singgalang'. Sabananyo tadi Kari indak ado niaik untuak mambaco barita di halaman partamo, karano kabiasaannyo adolah mamulai mambaco barita dari halaman olahraga. Cuma sajo, sakali ko inyo tapadayo dek judul barita utamo: ‘ATM BCA Digondol Maling'. Indak tapikia dek Kari bahaso ATM nan bareknyo mungkin labiah duo ton bisa dek urang maliang mambaonyo. “Iko pastilah maliang kelas barek,” gumamnyo. Ruponyo apo nan dikatokan Kari tadanga dek Tan Baro nan duduak pas di sabalahnyo. Tantu sajo, Tan Baro malengong sambia mancaliak incek mato Kari. “Ado-ado se istilah Kari mah. Tapi ambo sapakaik bahaso nan mancilok a-te-em tu adolah urang maliang kelas barek. Kalau indak hati-hati tugu Monas bisa pulo dibaonyo,” baleh Tan Baro nan disambuik jo galak dek kawan-kawannyo nan samo duduak di lapau Uwo Pulin pagi kapatang. “Ciek lai, iko urang maliangnyo pasti punyo sikola tinggi pulo. Karano, kamera paintai nan dipasang di a-te-em tu dilampoknyo, sahinggo indak tamonitor lai dek pakakeh canggih tu,” kecek Kari baliak. “Tantu iyo. Sarupo sikola, urang maliang di a-te-em tu pastilah nan tamaik es tigo. Karano inyo tau bahaso di sinan ado pitih banyak. Sudah tu, lantaran inyo tau ado kamera paintai, tantu dicari pulo aka, baa caronyo supayo kamera tu indak bisa marekam karajonyo,” baleh Tan Baro. Tambah lamo, ota soal maliang nan mairik a-te-em sabarek duo ton tu batambah angek. Karano, kajadian saroman ko baru sakali ko tajadi di siko. “Ambo manyangko, iko adolah maliang profesional nan biaso baoperasi di kota-kota gadang sarupo di Jakarta. Atau saindak-indaknyo maliang nan sadang mancubokan ilimu baru. Karano di tampek tu banyak pakakeh nan tingga sarato darah baserak-serak,” tibo-tibo Angah Piyan mancubo maanalisa siapo buayo darek nan malanyau a-te-em tu. “Itulah urang maliang. Samo jo pancilok,” kato Mak Pono pulo. “Tantulah iyo, Mak. Kalau indak pancilok, indak maliang namonyo tu doh,” potong Uncu Labai. “Kasudahannyo, awak musti baati-ati bana. Kalau malatak-an honda atau oto, sarancaknyo pastikan bana takunci balampih-lampih. Karano urang maliang tu labiah cadiak pulo dari awak,” sambuang Tan Baro. “Tapi lah dikecek-an, urang maliang tu biasonyo labiah cadiak dari awak. Inyo labiah tau bilo awak talengah dan inyo tau pulo bilo awak takalok. Dek itu pulo, ambo satuju jo kato Tan Baro, supayo awak kameh-kameh bana jo barang surang-surang. Ijan cayah!” Potong Mak Pono. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.8/1236 - Release Date: 21/01/2008 20:23 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
