Pahlawan Ketek
Pagi kapatang, surek kaba ‘Singgalang' sabana remoh dek tangan-tangan tamu lapau Uwo Pulin. Satiok urang di lapau tu nio mambaco barita rancak nan ado di laman partamo, yaitu anak es-de kelas tigo nan manamukan ampek kilo ganjo. Dek urang-urang tu, ikolah kajadian partamo salamo iduang ditampuah angok, ado anak kelas tigo es-de nan manamukan ganjo. Biasonyo, polisi sampai tabik salemo bacampua paluah dek mancari barang bukti ganjo nan disuruak-an panggaleh atau nan punyo ganjo tu. Tapi kini, sacaro indak disingajo, anak ketek tu basuo ganjo sabarek ampek kilo. Kalau ganjo sabarek ampek kilo tu dijua dek urang punyonyo barangkali bisa laku limo sampai anam juta. Tapi nan jadi pikiran dek urang-urang di lapau Uwo indak soal haragonyo doh, malainkan efek atau dampaknyo kapado pamakai. Kalau ampek kilo tu dipakai saratuih sampai ampek ratuih urang, mako sabanyak itu pulo generasi nagari ko manjadi urang tele, paniang, sampai gilo dibueknyo. “Iko, paja kenek ko patuik diagiah gala pahlawan mah. Kok indak dek wee, bisa se ganjo tu dipajua-balikan dan kasudahannyo banyak anak nagari ko nan dalang dek e,” kato Ajo Tondeh jo logat asli daerahnyo. “Kalau di Jawa, dalang ko banyak kepeangnyo mah, Jo!” Sorak Kari Garejoh. “Iyo, tapi di kampuang ambo ughang dalang lalok e di tapi jalan. Kadang-kadang banyak pulo nan indak babaju ilie-mudiek. Kadang-kadang manari-nari bagai di tangah ujan labek, atau balagu-lagu sughang je ndak tantu ojok,” baleh Ajo. Apo nan dikatokan Ajo tu batua. Dek ulah ganjo atau narkotika lainnyo memang bisa mambuek urang tele, pesong sampai gilo. Apolai kalau dalam wakatu-wakatu tatantu, namuah mambunuah mande dibueknyo. Karano itulah pamarentah malalui patugas polisi indak main-main jo paredaran barang haram tu. Kalau ado nan manjua, manjadi agen sampai nan mamakai, didaram abih. “Kalau bantuak tu, ambo raso paja ketek tu patuik pulo diagiah hadiah. Saandainyo ambo jadi komandan polisi atau katua Badan Narkotika di siko, lansuang se ambo antaan hadiah ka anak tu mah. Kalau kondisi kaluarganyo kurang elok, mako ambo sikolaan inyo sampai tamaik. Baa manuruik Tan Baro, tu?” Giliran Angah Piyan nan mangaluakan pandapek. Tan Baro nan ditanyo bantuak itu cuma bisa maangguak sambia galak manih. Sudah tu, tampak inyo mampaelok-i duduaknyo. “Sarancaknyo memang bantuak itu. Salaku pamimpin, awak musti konsekwen. Kalau nan basalah dihukum, tapi nan lai punyo prestasi diagiah hadiah. Apolai, ambo baco di barita tadi tu, anak ketek nan manamukan ganjo tu cuma tingga jo neneknyo dan kasannyo dari kaluarga kurang baruntuang juo,” kato Tan Baro. “Kalau alun tapikia dek pihak-pihak takaik untuak maagiah hadiah, bialah kini awak agiah je gala ka anak kenek tu sabagai pahlawan. Bak kecek wak den tadi, kok indak dek wee, indak ka basuo gai ganjo sabanyak itu doh,” kato Ajo baliak. “Tapi, ambo juo kuatir jo kasalamatan anak tu,” potong Uwo. “Baa, tu?” Tanyo Ajo. “Santano urang punyo tas barisi ganjo tu tau bahaso barangnyo basuo dek anak ketek, tantu kasalamatannyo tarancam pulo,” Uwo manjalehan karagu-raguannyo. “Makonyo, itu juo tamasuak tugas polisi, maagiah raso aman ka anak ketek tu sarato kaluarganyo. Jo caro iko, ambo raso bagian dari panghargaan ka inyo,” solang Tan Baro. Samo-samo tamanuang urang di lapau tu. Karano, surang anak ketek nan baumua sapuluah taun, lah bisa manyalamaik-an ratusan anak mudo di nagari ko. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.9/1238 - Release Date: 22/01/2008 20:12 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
