Pak Harto di Lapau Uwo
Tibo-tibo se lapau Uwo Pulin rami siang sampai malam kapatang. Pamandangan nan indak biaso salamo ko, saluruh komunitas lapau tu langkok di sinan. Ciek lai, surek kaba ‘Singgalang' saolah-olah indak jadi bahan bacaan lai. Kasadonyo mato tatuju ka tipi ukuran 24 inci nan talatak di dindiang. Malah, urang-urang tu labiah banyak anok daripado mangecek. Rono muko urang-urang tu rato-rato sadang sadiah. Baitulah suasana di lapau Uwo. Ruponyo kamatian bakeh presiden awak, Pak Suharto juo mambuek sadiah urang-urang di lapau Uwo. Dek Tan Baro sarato kawan-kawan di lapau tu, jaso Suharto sabana gadang. Walau banyak urang nan maujat atau berang ka inyo, tapi saluruh palanggan lapau Uwo Pulin hari kapatang tu manyadari, Pak Harto sabana Bapak Pambangunan. Karano, di maso Pak Harto-lah pambangunan manjadi-jadi, mulai dari pambangunan bidang patanian sampai ka bidang industri. Samaso Pak Harto manjadi presiden, urang tani lai indak susah bana iduiknyo doh. Padi jo bareh lai bisa dijua, karano indak banyak impor dari lua nagari bantuak kini. Dalam bidang pandidikan nan labiah bana. Rumah sikola dibuek sampai ka daerah-daerah nan alun ditampuah roda. Pak Harto katiko itu nio kasadonyo anak bangsa ko basikola. Dek itu pulo, anak-anak urang bansaik nan lai punyo prestasi diagiah beasiswa. Kok bidang kesehatan baitu pulo. Tampek baubek dibangun sampai ka desa-desa. Salain Puskesmas ado pulo namonyo be-ka-i-a dan ado pulo Puskesmas pambantu. Alun lai pambangunan pasa Inpres. Pasa-pasa nagari nan dulunyo buruak-buruak, dibuek-an jadi rancak. Ado kios dan ado pulo los nan representatif kato urang kini. Walau urang-urang di lapau Uwo rato-rato pangangguran atau indak punyo karajo tatap, tapi salalu mangana jaso Pak Harto. “Ambo jujur se, kok indak dek Pak Harto nan jadi presiden dulunyo, barangkali ambo ko pe-be-ha. Karano rumah urang gaek ambo jauah tasuruak dan indak bisa ditampuah roda. Udin kan lah pernah pai ka rumah urang gaek ambo. Awak musti manyubarang batang aie dulu, sudah tu manampuah jalan satapak sarato pamatang sawah. Untuang se pamarentah Pak Harto katiko itu mambangun rumah sikola Inpres di tampek ambo tu, mako di sinanlah ambo sikola dulunyo,” kato Kari Garejoh nan biaso tasabuik induak karengkang. “Samo wak mah. Dulu pasa di kampuang ambo namonyo pasa ambek-ambek. Indak ado gai kios. Tapi, dalam pamarentahan Pak Harto, pasa tu dijadikan pasa Inpres,” kato Mak Pono pulo. Hanyo itulah suaro nan kalua dari komunitas lapau Uwo. Kasadonyo samo-samo laruik jo parasaan ibo. Kini, Pak Harto lah bajalan untuak salamo-lamonyo. Sagalo jasonyo pasti dikana dek banyak urang. Kalau pun Pak Harto punyo salah, dalam pikiran Tan Baro jo kawan-kawannyo adolah wajar. Karano baliau adolah manusia biaso. “Kini bantuak itu se lah dunsanak kasadonyo. Wak maafkan kasalahan Pak Harto. Lai satuju....?” Sorak Tan Baro. “Satujuuu!” Jawek urang-urang tu sarantak. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.13/1246 - Release Date: 27/01/2008 18:39 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
