TANYO DI BARANDO
Dirangkai gurindam disusun kato
Bababungkuih dalam carano
Lahie nyo di anta ka barando
Batin ta unjuak ka nan basamo
Niniak mamak angku nan tuo
Urang nan cadiek candokio
Nan manjunjuang adat jo limbago
Warisan niniek pusako lamo
Ka pai tampek batanyo
Ka pulang tampek babarito
Ba hati tanang ba lapang dado
Hiduik aman batin saleso
Nan bak baringin ditangah koto
Daun rimbun ba batangnyo gampo
Pucuak malepai awan mego
Urek ta hunjam ka pitalo
Dahan rampak bak bungo rayo
Aka manajala sa antero
Buliah basanda di batangnyo
Tungguanyo tampek baselo
Hulubalang jo panglimo
Parik dalam pagaran kokoh
Tunggak adat sandi andiko
Urang nan arif bijaksano
Takilek ikan di kualo
Lah tantu jantan jo batino
Ikan takilek jalo tibo
Santan lah pacah di balango
Pangawal adat jo budayo
Mamacik karih jo sanjato
Ba mato sirah busuang dado
Malam batanggang siang jago
Nan tau di bateh jo hinggo
Parik rampak paga talando
Dima sumber marabahayo
Baliau salangkah lah di muko
Taruih kapado alim ulamo
Suluah bendang bagai palito
Di dunia tarang mancayo
Ka akhirat bendangnyo nyato
Tagaknyo rintang ba pidato
Duduak jo kitab bacamin kaco
Mahituang hala haram jo doso
Mangaji rahmat jo pahalo
Taruih ka pado bundo bundo
Sa ibarat paga jo bungo
Hiasan kampuang jo tamporo
Panyajuak hati parintang runggo
Malambuak umbuik manyimpan bijo
Amban puruak simpanan puro
Ka payuang panji ka sarugo
Ka unduang unduang di dunia nangko
Taruih kapado anak mudo
Nan capek kaki ringan tanago
Capek kaki indak malando
Ringan tangan pandai mahinggo
Tau di raso jo pareso
Pantang di suruah di sarayo
Alun di himbau nyo lah tibo
Alun di suruah lah bakarajo
Bagaikan intan jo parmato
Pamenan mandeh jo bapo
Nan manjadi harapan bangso
Pambela adat jo agamo
Nyampang di inok jo di ijo
Manimbang ateh nan ado
Maliek di ateh rupo
Tumbuah kini sarupo iko
Sapanjang tutua jo bicaro
Nan ba uraikan di ateh cako
Ba ibarat ba umpamo
Lai koh kini masih basuo……?
Ka mamak talompek tanyo….
Sabagai juru bicaro
Panyambuang lidah pambuluah kato
Urang nan tangkeh di udaro
Mako ba itu kato ambo
Nyampang di sigi jo di sigo
Di nyalangkan mato nyariangkan talingo
Kok nyampang di bukak rasio
Dicaliak lah tampak rupo
Dipandang lah jaleh rono
Lah tampak cacek jo ceno
Nan putiah kini lah lato
Lah ganjie ganjie nan tasuo
Babagai bagai nan manimpo
Parangai nan indak biaso
Kinilah jadi pandangan mato
Lupo adat lupo agamo
Malu jo sagan lah binaso
Lah abih raso jo pareso
Lah hilang sagan jo sangko
Nan tuo mato lah buto
Lah abih dayo jo tanago
Lah pakak raso talingo
Lah suntua lidah babicaro
Kok lai bana nan bakuaso
Lah bak cando garudo
Lah banyak nan kahilangan muko
Lah balungguak di “ Muaro”
Tiok bajanji tiok baduto
Di bari amanat di khianatinyo
Indak lai dapek di picayo
Sumpahlah jadi gulo-gulo
Nan mudo gilo marabo
Mangapa tinju manapuak dado
Sadonyo urang ka ba ago
Se olah-olah angoknyo duo
Nan padusi jo batino
Lah samo sajo gadih jo jando
Laki indak anak ado
Ndak tau sia apaknyo
Mabuak manggaleh jo bajojo
Siang lalok malam bajago
Dek ranggaek indak tasapo
Dek ulah pitih nangko juo
Kampuang lah hilang rono
Labuah samak jalan lah rimbo
Lah lanyah pintu tamporo
Lah bakatincak ” kumbang ka bungo “
Antah dek iko di hoyak gampo
Di hantam banjie jo galodo
Walau rasio nan Kuaso
Patuik manjadi tando tanyo……
13072012.Y.Jambak
--
--
.
* Posting yg berasal dari Palanta RantauNet, dipublikasikan di tempat lain
wajib mencantumkan sumber: ~dari Palanta R@ntauNet
http://groups.google.com/group/RantauNet/~
* Isi email, menjadi tanggung jawab pengirim email.
===========================================================
UNTUK DIPERHATIKAN, melanggar akan dimoderasi:
- DILARANG:
1. E-mail besar dari 200KB;
2. E-mail attachment, tawarkan di sini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://forum.rantaunet.org/showthread.php?tid=1
- Tulis Nama, Umur & Lokasi disetiap posting
- Hapus footer & seluruh bagian tdk perlu dlm melakukan reply
- Untuk topik/subjek baru buat email baru, tdk mereply email lama & mengganti
subjeknya.
===========================================================
Berhenti, bergabung kembali, mengubah konfigurasi/setting keanggotaan di:
http://groups.google.com/group/RantauNet/
