Assalaamu'alaikum. w.w. Dunsanak kasadonyo yang Insya Allah dimuliakan Allah swt. Mari kito sambuang baliak kaji kito. Sampai dima kapatang yeh ? ... aaa sampai di siko,
.... tapi Sutan di penataran P4 disabuik, dalam beragama silahkan beragama sampai alim, tapi dalam bernegara dan berbangsa ikut Pancasila dan awak bisa full-full yaitu full Pancasila dalam kehidupan berbangsa dan bernegara, dan full Islam dalam kehidupan sosial budaya, baik secara pribadi maupun secara kolektif. ... Mari kito taruihkan. Baiak, kalau awak ma-anggap agamo Islam ko agamo ritual semata tantu iyo bisa, agamo lain negara lain. Tapi bak kato tadi kan alun Islam namonyo tu do, sabab nan Islam ko mencakup seluruh lini kehidupan. .... agak barek tu Sutan,... ndak mangarati kami tu doh... Co iko dunsanak. Tujuan awak iduik di ateh dunia ko dijadikan dek Allah swt. hanyo ciek mukasuiknyo. .... ciek baa ko Sutan,... ndak banyak ..?. Cieknyo, Allah swt. bafirman : "Wamaa khalaqtul jinna wal insa illaa liya'buduuni". Dan tidak Ku ciptakan jin dan manusia kecuali untuk menyembah kepada Ku.(QS:51:56) Ingek ayat tu dimulai jo "Wa maa", ... dan tidak ... Jadi mulai dari Adam sampai ka urang nan mati terakhir nanti di hari kiamat, indak ka diciptakan doh kalau indak ka manyambah Allah swt. .... tapi banyak urang ndak manyambah Tuhan Allah tu Sutan ... Berarti lah bautang nyo tu, antah jo aa kadibaianyo, wajar kalau Allah mengazab mereka. Nah, dalam hal iko apakah karajo awak ko baibadah se tiok hari, tiok jam tiok, minik, tiok datiak ?. .... Makan baa Sutan, mancari pitih, anak jo bini ... Naah dari sinan nampak, kalau seluruh perbuatan awak tu, mancari pitih ko, makan ko, babini ko, baranak ko, kalau lai dalam rangka beribadah kapado Allah swt. mako baru perbuatan tu dinilai beribadah menyembah Allah swt., sasuai jo ayat tadi. ... Oooo bitu Sutan.... Eh, ndak bitu-bitu se do, caronyo lai, ... kalau caro mancari pitih tadi, mancari makan, babini indak sasuai jo tuntunan Allah swt. lai bernilai ibadah nyo tu ?. .... jaleh indak Sutan ... baitu juo banegara ko, kalau banegara ko lai sasuai jo tuntunan nan diagiah dek Allah swt., nan diajakan dek Nabi saw. ka awak, itu namonyo lai banilai ibadahnyo tu, tapi kalau banegara ikuik caro lain bukan caro Nabi saw., lai ba nilai ibadahnyo tu ?. ... Iyo indak do Sutan... Nah disinan lataknyo takaik jo nan tadi. Kalau seluruh lini kehidupan awak indak sasuai jo Islam lai bernilai ibadah ?. Kalau indak, isuak barutang ka Allah swt. ... tapi Sutan urang kareh juo mangatokan mereka bisa iduik di Indonesia ko full-full bak kato tadi tu.... Baiaklah, katiko sumbayang, lai buliah sumbayang dek negara, katiko puaso, zakat naiak haji, kawin..ooo malah diuruskan dek negara. OK,... keluarga awak dibunuah urang ...dipangakan dek negara ?. ... urang tu ditangkok dan dipinjaro ...ado juo nan dihukum mati ... Hukum aa nan dipakai ?. Lai hukum Jinayat Islam ?. ...Indak Sutan, KUHP ... Haaa lah kanai tu, lai Islam tu ?. Lai bara urang nan dihukum mati sajak negara ko tagak ?. kebanyakannyo di pinjaro kan ?. Hukum pidana nan dipakai dek negara Indonesia kini ko adolah hukum manuruik KUHP kitab undang-undang hukum pidana nan isinyo diambiak dari peninggalan kolonial Balando. Urang mambunuah dalam Islam kanai hukum Qishas, aratinyo dibunuah pulo kecuali dapek maaf dari kaum keluarga si mati. (QS:2:178). Ayat ko bamulo jo kato "Kutiba", aratinyo diwajibkan, lah awak penuhi nan iko ?. Katiko ayat 183 di surek nan samo tadanga, saroman jo nan akan kito jalankan babarapo ari lai ko babunyi "Kutiba" juo, dan awak basigageh malaksanakannyo tanpa bapikia-pikia. ... Iyo Sutan ... Kutiba 'alaikumush shiyaaam, diwajibkan atas kamu berpuasa ... Aaa kan apa bana tu, ayat Kutiba ciek lai 5 ayat sabalun tu baa ?. .... nan ma tu Sutan ... "Ya ayyuhal ladziii na-aamanu kutiba 'alaikumul Qhishaash." Wahai orang yang beriman diwajibkan atas kamu melakukan Qishas. Lai tapabuek ?. ...Indak Sutan ... Baa kok indak ? .... Iyo urusan bunuah mambunuah ko urusan negara lah ko, baa lo awak mambunuah urang sorang-sorang kan mambaleh dandam namonyo tu... indak ka abih-abih do Sutan ... Iyolah, lai ado di KUHP tu ?. .... Indak Sutan ... Naah, disinan bakulipek barang tu. Baa kecek dunsanak mangecekkan kami bisa full Pancasila dan bisa full Islam dalam waktu yang samo samantaro urusan nan ciek tu sajo indak terlaksana do. Lai bisa namonyo tu ?. ... tu baa Sutan...? Simpulkan se lah sorang, aratinyo selagi awak bapikiran sekuler dan selagi negara ko sekuler, mamisahkan urusan agamo jo negara, salamo itu pulo lah awak susah melaksa- nakan Islam sasuai jo perintah Allah swt. Dari segi sekulernyo se awak lah kanai dek ikuik jalan urang-urang Kristen nan sasek ko, padahal awak mamintak bak kecek mak Ngah tunggang-tunggik 17 kali sahari supayo jan diagiah jalan sarupo urang-urang sasek tu ... "wa laadh dhaaalliiin" ... Tapi jalan sekuler nan awak ikuik, lai samo antaro permintaan jo amalan tu ?. ... indak Sutan ... Urang Islam harus sasuai antaro pitunjuak (hidayah) nan dimintak jo perbuatan taradok permintaan tadi (taufiq). Hidayah nan dimintak tunjuki kami jalan yang lurus,..... bukan pula jalan orang yang sesat, tapi perbuatan awak sekuler, lai sasuai nyo tu ?. ... indak Sutan .. Aaa, indak se jawek sadonyo. Bilo lo ka takabua do'a tu. Apo nan kito jawek bisuak di padang Mahsyar dimuko pengadilan agung nan indak sorang juo bisa lari. Pikia-pikiakan lah sanak. ... tu baa ko lai Sutan ... maramang bulu kuduak kami kok takana Padang Mahsyar tu ... Lai maramang lah rancak tu, kalau indak... iyo ndak dapek aka lai doh. Ado babarapo jalan nan bisa mambuek awak indak taetong badoso ka Allah swt. dalam urusan ko doh. ... Apo tu Sutan, cubo agiah tahu kami ... Nan partamo, negara harus jadi negara Islam ... ... Aiii barek tu Sutan, ndak talok dek kami malawan tentara do, PRRI se bajajak juo sampai kini lai... Hmmm...kalau ndak bisa nan kaduo ... ... aaa tu Sutan ... Hukum Allah swt. harus tagak di negara ko. ... aaa itu, mungkin tu Sutan, tapi UUD tu kan lah dibuhua mati ee dek urang-urang santiang di ateh tu... Kecek sia ?. ... cubo se lah Sutan tanyo ka sia-sia nan santiang di palanta ko..... Hei hei yoo, ... Itu Mahfudz MD. ketua mahkamah Konstitusi (Suara merdeka.com 14 Juli 2012) , lamak-lamak se manuka konvensi nan alah 32 tahun diperjuangkan dek Soeharto jo pengikut-pengikutnyo dulu zaman Soeharto ma barani urang. ... Konvensi apo tu Sutan, indak mangarati kami tu do ... Nan ditumpas dek Soeharto manuruik sejarah TNI AD adolah PKI yang berlatar belakang komunis. Sajak tumpasnyo PKI, komunis terlarang di Indonesia. Komunis ko dinisbatkan kapado urang-urang nan indak picayo Tuhan alias atheis. Apo alasannyo, alasan adolah pasal 29 ayat 1 UUD 45, Negara berdasarkan Ketuhanan Yang Maha Esa. Sia sajo nan atheis, bilo ketahuan, pasti ditangkok sampai bisa hilang malam. Memang ndak ado KUHP nyo doh sarupo kecek Mahfudz tapi jan cubo-cubo. Dek karano zaman Soeharto konvensi negara tak tertulis (dalam bentuk undang-undang pelaksana) masih dihormati. ... iyolah Sutan, ndak abeh dek kami tu do, tapi UUD lah dibuhua mati ko ..?. Aii, indak, kan masih berlaku aturan peralihan dan aturan tambahan walaupun amandemen lah ditambahkan. Dan kalaupun lah takah itu, UUD tu kan buatan MPR, TAP MPR labiah tinggi dari UUD. Aratinyo masih tabukak jalan tu. ... iyolah Sutan, tapi kami rakyaik badarai ... Haa ... kan ka situ juo jadinyo, sanak kan punyo hak pilih. Sanak kan punyo tangan, kaki, bibia nan bisa manyampaikan ka sia sajo, gunakanlah tu. ...iyo Sutan, tapi ka sia ka disampaikan .... Harus duo arah, ka ateh dan ka bawah. Ka bawah ka urang-urang nan alun paham urusan tu, ka ateh ka calon-calon pemimpin nan sanak piliah tu supayo paham pulo agamo ko manyuruah berjuang, memperjuangkan tegaknyo hukum Allah swt. di bumi Indonesia ko. Nyo ciek nan indak buliah nan menyebabkan awak panek tunggang tunggik sumbayang bak kecek Nyit Sungut, tapi indak ado aratinyo. ... apo tu Sutan ... Ndak ado niaik dalam hati untuak managakkan hukum Allah swt. di negara ko. ... Baa dek bitu Sutan ... Kalau niaik ndak ado dalam hati, aratinyo awak bisa berarti indak suko jo hukum Allah, bisa berarti indak setuju jo hukum Allah, bisa juo awak maraso labiah pandai dari Allah di urusan hukum ko, atau awak manjadi urang nan manamia sajo tanpa usao sedangkan Allah menilai satiok usao awak, nah kalau itu bana nan indak ado, lai banilai awak di mato Allah swt. ?. Kalau indak, aaa tau se lah kama awak ka di atak-an dek Allah swt. isuak di hari akhiraik. ... Sutan,... kaji politik ko iyo barek, kadang-kadang ndak abeh dek kami do, ... He he, sanak .... politik ko ado dalam Islam, tapi awak kan nio jadi urang Islam tadi, dan jaan mati kalau ndak Islam, dalam Islam kapatang disabuik kan ado khilafat, urusan negara, kan politik tuuu...tapi baiaklah, kito taruihkan kaji jalan luruih baliak... ... Iyo rancak takah itu Sutan, sabab angek-angek tampek duduak kami dinyo, urang ka puaso bagai ko Sutan aa. Cieklai kaji sabalun itu banyak juo lai nan alun mangarati, takah nan Sutan sabuik "minan nabiyyiin wasyuhada ..." dan sataruihnyo ... Baiak, mari kito kubak ciek-ciek., tapi lah panjang pulo ko,... rancak bisuak kito sambuang. Kito tulih baliak (Bersambung) Bilaahil hidayah wat taufiq Wassalam St. Sinaro -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
