Assalaamu'alaikum. w.w. Dunsanak kasadonyo yang Insya Allah dimuliakan Allah swt. Mari kito sambuang baliak kaji kito. Sampai dima kapatang yeh ? ... aaa sampai di siko, ... Iyo rancak takah itu Sutan, sabab angek tampek duduak kami dinyo, urang ka puaso bagai ko Sutan aa. Cieklai kaji sabalun itu banyak juo lai nan alun mangarati, takah nan Sutan sabuik "minan nabiyyiin wasyuhada ..." dan sataruihnyo ... Baiak, mari kito kubak ciek-ciek, jalan luruih ko. Sebagai hamba, nan patuik kito mintak tiok ari ka Allah swt. adolah hidayah. Hidayah bantuak aa ?, Iyo, Jalan nan luruih tadi. Dan iko alah diajakan dek Allah swt. dan disampaikan dek Nabi saw. ka awak. “Ih dinash Shiraathal mustaqiiim”. Caro lain kito mintak hidayah ko bagi urang-urang nan rajin mambaco qunut, adolah katiko sumbayang Subuah, ‘Allahumah diinii fi man hadaid" Yaa Allah berilah kami hidayah sebagaimana orang-orang yang engkau beri hidayah. .... nan indak mambaco qunut Sutan ?... Dalam duduk antara dua sujud kan ado juo tu, Rabbir firghli, warhamni wajburni,….warfa’ni.., warzuqni… .. Wahdiini… Beri aku hidayah… Lah sarupo itu awak mamintak hidayah, Mako hendaklah diselaraskan, disamokan antaro nan dimintak jo perbuatan. Iko nan disabuik taufiq. Acok awak mandanga ustad-ustad manyabuik, wabillahit taufiq wal hidayah. Sabananyo wabillaahil hidayah wat taufiq. Hidayah dulu baru taufiq. Sesudah meminta ka Allah swt. hidayah, barulah perbuatan awak, amalan awak, perangai awak diselaraskan jo pitunjuak Allah swt. Iko nan disabuik taufiq. Taufiq maknanyo muafakad. Muafakad maknanyo sesuai, sejajar antaro amalan jo permintaan. Awak mamintak dari pagi-pagi agiah ambo hidayah ya Allah... nah, lah sudah dimintak tu ikuiklah hidayah tu. Ko indak, pagi-pagi minta hidayah, pai kalua rumah… duduk-duduk main domino. “… Manga angku pagi-pagi…ko ?” “… Eh ndak,… buka-buka agak salacuik”… haaa kan.... ndak sasuai tu do. ... Sutan, kan lai indak bataruah bagai do ... Ee mulonyo, sudah tu,...sagaleh kopi, dan kok indak bana kan mambuang ukatu namonyo tu. Baitu juo, urang padusi, pagi-pagi minta hidayah, kalua-kalua rumah… ndak berjilbab…. Iko namanyo ndak samo antara perbuatan jo permintaan. Harusnyo, harus samo antara permintaan jo amalan. Dan mustilah sama antaro hidayah jo taufiq. Tiok hari mambaco Ihdinas shiraathal mustaqiim, eh tau-tau awak sekuler. Nampak kan…? Baa awak salamo ko ?. .... iyo Sutan ... Amalan, perbuatan, perangai, tingkah laku, tindak tanduk, cara hidup, cara bekerja, cara berniaga, cara berolahraga, cara bertetangga, cara bermasyarakat, cara bernegara, mestilah samo antara hidayah nan diminta jo taufiq. Baa pulo awak nio hidayah tapi awak ndak ikut hidayah itu. Nan bamintak tiok ari dari pagi sampai 17 kali kecuali hari jum’at 15 kali. Baa ka dapek hidayah kalau indak diiriangi jo taufiq. Dek karano itu, awak mesti ikut apo nan disyari’atkan Allah swt, untuak bisa berbahagia dunia dan berbahagia di akhirat. .... baiak sutan ... sudah tu ?... Sudah tu, "shiraathal ladziii na an’amta ‘alaihim." Jalan nan dimintak tadi tu jalan nan sarupo apo ?. Yaitu jalan orang-orang yang engkau beri nikmat atas mereka. Jalan nan diberi nikmat atas mereka itu jalan sia ?. Tafsirul Qur’an bil qur’an, Jalan yang engkau beri nikmat atas mereka, Mereka tu sia ?.
“Wamaa yuti’illahu warrasuluhu faula ika ma’aladziina ‘an’amallah, minan nabiyyiin, wasshidiqiin, wassyuhadaa, wasshalihiin." Ikonyo, Barang siapa yang menta’ati Allah dan rasulnya, maka mereka nanti bersama dengan orang-orang yang diberi nikmat oleh Allah dari golongan nabi-nabi, shiddiqiin, syuhadaa was sahlihiin. Jalan takah iko nan awak nio sasuai jo pitunjuak Allah swt. Yakni jalan nabi-nabi. .... Baa jalan nabi-nabi ko Sutan ?, Danga elok-elok. “Walaqad ba’asna fi kulli ummatin rasuluan, anni’budullah wajtanibut taghuut” Iko nan dibaok dek nabi-nabi as. Sesungguhnya Kami telah mengutus untuk tiap-tiap ummat seorang rasul. “Ani’budullah” Sembahlah Allah “wajtanibut taghuud” dan jauhilah thaaguut. Ini prinsip dasar, sajak zaman nabi Adam as. sampai Nabi Muhammad saw. Baibadah ka Allah swt. Nah, Ibadah ko bukan hanyo sembahyang puasa zakat haji. Ibadah berasal dari kato ‘aabada. ‘aabada maknanya menyembah ‘aabid yang menyembah ‘ma’bud yang disembah. Segala sesuatu nan awak karajokan karena Allah itulah ‘ibadah. Itu sababnya lalok, bajalan, makan, minum, kahwin, mangaleh, olah raga, apa saja yang kita lakukan jadi ‘ibadah kalau dengan niat karena Allah dan sesuai syari’at. Dek karano ‘ibadah itu ada duo yakni, ‘ibadah khususiyah dan ibadah umumiyah. Khususiyah maknanyo sembahyang puasa zakat haji. Umumiyah artinyo apo sajo nan dilakukan adolah untuak Allah. Sabab manusia Allah ciptakan untuak beribadah sasuai jo ayat tadi “Wamaa khalaktul jinna wal insaa illa liya’buduuni” Tidak Ku jadikan jin dan manusia kecuali untuk menyembah-Ku. Maka kesemuanya karena Allah, bukan karena negara dan karena bangsa, tapi karena Allah. ...politik tu Sutan Sutan ... Eh ko bukan politik, tapi ko hukum. Awak mesti manjago ‘aqidah, dek karano aqidah indak buliah main-main. Masih untuang kalau awak dietong banso nan ba-Tuhankan ka Allah swt. Ada pula banso nan ba-Tuhankan ka nafsu, ba-Tuhankan ka setan, ba-Tuhankan ka benda, ba-Tuhankan ka pitih, ba-Tuhankan ka pemimpin, ba-Tuhankan ka pemuka agama pun ado. Fanatik ka agamo ndak baa do, tapi fanatik ka pemuka agamo indak buliah. Sabab kalau inyo salah,... baa ?. Fanatik ka pemimpin indak buliah, kunun pulo ba-Tuhankan ka pemimpin. ... baa mukasuiknyo ko Sutan ba Tuhankan ka pemimpin ko ?.... Cubo liek, apa sababnyo orang yahudi itu dianggap ba-Tuhankan ka pendeta mereka ?. Kecek mereka, mereka ndak ba-Tuhankan ka pendeta. Tapi, apo nan dikecekkan pendeta mereka, mereka ikuik, Tuhan ditinggalkannyo. Bermakna mereka lah ba-Tuhankan pendeta mereka. Ambo ulang sakali lai supayo dunsanak paham, jadi kalau isuak kalau ditanyo, alah disampaikan ka sidang Palanta Rantaunet, bisa dijawab “alah”. Kalau awak liek, pendeta-pendeta yahudi ko manuka hukum Allah swt. Diambiaknya hukumnyo sorang ditinggakannyo hukum Allah dalam Taurat. Allah swt. bafirman, urang-urang ko ma-ambiiak hukum pendetanyo maninggakan hukum Taurat. Aratinyo mereka lah ber-Tuhankan ka pendeta-pendeta nyo. Kalau awak takah itu pula, samo lah. Ma-ambiak hukum lain manulak hukum Allah swt. Awak ambiak hukum kolonial awak campakkan hukum Allah swt., Maknanyo awak lah ba-Tuhankan ka kaum kolonial tu pulo. Pemimpin mambuek hukum sorang, ditinggalkan hukum Allah swt. maknanyo awak lah ba-Tuhankan ka para pemimpin pulo…..... Inok ranuangkanlah…(lai kasalamaik ndak awak ko). Kito baliak baliak... Jadi jalan nabi-nabi, jalan seperti yang ditempuh oleh para nabi kita ikut. dari nabi Adam as. sampai nabi Muhammad saw. yang kita ambil adalah syari’at nabi Muhammad saw. Syari’at orang dulu-dulu tidak dipakai lagi. Tapi tauhid dari nabi Adam sampai nabi Muhammad sama sajo. Nah,dek lah panjang pulo, aaa.. barisuak kito sambuang. Kito tulih baliak (Bersambung) Billaahil hidayah wat taufiq Wassalam St. Sinaro -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
