Guru
Walau Pak Harto lah tanang di alam kubua, namun ota di lapau Uwo masih alun baranti. Rato-rato, tamu Uwo maraso simpati jo gaek tu, karano jaso-jasonyo nan baitu gadang ka bangsa jo negara ko. "Kalau dipikia-pikia, Pak Harto sabananyo indak sakadar presiden jo kapalo negara dek awak, tapi juo sabagai guru. Itu mah buktin-yo, rakyaik banyak nan rindu ka maso lalu baliak. Maso itu harago kaparaluan iduik indak maha, bisa dijangkau, hasia patanian malimpah, sahinggo indak paralu impor bareh dari lua nagari. Kok harago dolar baitu pulo, sabana murah. Jadi, mustinyo baguru ka caro Pak Harto mangandalikan gajolak harago barang, atau jadikan baliau guru baa caro mambina patani, jadikan pulo guru baa nagari ko tanang sarato banyak lai nan bisa dijadikan baliau sabagai contoh taladan," Mak Pono mancubo mambukak kato. "Ondeh, kok bacarito soal guru Mak, takana dek ambo ado guru nan maninju ka kapalo sikolanyo," Tacin datang manyorong. "Ha....ha..., itu namonyo guru tinju," baleh Mak Pono. "Kalau guru tinju, tantu di ateh riang, Mak. Tapi, kini kaja-diannyo di rumah sikola, dicaliak pulo dek anak-anak muriknyo lai," kato Tacin. "Kalau guru batinju di rumah sikola, tantu baa muriknyo tu? Karano pribahasa mangatokan, kalau guru kajamban sambia tagak, muriknyo kajamban sambia balari. Nah kini guru ko main tinju se, tantu muriknyo labiah dari itu. Jadi, wajar se anak sikola kini suko bacakak," Kari Garejoh lah sato pulo mengecek. "Itu guru nan luluih sertifikasi mah, Kari!" Sorak Angah Piyan. Kasudahannyo bakucantanglah ota di lapau tu pakaro guru nan maninju kapalo sikola. Karano, dari barita surek kaba 'Singga-lang' nan dibaco Tacin, pakaro main tinju tu bamulo dari kapalo sikola nan manyapo guru bagak tu. Manuruik kapalo sikola di kantua polisi, guru bagak tu acok bana indak masuak. Salaku kapalo sikola rasonyo wajar-wajar se inyo manganaan ka stafnyo supayo ijan acok bana maninggaan tugas. Karano, kalau acok indak masuak, tantu rugi anak murik. "Itulah modenyo guru kini. Disapo inyo malawan," Tibo-tibo Udin Kuriak mangaluakan suaro. "Eh, ijan samo rato se, Din! Indak kasadonyo guru bantuak itu doh. Mamak ambo juo guru, tapi indak pernah tempo maaja dan indak pulo pernah malawan ka kapalo sikolanyo. Padohal, kapalo sikolan-yo tu jauah labiah ketek dari mamak ambo," potong Tan Baro. "Tapi lah ambo katokan tadi. Itu nan luluih sertifikasi mah. Mukasuik ambo, sertifikasinyo adolah maaja batinju," sorak Angah baliak. "Tapi guru bagak tu kan maaja agamo," kecek Tacin. "Justru itu. Di jurusan agamo indak luluih, di jurusan tinju inyo hebat, mako di situlah sertifikasinyo," baleh Angah. Tacin taanok. Angah Piyan juo sato anok. Beda jo Tan Baro. Walau tampak anok, tapi pikirannyo manarawang. Bantuak ikolah bagian wajah pandidikan di nagari awak. Guru nan musti digugu jo ditiru, tanyato banyak nan ba batambiluak atau ibaraik ubi jala, tokeang-tokeang dimakan lundi. "Mustinyo salain sertifikasi, guru-guru ko paralu juo diuji psikologinyo. Kalau indak bantuak itu, batambah karuik wajah pandidikan di nagari awak. Picayolah!" Kato Tan Baro. "Tangguang, Tan! Sakalian je dibao ka Indaruang belok kida dari siko," potong Ajo Tondeh nan sajak tadi aniang-aniang je. Espe St.Soeleman --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
