Assalaamu'alaikum. w.w. Dunsanak kasadonyo nan Insya Allah dimuliakan Allah swt. Mari kito sambuang baliak kaji kito. Kapatang sampai di siko, Ingek,.. isuak ba-urusan di akhirat. Manga awak sumbayang, puaso, pai haji dan sagala macamnyo ?, dek karano apo ?. Dek karana nio sarugo lah. Kalau awak kecekkan hukum Allah ta’ala zhalim, ndak usah sumbayang lah, ndak usah puaso, ndak usah pai haji, mambuang ukatu. Guno ceramah ko untuk ma-ajak awak masuk sarugo, untuak mengetahui iko salah iko bana. Kalau salah batua-kanlah. Ditarangkan iko supayo ummat Islam di Indonesia ko jaan sekali-kali mancubo manulak hukum Allah ta’ala, menghujat hukum Allah ta’ala. Buang wakatu sumbayang, buang wakatu awak ber ‘aqidah. Rusak ‘aqidah dunsanak, jaan main-main. Kalau ciek wakatu awak ndak sumbayang, awak masuak narako sabanta. Paliang lamo ciek wakatu ndak sumbayang, masuak narako 80 hari akhirat, samo jo 80.000 tahun di dunia, ndak lamo bana do…. Kalau sahari semalam ndak sumbayang 400.000 tahun dalam narako. Kalau tigo hari ndak sumbayang 1,2 juta tahun. Kalau inyo katokan sumbayang ndak wajib… aah .. kekal salamo-lamonyo di dalam narako, ndak kalua lai do. Samo pulo kalau awak katokan hukum potong tangan itu zhalim, … aaahh kekal salamo-lamonyo dalam narako. Awak katokan hukum hudud itu ndak wajib dilaksanakan… aaa kekal salamo-lamonyo dalam narako. ....Ingek tu dunsanak. Tipak diambo, apo untuangnyo mangecek takah iko ko ?... nio ma-ajak lah, … ma-ajak samo-samo masuak sarugo. Dek karano masuak sarugo tu indak bisa surang- surang do. Kalau buliah sughang-sughang joo, dipahami sughang-sughang kan lamak … ghilek... istighahat, banyak kojo nan lain lai. Tapi dalam Islam ndak buliah bitu, awak mesti ma-ajak urang samo-samo, mesti mencegah kemungkaran, bitu hukumnyo. Memang susah, banyak nan ndak setuju, kitopun susah, pemerintah ndak suko awak menerangkan nan haq tu. Negara lah terlanjur sekuler, pikiran urang-urang lah terlanjur sekuler. Saketek-saketek inkonstitusional, saketek-saketek subversif. Iko nan dulu ambo sabuik sebagai "kerangkeng" tu. Inskonstitusional lah, Subversif lah, sara lah, macam- macam. Padahal iko manarangkan yang haq, hukum Allah ta'ala, supayo mangarati baa hukum Allah ta'ala ko. Supayo ndak bi takuik bitu se jo hukum Allah ta'ala ko. Supayo mangarati hukum ko ado syarat-syaratnyo. Takah sumbayang,… ado syarat-syaratnyo,… mulai dari Islam, baligh, berakal… sampai da’wah. Hukum potong tangan juo baitu, mesti ado saksinyo,… bara jumlah pitih nan dicilok,.. dimaa lataknyo dan sebagainyo. Kalau latak barang itu ndak jaleh, ketinggalan misalnyo, jam Rolex tingga, awak lupo tadi, katiko babaliak lah ndak ado, urang nan ma-ambiak ndak kanai potong tangan do. Baa kok bitu ?, dek karano lalai. Liek dunsanak ndak mudah mengenakan hukum potong tangan. Tapi kalau inyo datang ka rumah awak, lamari lah dikunci, dikupaknyo, itu iyo kanai inyo tu. Kalau awak ma-ambiak udhuak, digantuangkan jam dakek pipa, lupo, sudah tu hilang….. salah awak. urang nan ma-ambiak ndak kanai potong tanganyo do. Jadi ado aturan-aturannyo. Jaan manyangko kalau mancilok… raap.. potong… ndak bitu do. Baitu juo urang berzina, ndak bitu mudah kanai hukum dera (dicambuk atau dirotan) atau hukum rajam. Cubo bayangkan 4 pasang mato nan janiah cerah nan tarang maliek dan manjadi saksi baru bisa. Bilo tanyato tigo urang nampak, sorang ndak nampak, saksi yang tigo nan lain malah kanai dera. Kanai hukum bohong dan manuduah urang bazina. Makonyo indak mudah dunsanak. Itu sababnyo awak jaan sasuko hati menentang, meng claim, Iko hukum Allah ta’ala. Kalau hukum Allah ta’ala ko ditulak,…. ndak ado makna lai awak Islam. .. ndak bermakna... kunun pulo nio mati dalam Islam. Taradok hukum Allah ta’ala ko mestilah “ay yaquulu sami’na wa-ata’na”, hendaklah orang beriman berkata “kami dengar dan kami ta’at”. Kini makin hari makin banyak urang nan murtad akibat ndak paham. Kalau ndak paham, ndak mangarati kan labiah elok diam, jaan berkomentar. Labiah elok bakato “kami urang yang ndak paham, nanti dululah, baraja kami dulu” diam sajo labiah elok. Kan labiah elok diam daripado awak bakato hal nan awak ndak tahu. Mangecek mengenai hal-hal nan awak ndak tahu,… kan labiah elok diam. Takah carito dulu katiko Abu Yusuf manyampaikan ceramah. Sasudah salasai ceramah, keceknyo pulo “ada yang mau bertanya ?”, sadonyo diam. Ado sorang nan di suduik dari tadi ndak pernah batanyo dan ndak mangecek saketek juo, mungkin memang pendiam. Abu yusuf bakato, “Engkau tanyalah sedikit, dari tadi diam saja”. sabananyo inyo ndak nio, tapi karano disuruh tuan guru inyopun batanyo “Tuan kalau kita berpuasa, Bila kita berbuka tuan ?”…. itu sajo pertanyaannyo… kan mudah, tapi Abu Yusuf ndaklah berang,.. nyo jawek “Kita berbuka bila matahari terbenam”. Tapi kudian urang tu batanyo baliak “Bagaimana tuan kalau matahari tidak terbenam-terbenam”. … kata Abu Yusuf kemudian,..”Eloklah engkau diam”. Kalau ndak mangarati kan labiah elok diam. Jangan menentang labiah elok diam, jaan berkomentar. Kito lanjuikkan ”Maka imam yang ‘adil pada sisi Allah amatlah tinggi derajatnya. Tiadalah lain yang mengatasinya melainkan para anbiya (nabi-nabi). Bahkan ia sebagai maqam(tempat) anbiya jua, sebagaimana tersebut dalam hadits." Artinyo memang imam nan ‘adil itu derajatnyo tinggi. Di bawah Nabi-nabi, para Nabi di ateh nyo saketek. Nabi-nabi di ateh, di bawahnyo pemimpin-pemimpin nan ‘adil. Iko dapek diliek dalam hadits. Nabi saw. bersabda, tujuah golongan nan nantiknyo di padang mahsyar akan ditampekkan di bawah tiang ‘arasy wakatu matohari terlalu angek tu, “Tujuh golongan yang nanti akan dilindungi oleh Allah swt. pada hari yang tidak ada perlindungan, yang pertama, al-imaamun ‘adil”. Imam atau pemimpin nan ‘adil nantik ndak akan kanai angek matohari nan bukan main angeknyo hari tu. Bara lamo awak tagak di padang mahsyar dunsanak ?. … 25 hari,… ndak lamo do… Aratinyo 25.000 tahun dalam pandangan awak. Dalam pandangan Allah 25 hari sajo. 25.000 tahun tagak di padang mahsyar…. baa agak-agak ?. Lai takao ?. Ndak takao bana, indak juo mati do, sabab mati lah ndak ado lai. Angek… bapaluah…. tagak… ndak makan…ndak minum, ndak istirahat,… ndak manggarik. 25.000 tahun. Salasai 25.000 tahun, maniti pulo. Maniti ko 5000 tahun mandaki, 5000 tahun mandata, 5000 tahun manurun. Sadonyo 15.000 tahun. Mako sampailah ka sarugo sasudah 40.000 tahun. Tapi dalam pandangan Allah 40 hari sajo. Mako imam nan ‘adil antaro lain adolah urang nan tamasuak ditempatkan di bawah tiang ‘arasy, ndak kanai angek matohari. Kan tinggi derajatnyo tu. Kemudian barulah pemuda nan rajin ka surau ka musajik, nan hatinyo cinto ka musajik. Urang nan suko basidakah sahinggo ndak tau tangan kida katiko tangan suok baragiah, urang nan suko beramal di waktu malam, manitiak aia matonyo surang-surang baibadah ka Allah swt., duo urang sahabat nan berkasih- kasihan karano Allah, dan urang nan manjago akhlaknyo dari perbuatan sumbang, kasadonyo akan ditempatkan di bawah tiang ‘arasy di padang mahsyar nantik. Aaaa dek lah panjang pulo, barisuak kito sambuang dunsanak.. Kito tulih baliak. (Bersambung)
Billahil hidayah watr taufiq Wassalam St. Sinaro -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
