Assalamualikum wr wb Angku, mamak, bundo sarato dunsanak sapalanta nan ambo muliakan,
Alhamdulillah, kito alah memasuki satangah maso baibadah dibulan suci ramadhan nan ko. Indak lamo lai, kito akan babaliak pulang ka kampuang halaman masing-masing untuak bakumpua basamo-samo jo dunsanak handai taulan baiak nan bamukim di kampuang ataupun nan ado diberbagai wilayah rantau nan ko. Masih dalam suasana berduka ateh kepulangan pak Rainal Rais Dt Rajo Satie rang Sulik Aie manghadap Illahi nan ko, takana dek ambo baa perjuangan baliau untuak maupayokan agar anak nagari Sulik Aie nan batebaram diberbagai wilayah rantau hinggo ka mancanegara, untuak bisa baiyo batido membangun kampuang sarato menjalin silaturahim antaro sasamo perantau minang khususnyo nan barasa dari nagari Sulik Aie nan ko. Adolah Karapatan Adat Nagari Sulik Aie pulo nan mamandang apo nan alah baliau usahokan, marupokan suatu sumbangsih nan sabana rancak untuak kemajuan nagari, sahinggo tibo dikato mufakat untuak mambarikan sasako adat kapado baliau nan alah kito ketahui basamo dengan gala adat Dt Rajo Satie Nan Mulie nan ko. Nagari sabagai tumpah darah kito nan tasabuik urang minang nan ko, marupokan tampek babulek baurek tunggang, asa mulo sako jo pusako nan kudian manyusun tatanan masyarakat adat di nagari. Dari maso-maso wakatu bajalan ka nagari-nagari di ranah minang, tampak dimato sarato talamun dalam pamikiran, bahasonyo alah banyak limbago adat di nagari nan indak bafungsi lai. Hal iko tajadi dek karano pemangku adat di nagari nan ko, nan kito sabuik jo pangulu, malin, manti jo dubalang indak samparono tatagak baliak dari anak kamanakannyo. Ado juo nan tagak, namun antaro masing-masing urang nan ampek jinih, indak pulo bakomunikasi sacaro rutin untuak mampasamokan apo nan patuik dirundiangkan dalam biliak basuku jo banagari. Kembalinyo Sumatera Barat kapado sistem pemerintahan nagari sajak otonomi daerah, dimano ado lembaga-lembaga nan menjalankan pemerintahan di nagari, saroman nan kito sabuik jo wali nagari basamo- samo perangkatnyo, BAMUS/BPRN/BPN nan memiliki istilah nan babeda dimasing-masing kabupaten sarato KAN/LAN nan marupokan organisasi urang nan ampek jinih dan organisasi pemudanyo, alun baitu samparono untuak maatur apo sajo nan tajadi di masyarakat nan berlandaskan kapado apo nan dsabuik Adat Basandi Syarak, Syarak Basandi Kitabullah. Ado rancaknyo, untuak kamuko, apo nan manjadi bangkalai basamo urang sanagari bisa mulai diansua-ansua dalam pertemuan halal bi halan organisasi perantau dengan pemerintahan nagari kutiko bahari rayo Aidil Fitri nan akan datang. Salah satu nan sangaik diparalukan untuak segera ditindaklanjuti, adolah mamulai pendataan anak nagari berdasarkan tatanan adat nan bakaum jo basuku, sahinggo alah bisa mulai diinvetarisir potensi anak nagari baiak nan di kampuang maupun nan dirantau & saluruah hal nan takaik mengenai kehidupan urang minang nan balimbago. Pamilihan Wali Nagari di Sumatera Barat dapek diikuti oleh saluruah anak nagari di kampuang halaman nan alah memiliki hak piliah & anak nagari nan barado diparantauan (nan indak memiliki KTP di nagari satampek), dek karano satiok urang minang nan ko iyo "basako bapusako" sarato "babulek baurek tunggang" ka nagari. Salaruik salamo nan ko, kutiko maso pemilihan dilakukan, banyak anak nagari nan pulang ka kampuang untuak sato dalam alek nagari nan ko. Dimaso mendatang, dengan keberadaan organisasi perantau nan disabuik Ikatan Keluarga (IK) adolah hal nan mudah untuak melakukan pemilihan diberbagai tampek wilayah rantau. Hal iko bisa dimungkinkan pabilo dimasing-masing wilayah, satiok perwakilan IK-IK nan ado alah labiah samparono pendataan anggota sarato komunikasi jo pemerintahan nagarinyo. Dengan baitu, akan bisa labiah disamparonokan komunikasi banagari, antaro nan dikampuang jo nan dirantau, nan tatap dalam tataran badunsanak nan sabana bebeda jo tendensi politik nan sadang melanda negara Indonesia ko. Nan manjadi pertanyaan mendasar, apokah kito alah malakukan pendataan jumlah anak nagari mantun? Baitu pulo dengan pendataan anak kamanakan di masing-masing kaum sarato suku nan ado di nagari? Hal iko tantunyo akan balanjuik pado pendataan masing-masing ulayat nan bapacik pado satiok kaum & suku, hinggo kapado ulayat nagari. Hal iko paralu dipikiakan sacaro basamo oleh saluruah anak nagari dimano sajo barado & ijan sakali-kali tapikiakan dek kito hal iko akan dilakukan oleh pemerintah daerah (pemda) setempat. Sabab dalam tatanan adat minangkabau, permasalahan internal di nagari iyo babiliak-biliak, nan disabuik babiliak kaum, babiliak suku jo babiliak banagari. Semoga dalam kegiatan halal bi halal antaro pemerintahan nagari jo organisasi perantau pado hari rayo Aidil Fitri nan kadatang, hal nan ko bisa mulai diansua-ansua pamikirannyo sarato tindak lanjuiknyo dimaso nan akan datang. Mungkin itu sajo apo nan bisa ambo urai papakan, kok ado nan bana iyo datang dari Allah azza wajalla, kok ado nan salah tantu barasa dari ambo sebagai mahluk nan dhaif nan ko. Akhia kato, semoga perjalanan manuju kampuang masing-masing indak ado kendala nan bararti, sahinggo kito selamat sampai ditujuan, batamu jo dunsanak sakaum, sasuku, sanagari. Indak ado malang nan samalang nan ko, Indak ado mujua nan samujua nan ko. Karajo elok rancak dipacapek, sabalun datang nan buruak Karajo buruak rancak dipalambek, kok lai datang nan kaelok [QS 29:69] وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعالْمُحْسِنِينََ Dan orang-orang yang berjihad untuk (mencari keridhaan) Kami, benar- benar akan Kami tunjukkan kepada mereka jalan-jalan Kami. Dan sesungguhnya Allah benar-benar beserta orang-orang yang berbuat baik wasalam AZ/lk/34th/caniago Padang asa nagari Kubang, 50 Koto babako ka Canduang Koto Laweh, Agam -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
