“Apo barita angek kini, Kari?” Baitulah tanyo Tan Baro nan baru masuak lapau Uwo Pulin pagi kapatang. Tanyo sarupo itu lah biaso dek kalangan pandeka lapau Uwo.
“Kok nan angek bana indak ado doh. Tapi kalau lagu lamo lai, ko ha!” Jawek Kari Garejoh sambia mampaelok-i duduaknyo. “Mukasuik Kari lagu karoncong? Atau lagu ayam den lapeh?” Tan Baro batanyo baliak. “Indak! Tadi ado barita di halaman dalam nan mancaritokan kondisi lalu lintas di Kota Padang. Di situ dicaritokan baa Padang nan indak punyo terminal angkot, oto basalingkik sampai mambuek macet, lampu merah nan bantuak karakok di ateh batu sarato banyak lai nan dibaritakannyo. Apo itu indak lagu lamo dek Tan Baro tu?” Jawek Kari mancaritokan isi barita nan baru dibaconyo tu. Tan Baro indak sugiro mananggapi apo nan dikatokan konco palangkinnyo tu. Karano baru tibo, tantu nan dikamehannyo talabiah daulu adolah kopi manih. Sasudah dicurahan ka piriang cipia saparo, diminumnyo saraguak. Sudah tu, dibakanyo sabatang rokok putiah. Tampaklah asok mangguluang ka awang-awang. “Kadang-kadang di antaro awak ko ado nan bailimu basi. Ado ilimu basipakak, ado basimada, basibanak, basibuto, basilengah, basikareh. Urang-urang saroman itu, dipangakan sajo, indak ka mangkuih doh. Tu mah contohnyo masalah lalu lintas. Ampia tiok hari ado barita jo fotonyo di surek kaba langganan awak ko, tapi kondisinyo indak pernah barubah,” hanyo itu tanggapan Tan Baro. “Kalah pulo ibukota provinsi dek daerah ketek sarupo Padang Panjang, Koto Baru Solok sarato Simpang Ampek Pasaman Barat. Di daerah-daerah tu kini lampu merahnyo punyo kapastian kapado pangguno jalan, karano ado pakakeh paetong wakatu. Di Padang, ijankan itu, lampu merah nan ado se indak taabehan, sahinggo ado nan celek, buto atau ado pulo nan batandiang iduik. Merah, kuniang ijau sakali iduik se,” kecek Tacin. “Wajar se tu nyo. Di nagari ko banyak nanmusti diurus, indak soal lalu lintas se ciek doh. Pitih untuak pambali lampu merah rancak tu indak pulo ado. Mungkin pitih untuak mampelok-i lampu-lampu nan rusak tu juo indak cukuik, sahinggo dipabiakan sajo rusak babulan-bulan,” solang Uncu Labai. “Kok itu alasannyo, baa juo lai,” kato Tan Baro. Baitulah ota dilapau Uwo Pulin. Barita soal kondisi lalu lintas di Padang dianggap lagu lamo nan indak lamak lai didanga. Karano itu, kalau ado nan manyanyikan, urang basilengah se. “Jadi?” Tanyo Kari. “Wak tarimo se lah nasib ko lai. Kalau lai ado paratian pihak-pihak takaik, bialah nak nyo paelok-i kondisi nan ado ko. Tapi, kalau indak, tu ka baa juo lai. Ndak taragak dek awak, rancak awak pakok mato jo talingo. Karano, kok mangecek juo awak, samo jo maludah ka awang-awang atau manapuak aie di dulang nan basah awak juo. Espe St.Soeleman No virus found in this outgoing message. Checked by AVG Free Edition. Version: 7.5.516 / Virus Database: 269.19.17/1252 - Release Date: 30/01/2008 20:51 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
