Sarupo hari-hari sabalunnyo, lapau Uwo Pulin indak pernah langang. Salain urang-urang nan lah jadi langganan satiok hari, ado pulo urang nan sakadar singgah atau anak sikola nan balanjo lontong. Maklum, sajak manjalang puaso lapeh, induak bareh Uwo juo manggaleh lontong.
Kabiasaan Tan Baro basamo kawan-kawannyo adolah mambaco surek kaba ‘Singgalang', sudah tu kalau ado nan agak angek dijadikan bahan ota basamo-samo. Ado-ado sajo nan jadi topik dek urang-urang tu. Pagi kapatang, masalah naiaknyo harago kaparaluan iduik masih juo jadi bahan ota. Maklum, rato-rato urang tu pernah mandapek birunguik dek induak bareh surang-surang, karano pitih balanjo indak cukuik. “Batambah panik awak dek bapikia caro mancari pitih. Pandapatan nan ado sabana indak cukuik untuak pambali bada maco. Anak-anak ambo mamintak pulo dibuek-an randang. Karano, sajak hari rayo puaso kapatang tu, indak pernah lai inyo mamakan randang. Tapi, jo apo ka dibali? Pitih tu bana nan indak ado,” baitu Uncu Labai mancubo mambukak ota. “Lah samo awak mah. Anak ambo mintak dibuek-an goreang ayam, nan ketek mintak ayam goreang urang Amerika pulo. Dibali atau dibuek surang, biayanyo samo-samo maha. Karano, minyak manih tu bana nan lah naiak haragonyo. Ijankan itu, bareh pun lah indak tabali nan rancaknyo. Baruntuang Mak Pono lai ba sawah di kampuang, tantu lai indak ka payah bana jo bareh,” kato Angah Piyan pulo. “Ha....ha...., di kampuang iyo lai ado sawah. Tapi itu diolah dek kamanakan ambo. Kan indak mungkin pulo ambo mintak bareh ka inyo. Makonyo, ambo juo mambali bareh. Kini se, harago bareh lah sampai sapuluah ribu sagantang. Bulan kapatang, ambo masih bisa mambali salapan ribu,” baleh Mak Pono. “Yo, sabana kumbayiak awak jo harago kaparaluan iduik kini. Sagalonyo maha. Padohal, sajak saisuak awak bangga tingga di nagari ko. Daerahnyo subur, tungkek ditanam bisa manjadi kayu. Tapi, ambo baco di surek kaba ko, banyak hasia patanian nan diimpor dari lua nagari,” kecek Uncu. “Sabananyo, lah kasadonyo kito di nagari ko marasai dek harago-harago kaparaluan iduik tu. Sabana ndak talok lai iduik bantuak iko doh. Alah, tu mah! Ijan ado juo tambah harago barang-barang tu lai,” potong Angah. “Ka siapo Angah mambana?” tanyo Kari Garejoh. “Ka pamarentah!” Jawek Angah. “Sampai maruok muncuang dek mamintak ka pamarentah, nan harago indak ka turun gai tu doh. Karano di nagari awak ko, harago barang indak diatur pamarentah, tapi urang punyo pabrik sampai ka urang manggaleh eceran,” kecek Kari baliak. “Jadi, baa caronyo?” Tanyo Angah indak saba. “Indak dapek caronyo dek awak doh. Kini, tarimo se lah nasib surang-surang lai. Santano mati awak dek indak ado nan ka dimakan lai, tu ka baa juo, mudah-mudahan awak mati syahid,” Kari Garejoh asa lai mangecek. “Kok itu indak mati syahid doh, Kari. Tapi mati konyol!” Tibo-tibo Tan Baro sato sakaki. “Sumbarang lah! Nan jaleh, naiaknyo harago barang sabana bisa mambunuah awak,” potong Kari baliak. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.20/1259 - Release Date: 04/02/2008 20:42 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
