Si Upiak Panjua Talua Puyuah. (Carito mengenang maso daulu)
Tibo di rumah sasudah bajalan jauah dari sakola ditangah paneh garang pukua satu tu, Si Upiak lansuang ambiak aia udhuak sumbayang luhua. Alah agak sanang pangananyo, inyo lansuang pai ka meja makan mambukak songkok. Dicaliaknyo Amak alah manyadiokan lauak kasukoannyo. Talua puyuah bulek bagoreng jo teri balado sirah, langkok jo taruang ungu nan bakalincoan jo lado tu. Di mangkuak ado pucuak ubi nan baabuih di salonyo nampak irisan bawang merah. Indak tingga karupuak kamang dalam toples gadang. Langkok sudah makanan si Upiak siang ari nan paneh mangkatutuih tun. Sasudah kakanyangan dek samba-samba buruak hasil lakek tangan Amaknyo tu, alun bisa si Upiak istirahat laih. Masih ado tugas ari sahari tu nan manantinyo. Si Upiak satiok ari Silasa jo ari Juma'at harus maantaan talua puyuah ka Pasa Bawah Bukiktinggi. Taranak puyuah sabana manjadi sahinggo batambah pulolah baban talua nan harus inyo antaan ka pakan ka tampek Tek Iyuih langganan Amaknyo. Dek si Upiak alah baransua cadiak juo, tugas itu bapindah ka inyo kini. Abang no nan surang nan satahun diateh no batugas mambarasiahan kandang tiok ari Akaik. Nan Abang no nan surang lih batugas mangacauan campuran makanan buruang puyuah tu nan tiok sapuluah ari sakali. Itu agak barek, dek nan bahannyo ado 10 karuang, barek tiok karuangnyo 50 kg. Baangkek ciek-ciek jo garobak sudahtu batuang diteras rumah mereka nan lumayan laweh balampih-lampih, dek jinihnyo bamacam pulo. Ado dadak, ado jaguang, ado kulik pensi, ado konsentrat, ado tapuang ikan atau dadak maco, sampai ka vitamin no bagai ado pulo. Sasudah tu bakacauan jo sekop. Tapi sajak Abang no takilia pungguang no, nan ciek li takilia kaki no dek main bola, tugas tu jadi bapindah ka si Upiak. Iyo sansai. Talua puyuah limo ribu buah alah siap di ampek belek nan baaleh jo kateh koran bakeh supayo indak pacah kutiko dibaok. Lah basiap pulo siap tu si Upiak ka pai ka pakan. Pasa Bawah indak talampau jauah dari rumah doh, tapi manjinjiang belek jo kantong tu nan indak tahan mulai dari rumah ka tapi labuah tampek manantian oto. Oto Mersi nan ronono kuniang datang dari arah Gaduik manurun di simpang distop dek si Upiak. Diateh oto nampak amak-amak mambaok limau jo ubi jala sirah. Takok si Upiak Amak ko dari Gaduik tampek banyaknyo limau manyih ko jo ubi jala sirah nan terkenal kamek tu. Bahkan kalau di Bukik ado garah-garah kami ka kawan sikola nan barasa dari Gaduik ko. Urang gaduik ko pangantuik dek kabanyakan makan ubi jala. Tapi itu kan garah kudo kami sajo, jan ambiak ati lo yoh. Oto Mersi ko sangaik ketek, dek sakiang keteknyo baradu bagai kadang lutuik apak-apak kalau duduak baadok-adokan di dalamnyo. Jadi biasonyo rato-rato isino Amak-amak sajo bagadincik kalo alah Pakan ari. Cingkariak oto iyo kadang indak sadang elok pulo lo doh. Jaleh alah indak muek laih, geser-geser saketek ka saketek juo kecek no. Ampun kito. Sampai di Jalam Abu Bakar di pasa Banto, barantilah oto ko. Turun pulolah si Upiak alah siap maangkek ampek beleknyo jo kantong asoy itam gadang. Balampih duo, duo dikida jo duo di suok. Untuang pangka langannyo indak bakatak-katak pulo dek acok maangkek barek ko. Untuang ari Silasa tun lai indak rami bana urang manggaleh doh. Jadi mudah sajo dek inyo lalu diantaro Amai-Amai nan manggaleh di tapi jalan ka masuak ka Pasa Bawah dari Pasa Banto tun. Takana dek inyo lalu disitun pas kutiko ari Pakan, iyo sabana bagadincik. Urang manggaleh dari kampuang-kampuang banyak manggaleh di tapi labuah tun. Bakambangan plastik itam, sudah tu disinalah balatakan galeh nan bamacam. Si Upiak sangaik suko lalu di tampaik Amai nan manggaleh Durian Kamang. Baun no sajo iyo sabana kamek. Tapi alun talok mambali laih, dek pitih lai ado tapi paralu pulo untuak ka nan lain baruh. Dek sadono anak Amak masih sikola, alun ado nan bisa mancari takah Abak laih. Disabalah Amai manjua durian, ado nan manjua Kuini, iyo ampun baun no. Di sabalah siko ko ado Etek nan manjua bungo rampai, harum.! Agak kadalam saketek ado nan manggaleh sabuak (kopi). Lain pulo sensasi arun no. si Upiak ado kenal jo Etek panggaleh sabuak ko. Acok inyo hindari sabok kalo nampak dek liau disuruah tunggu duluh, disuruah mambaokkan sabuak sabungkuih ketek untuak Abak. Dalam pikiran si Upiak, fans Abaknyo ko iyo langkok juo. Abang urang nan dituokan di kampuang walau Abak alun tuo manuruik Upiak laih. Masuak ka dalam pasa batambah baragam urang manggaleh. Kios bahan kue, kios karupuak ka karupuak langkok sadonyo. Mulai dari nan matah ampai alah siap didarun. Nyam.. nyamm.. Ado pulo Uda panggaleh mujaia jo Nila, ado lo nan manggaleh isi pensi, rinuak jo bada maninjau. Ado nan alah disalai bagai di daun pisang nan dipotong bulek. Ado nan basah segar di embe langkok jo kaleng gantang ketek jo gadang untuak paetong no. kalau si Upiak mambali bada maninjau, alah disauak jo gantang tu, beko tu batambah lo agak duo tigo ikua dek Uni nan manggaleh tu. Panyanangan ati si Upiak dan si Upiakpun memang sanang ati mambali takah itu. Agak ka dalam saketek laih, ado deretan tenda basaok jo kain lusuah. Mungkin dulunyo rononyo putiah, tapi kudian alah kulabu asok dek lamo dipakai. Didalamnyo duduak Amak-amak nan gapuak mamacik sanduak sayak batangkai panjang. Diadok an baliau ado tasangkuik katupek nan gadang-gadang. Antah dek si Upiak nan lapa jadino nampak iyo gadang-gadang. Disabalahno agak kaadok an ado balango gadang bairisi gulai cubadak nan sabana kuniang dek kunik. Ado karanjang layah dari rajutan rotan aluih nan dialeh daun pisang abu, diateh no langkok sagalo sayua paragaik pical. Indak lupo belek karupuak sirah nan bakaco di dindiangnyo mahadok ka muko, maimbau urang nan sadang lapa-lapa tangguang untuak singgah. Singgahlah.. Singgalah..! Lalu dari sinan ditapi tenda tu duduaklah Amai-amai manggaleh timun kuriak boonggok, tunjang bakabek baonggok, kikihan tulang jawi baonggok pluo. Indak tingga disubalah liau ado nan manggaleh kacimuih, lopis, sarabi to tapai gabelo. Iyo kamek-kamek sajo tacaliak. Nan si Upiak harus lalu sajo dek baban di tangan samakin barek sajo. Tatumbuah di muko tu Los tampaik manggaleh tahu tabiang. Dahulunyo ukatu si Upiak lalu disinan ado Uda-Uda nan suaronyo sangat khas manggaleh tahu Tabiang ko. "Bali lapak, bali labuk, tau tabiang-tau tabiang," mantun baulang-ulang. Kutiko Uda tu kabanyo maningga, digantikan dek Uni-uni disinan, rasonyo ado nan indak langkok kalau lalu disinan tun laih. Deretan Los tu panuah jo urang manggaleh bumbu, nan sabanan langkok. Sabalah kadalam ado Los Maco. Sadono nan ikan asin nan ado disinan, bagi Urang Bukik basabuik Maco. Jadilah Los tu Los Maco, padohal indak tabagi sepen laih ikan asin nan ado disitu digalehan uran. Uniknyo satiok panggaleh maco nan maunggunkan tinggi-tinggi galehnyo jo bantuan karateh simin nan babantuak jadi gunuang tu, ado bubuak itam kacoklatan nan baun no busuak manyangek. Tapi apolah rangan namono, lupo si Upiak. Antah tarasi kolah, Pado kolah atau apolah du kiyoh. Bialah ditanyoan duluh ka Amak bikoh dih. Lapeh dari Los maco tu tibolah si Upiak di Los karambie. Los karambie ko indak sadono manggaleh karambie doh, ado nan manggaleh saka, ado nan manggaleh talua, langkok sadono jinih talua nan biaso dimakan urang. Biasono salain manggaleh talua, basaratoi jo manggaleh sabuak. Disikolah baban si Upiak sampai. Etek Iyuih nan manggaleh sabuak jo talua ko alah galak manih ka si Upiak baitu si Upiak tacogok dari arah Los Maco. Etek ko namuah mambayia talua puyuah si Upiak diateh harago talua puyuah nan masuak dari Pikumbuah, kato Etek ko, talua puyuah Pikumbuah gampang bana pacah sadangkan talua puyuah nan Upiak baok labiah tagok. Mungkin dek makanan no nan tajago rancak dek Amak. Salasai timbang tarimo bajua bali jo Etek Iyuih, Upiak nak malala dulu ka Pasa Lereang. Ano taragak nak ka mambali sapik rambuik nan sambuah digalehan anak bujang disinan. Lalulah si Upiak ka arah suok taruih ka Los Bareh jo tapuang. Nampak di Los agak ka balakang urang manggaleh ayam jo itiak nan iduik. Baitu dibali baru didabiah biasono, sabok Urang Bukik indak picayo ka ayam nan alah didabiah baru bajua. Biasono susah laku kalau alah ayam bakubak tu nan bajua. Mantun lo sapangamatan si Upiak. Lapeh dari Los bareh, mangencong kasuok taruih ka tapi Pasa tu. Tibo si Upiak di dakek parantian Bendi di dakek bawah awak ka naiak ka janjang Gantuang. Janjang Gantuang ko adolah Jembatan nan mahubuangkan Pasa Bawah jo Pasa Lereang. Pilihan jalan nana man bagi si Upiak nan panggaca kalau alah nak ka malinteh jalan. Raso kadiondohno sajo dek oto nan lalu. Sabalun mandaki janjang si Upiak mambali salak Medan nan dijua di dakek urang manggaleh Pensi nan alah masak disitu. Harun baun no manyalero. Agak naiak saketek ka janjang ado nan manggaleh karak kaliang aluih-aluih jo nan kasa-kasa panuah bawang. Agakno dibuek surang, bukan nan didatangan dari Pikumbuah saroman banyak karupuak nan sabuah jinihnyo tu nan didalehan urang di pasa Bukik. Pas di ateh jembatan tu ado nan manggaleh ketek-ketek mulai dari panitik, jarum jaik, sikek rapek, sikek apak-apak nan ketek-ketek tu, sampai ka sapik kuku jo silet nan bagambar arimau tu bagai. Disabalahnyo ado Amai nan manggaleh sagalo macam limau untuak ka samba jo ka ubek. Iko ndak menarik dek si Upiak doh tapi nan menarik adolah Limau Gadang (Jeruk Bali) nan dijua Amak ko. Limau gadang ko alah dikubak sabagian, bahkan ado nan alah dikalupakkan isinyo. Nampak bulia-bulia aia limau nan boneh-boneh baisi aia limau sabana mamjejehan salero mamandangnyo. Buah ko kasukoan si Upiak dek rasonyo nan masam-masam manyih tu. Sabana sajuah kalau alah lalu di rakuanganno. Dibalilah dek si Upiak limau ko sabalah sajo. Alah tibonyo di Pasa Lereang, urang sabana rami manyalingkik disiko. Disiko pulolah banyak Tukang Cacak baraksi. Antah kaluang anak ketek nan dirangguiknyo diam-diam, atau pitih awak nan dirosoknyo diam-diam. Kabanyo mereka ko ado pulo komintasnyo. Mantun nan Upiak danga dari kawan-kawan no di sakola. Dek raminyo urang, indak jadih Upiak mambali sapik rambuik doh, mangeloknyo di dakek urang manggaleh piriang jo galeh didakek pandakian janjang nana rah ka Pasa dagiang lamo. Di tangah janjang tu ado Etek nan manggaleh Gulo-Gulo Tare. Dibali pulo dek Upiak sabungkuih ketek. Gulo-Gulo jaman taisuak kecek Amak. Saisuak urang baparang masuak rimbo kalua rimbo mambaok baka saka nan dimakan takah gulo-gulo supayo badan kuek. Jadi kalau Upiak nio kuek pulo, makan gulo-gulo ko kecek Amak, ndak usah bali gulo-gulo nan di lapau nan sirah-sirah tun. Alah iyo pulo kecek si Upiak. Tibo di muko bangunan pasa nan takah bangunan kuno tu baranti sabana si Upiak malapehan rangah. Disinan dulu Los dagiang kecek Amak, kini ko alah barubah jadi Los maco. Di sabalah kaujuang no ado nan manggaleh baju seken. Sambuah bakaruang-karuang gadang. Lanjuik mandaki manyubarang jalan tu tibo si Upiak dakek Pasa Putiah atau Pasa Wisata. Mulailah banyak nan manggaleh buah tangan untuak dibaok urang ka Rantau. Mulai dari sagalo macam karupuak, mulai dari nan matah sampai nan alah bagoreng siap dimakan sampai bada masiak nan hitam jo nan janiah, sabana langkok. Tapek di subalahnyo, nampak Uni-Uni nan manggaleh pisang kapik. Langkok jo paragaik karambie bagulo jo bameses bagai. Lalu disinan tabaun pulo urang sadang mambaka sate. Agak kamuko ado nan manggaleh jaguang abuih jo katidiang gadang. Upiak bakatauan jo Mama panggaleh jaguang abuih ko. Kok dapek Upiak mahinda jalan disinan, kalau indak salalu dipanggia Mama ko, disuruah mambaok jaguang untuak Abak. Ondeh. Abak lo liak. J Didakek situn banyak nan manggaleh tarompa, kaset lagu Minang sarato baju kaus. Si Upiak lansuang manyubarang parkiran disinan untuak turun ka Janjang Ampek Puluah. Antah iyo ado 40 kolah anak janjang no antah indak, alun lo tacenoi dek Upiak ladoh. Sabalun turun janjang diantaro urang manggaleh pakaian seken, ado Kadai H. Minah nan manggaleh Soto nan baun no sabana mambuek paruik manggareok. Tambah pulo jo es telernyo sarato kadai Ni Lis nan agak ka dalam saketek manyadiokan Pisang baka bakuah santah manih ditambah jo roti gabin. Tapaso si Upiak lakeh turun, kalau indak banyak lo lanjo no di Pasa Putiah tu bikoh. Janjang partamo ketek-ketek agak curam. Sasudah tu mulai laweh-laweh anak janjang no. Suok kida masih bangunan lamo saisuak, tapi ado nan alah baru juo. Ado nan manggaleh kain meteran siso ekspor kabanyo. Jadi murah-murah sajo. Kadang ado nan saribu piah bagai sameter. Agak turun mulai agak rami urang manggaleh tarutamo manggaleh binatang paliaroan. Mulai dari ikan aduan, ayam aduan, buruang aduan sarato binatang-binatang lain nan ditangkok urang. Kadang ado nan mambaok ula gadang bagai. Tapi Upiak suko mancaliak kulinci nan di sangkak marondok-rondok rami-rami. Manyubarang jalan nan sambuah lalu oto aua nan Cingkariak no suko basorak tu. Kadang ado bendi bagai parkir dakek situ. Sasudah malalui bendi-bendi tu, tibolah si Upiak ka tampek parantian Mersi baliak di Pasa Banto . Untuanglah Mersi nan kaditumpangi pulang ka rumah no alah ampia panuah, jadi indak lamo bahangek-hangek manungguan oto ko ka baranjak kalua parantian tun. Wassalam Rina, 35, Batam -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Grup Google. Untuk berhenti berlangganan dan berhenti menerima email dari grup ini, kirim email ke rantaunet+berhenti [email protected] . Untuk opsi lainnya, kunjungi https://groups.google.com/groups/opt_out.
