Assalaamu'alaikum wa rahmatullaahi wa barakaatuhu
Tarimo kasih kkd Asmardi Arbi. Iko ulasan nan sangaik manarik dari kkd. nan
adolah anggota ABRI dan mancaliak pristiwa PRRI agak sarupo jo caro pandang
ambo, bahaso urang-urang PRRI ko 'manggaregak' dek karano ingin mangoreksi arah
perpolitikan di maso itu.
Ado carito lain saketek tantang 'manggaregak' ko, di jaman Umar bin Khaththab
radhiyallhu 'anhu katiko baliau baru dibai'at jadi khalifah manggantian
khalifah Abu Bakar As Siddiq radhiyallhu 'anhu. Tasabuik dalam kisah ado surang
anak mudo nan biaso-biaso saja mangecek ka Umar, ' Wahai Umar, kalau angkau
mamacik amanah ko sasuai jo tuntunan Rasulullah shalallahu 'alaihi wa sallam
ambo ka ikuik ba makmum di balakang angkau. Tapi jikok angkau ka mamarintah bak
nan ka lamak di hati angkau sajo, mako padang ambo ko manabeh lihia angkau.'
Umar nan badanno gadang, nan indak takuik di sia-sia, bahkan katiko baliau ka
pai hijrah manyusul Rasulullah shalallahu 'alaihi wa sallam ka Madinah
mamproklamirkan ka urang Quraisy di masjidil haram sambia mangecek-an; 'Aden ka
barangkek ka Madinah! Kok lai kalian nan ingin anakno jadi yatim, ingin binyino
jadi jando, hadanglah den dek kalian. Aden ka barangkek bisuak pagi.' Iyo indak
ado nan talok mahadang baliau doh.
Lalu, ado anak mudo nan antah sia-sia, manggaregak ka manabeh lihia baliau
kalau baliau salah jalan. Kalau jo emosi lah baliau tarimo 'garegak' 'paja' na
antah sia-sia ko, sakali kalatiak dek baliau mungkin basimbah darah anak mudo
ko. Tapi indak itu nan dikarajoan Umar doh. Baliau hinokkan bana 'garegak' anak
mudo tu.
Baliak ka carito PRRI ko baliak. Nan ambo danga, dan nan ambo caliak maso itu,
urang PRRI ko baliak ka pangkuan ibu pertiwi sacaro baelok-elok. Indak bagai
dikatoan mareka ko sabagai urang nan kalah parang, tapi sabagai dunsanak nan
pulang dari rimbo. Inyiak Sunguik panah manulih baa suasana katiko baliau jo
rombongan ditarimo sacaro elok-elok dalam sabuah upacara di Kiktenggi maso itu,
di akhir paparangan tu. Walaupun karugian mungkin iyo agak banyak di fihak
urang PRRI. Sayangno, urang-urang militer / basanjato dari pihak PRRI lai
aman-aman sajo sasudah itu, walaupun kadinasan mareka sabagian gadang indak
diakui. Balain jo urang-urang tuo pamimpin politik nan langsuang dimasuak-an ka
panjaro dek pamarintah.
Sia nan sabana kalah? Nan bakatabuangan lari dari kampuang halaman sasudah
parang PRRI ko? Adolah rakyaik banyak nan jadi sasi. Nan mancaliak kakejaman
parang. Ditambah suasana politik sasudah itu di maa PKI sabana bagak dan dapek
angin. (bagian iko nan ambo tuangkan dalam carito 'Anak Manusia Korban
Politik'). Iyo angek kaduduak-an kabanyakan urang kampuang, sahinggo tabang
hambua mareka ka rantau.
Kasimpulanno, iyo balain-lain kasimpulan carito PRRI ko tagantuang dari suduik
maa awak mamandang....
Wassalamu'alaikum,
Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Jatibening - Bekasi
________________________________
From: Asmardi Arbi <asmardi.a...@rantaunet.org>
To: rantaunet@googlegroups.com
Sent: Tuesday, September 3, 2013 11:25 PM
Subject: Re: [R@ntau-Net] Re: : Djamaris Chaniago -} masalah PRRI.
Kamda Syaaf jo sanak St.Lembang Alam, sarato sanak dipalanta nah.
Kalau ambo buliah sato bakomentar mako, pabedaan pandapek nan
tajadi disababkan dek suduik pandang nan babeda. Dari suduik
pandang militer PRRI iyo kalah, tapi dari suduik pandang politik
PRRI lai manang, walau indak sacaro lansuang PKI iyo ala bubar jo
dilarang dibumi PS+NKRI. Dari suduik pandang ekonomi baitu pulo
kini kan alah taraso ado perimbangan pembangunan walau alun
panuah.
Soal tradisi keprajuritan ambo sapandapek jo sanak St. Lembang
Alam. Hanyo urang suku Minang sangek dipengaruhi dek kultur,
tabiaso jo budaya demokratis, kasadonyo maraso berhak mangaluakan
pandapek sarupo sato lo mamimpin, itu sababnyo banyak nan indak
namuah jadi prajurit bawahan. suko baretong untuang rugi, kalau
indak saimbang iyo rancak baranti parang, sabab nan kabanyak mati
sanak awak juo, nan karusak nagari iyo nagari awak juo.
Sabananyo dari awal titik barek perjuangan PRRI dibidang tekanan
politik/diplomasi taadok pamarentah Pusek.. Tapi ado unsur asing
nan ingin maambiak peluang jo ma iming2 i bantuan
sanjato/militer., nan tujuan utamonyo tantulah ingin malamahkan
potensi RI nan potensial kamanjadi saingan barek mereka. Nan iko
banyak indak disadari dek pamimpin politik sampai kini, walau alun
saparah urang Arab/Timur Tengah.
Sasudah PRRI urang Minang nan masuak tentara tamasuak banyak
jumlahnyo. Tahun 1962 sajo nan masuak AMN ( Akademi Militer
Nasional ) labiah 30 urang , ado sekitar 5 urang bakeh PRRI nan
dimudokan umuanyo, ado nan masuak dari lua Sumbar, sarupo Syamsu
Djalal dari Cirebon, M.Fikri dari Medan, Yasril Yakub dari DKI,
Ali Amran dari Banduang dan ambo sendiri dari Jogja. Dari jumlah
30 urang itu nan dapek bintang*** 2 urang, bintang ** 5 urang,
bintang* 1 urang. Ambo jo Ali Amran Siddik sasudah lulus AMN
mamiliah masuak Batalyon 401 / Banteng Raiders, di Semarang.
Masuaknyo kami sempat dicurigai sabagai PRRI nan kamambaleh dandam
ka mereka nan pernah terkenal kejam waktu PRRI. Batalyon ko pernah
dipimpin dek Letkol Untung salah satu pemimpin pemberontak
G30S/PKI.
Iko sekedar maramikan sajo
Wassalam,
Asmardi Arbi
--
.
* Posting yg berasal dari Palanta RantauNet, dipublikasikan di tempat lain
wajib mencantumkan sumber: ~dari Palanta R@ntauNet~
* Isi email, menjadi tanggung jawab pengirim email.
===========================================================
UNTUK DIPERHATIKAN, yang melanggar akan dimoderasi:
* DILARANG:
1. Email besar dari 200KB;
2. Email attachment, tawarkan & kirim melalui jalur pribadi;
3. Email One Liner.
* Anggota WAJIB mematuhi peraturan (lihat di http://goo.gl/MScz7) serta
mengirimkan biodata!
* Tulis Nama, Umur & Lokasi disetiap posting
* Hapus footer & seluruh bagian tdk perlu dlm melakukan reply
* Untuk topik/subjek baru buat email baru, tdk mereply email lama & mengganti
subjeknya.
===========================================================
Berhenti, bergabung kembali, mengubah konfigurasi/setting keanggotaan di:
http://groups.google.com/group/RantauNet/
---
Anda menerima pesan ini karena Anda berlangganan grup "RantauNet" dari Grup
Google.
Untuk berhenti berlangganan dan berhenti menerima email dari grup ini, kirim
email ke rantaunet+berhenti berlangga...@googlegroups.com .
Untuk opsi lainnya, kunjungi https://groups.google.com/groups/opt_out.
