Tambo dan Silsilah Adat Minangkabau (Versi Gurindam) bag 3 Karya : Y.Jambak
Kalau dek pandang sapinteh lalu Lah banyak paham nan taguliciak Pandai tak rago dek baguru Niat tak kunjuang ka nan baiak Sadangkan baguru kapalang aja Lai bak bungo kambang tak jadi Kok kunun dapek dek mandanga Di dalam indak ba halusi Karuak kok tak sahabih gauang Ma awai kok indak sahabih raso Banyak pahamnyo nan tak langsuang Batuka dari mukasuiknyo Sabab karano dek baitu Timbualah niaik cinto hati Nak marunuik tambo nan dahulu Sajarah adat nan usali Hambo nan indak cadiak pandai Hanyo manjawek dari guru Pituah guru dipaberai Nan jadi paham jo ulemu Sangajo gurindam diuraikan Kahadapan dunsanak nan basamo Untuak nak samo dipikiakan Nak samo dirunuik tujuannyo Manuruik warih nan dijawek, kato pusako nan ditoloang Kok alun di barih nan bapahek Alun di takuak nan batabang Kaba usali nan dahulu Carito turun tamurun Manuruik urang nan tau Sabalun barabalun Takalo maso dahulunyo Bamusim maso sa isuak Manuruik carito dalam tambo Manuruik kaba dari Datuak Katiko langik basintak naiek Samaso bumi mahatam turun Gunuang sagadang talua itiek Rimbo alun lai ba daun Tanah darek alun lai leba Lauik baru sacampak jalo Alun bajawa ba sumatera Alun banamo pulau paco Lorong dek niniak muyang kito Asa jo usuanyo kok di urai Didalam si tambo lamo Sapiah balahan tigo jurai Sajurai ka banua Ruhum Baliau nan tuo Maharajo Alif Urang nan pafam sarato ma’fum Urang nan bijak sarato arif Sajurai ka banua Cino Baliau nan tangah Maharajo Dipang Pandai badagang ba niago Ba alam leba ba padang lapang Sajurai ka Pulau Ameh paco Maharajo Dirajo nan paliang bungsu Urang nan cadiek candokio Ba budi sarato ba ulemu Loroang dek Sutan Maharajo Dirajo Lamo taniat di dalam hati Nak balayie manyonsoang maso Di tangah lauik ndak batapi Mako balayielah dandang nan sabuah Cukuik jo Cati Bilang Pandai Langkok sarato jo anak buah Dandang ba anjuang ba mahligai Dek lamo dandang balayie Di dalam lauik baharulah Babilang maso bacamin ayie Di samudera antah barantah Tampak lah api ta ijok-ijok Gunuang suatu maso itu Nan jauah samakin dakok Samakin jaleh nan di tuju Sinan sirangkak nan badangkuang Sinan buayo putieh daguak Lah turun layie di angkek dayuang Lah marapek dandang masuak Di bukik patah patigo Banamo bukik siguntang Bak bunyi pantun dalam tambo Pantun asli urang minang Dari mano asa titiek palito Di baliek teloang nan batali Darimano asa niniek kito Turun di puncak gunuang marapi Basambuang -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Google Grup. Untuk berhenti berlangganan dan berhenti menerima email dari grup ini, kirim email ke [email protected]. Untuk opsi lainnya, kunjungi https://groups.google.com/d/optout.
