Sikola Datuak August 12, 2014 7:48 am | Published by sgl17 | No comment ’35 Ribu Ninik Mamak di Sumbar Hanya Tamat SD’. Itulah barita nan dibaco dek Udin Kuriak di palanta lapau Uwo Pulin pagi kapatang. Barita bantuak itu mambuek Udin agak tamanuang. Dalam pikirannyo, iyo masih banyak niniak mamak di Minangkabau ko nan pandidikan atau sikolanyo masih randah. “Baa aka ko Tan, anam puluah parsen niniak mamak atau datuak-datuak awak cuma tamaik es-de,” kato Udin. “Tamasuak Mak Pono ciek ndak?” Semba Ajo Tondeh. “Ops, buruak bantuak iko den lai tamaik juo es-em-a mah Jo. Sumbarang tuduah se,” baleh Mak Pono. “Hehehehe, den sangko masuak,” sambuang Ajo. “Pandapek den, walau pandidikan atau sikola datuak-datuak awak tu banyak nan randah, tapi soal adaik jo budaya indak ka bisa dek awak malawan doh. Apolai masalah pidato-pidato adaik, sabana lanca dek baliau-baliau tu,” kato Mak Pono baliak. “Batua Mak. Soal adaik jo budaya, lah manjadi pakaian sahari-hari dek baliau-baliau tu, indak talok dek awak malawan doh. Tapi kalau awak hubuangkan jo kamajuan zaman dan kamajuan teknologi, ambo raso nan manjadi niniak mamak atau datuak tu paralu manyasuaikan supayo indak dikicuah se dek kamajuan nagari ko. Apolai kini, anak jo kamanakan lah main internet se sahari-hari, tantu capek informasi masuak,” kato Tan Baro. “Ka disuruah main pesbuk lo niniak mamak tu Tan Baro?” Semba Ajo Tondeh. “Indak itu mukasuik ambo doh Jo. Jan sumbarang manyumbek se, beko tasumbek di lubang basipasan, baru tararau. Nan ambo mukasuik tu, ilimu pangatahuan niniak mamak awak tu paralu manyasuaikan jo kamajuan zaman supayo indak gampang dikicuah dek anak jo kamanakan. Ciek lai, supayo indak kaku dalam manjabarkan masalah budaya. Iko manyangkuik adaik nan babuhua sentak,” kato Tan Baro. “Den sapandapek jo Tan Baro, tapi niniak mamak awak di Minangkabau kan punyo palsafah anak dipangku, kamanakan dibimbiang, urang kampuang dipatenggangkan. Nah, karano umua nan indak mamungkinkan untuak basikola tinggi-tinggi, tantu disikolakan kamanakannyo tinggi-tinggi dan kamanakan itulah beko nan ka malanjuik-an warih. Jadi, indak mungkin pulo kamanakan mangicuah mamak doh,” mangecek pulo Angah Piyan. “Jadi diansua-ansua mah yo Ngah. Dari niniak turun ka mamak, dari mamak turun ka kamanakan. Kok lah turun pulo gala jo pusako ka nan basikola tinggi, tantu samakin banyak datuak awak nan ebat,” potong Uncu Labai. “Iyo, salasai karajo dek diansua Ncu. Kan kini sadang balansuang regenerasi namonyo,” kato tan Baro. “Iyo pulo kato Tan Baro tu mah Din. Nan tamaik es-de tu den raso nan gaek-gaek. Tapi kok nan mudo-mudo pasti lah basikola tinggi. Samati-mati angin, tamaik es-em-a. Malah kini lah banyak pulo datuak atau niniak mamak nan basikola tinggi sampai bagala doktor bagai,” Inyiak Kurai indak pulo katinggalan mangaluakan pandapeknyo. “Heheheh, kok nan tuo-tuo tu bilo lo ka basikola tinggi. Sangkek itu negara ko sadang kacau mah. Ado juo nan tamaik es-de mujua mah. Karano salain dek masalah kaamanan negara katiko tu, juo tasangkuik jo pakaro paruik. Ijankan untuak basikola, untuak makan se katiko itu lah payah,” kato Kari Garejoh. “Jadi awak indak paralu pulo baibo hati atau prihatin sarupo di koran tu. Mustinyo bangga awak kini banyak niniak mamak awak nan basikola tinggi dan lah sarjana. Juo bangga ka nan tuo-tuo tu, bisa mampatahankan adaik jo budaya dalam kondisi kamajuan dunia bantuak kini,” sambuang Inyiak. (eSPe St.Soeleman)
http://hariansinggalang.co.id/sikola-datuak/ -- *Wassalam* *Nofend St. Mudo37th/Cikarang | Asa: Nagari Pauah Duo Nan Batigo - Solok SelatanTweet: @nofend <http://twitter.com/#!/@nofend> | YM: rankmarola * -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Google Grup. Untuk berhenti berlangganan dan berhenti menerima email dari grup ini, kirim email ke [email protected]. Untuk opsi lainnya, kunjungi https://groups.google.com/d/optout.
