Assalaamu'alaikum wa rahmatullaahi wa barakaatuhu Walau awak sakampuang tapi dek umua agak jauah babedo, mako balain pulo pangalaman awak pakaro tadaruih ko nyiak. Ambo tingga di kampuang sampai kalas tigo SMP, biaso sato tadaruih di musajik Koto Tuo. Lai lo kawan dari Ampang Gadang nan mangecek-an biaso pai tadaruih balega ka kampuang lain, tapi angkatan ambo di kampuang indak ado nan mangarajoan sarupo itu do. Kami samo kami sajo tadaruih di musajik. Dan indak ado lo acara katam tadaruih makan gadang jo gulai kambiang do. Tiok malam biasono ado urang maantaan pabukoan untuak kami nan sato tadaruih.
Tadaruih ko makin batambah hari puaso, makin lamo kami tingga di musajik. Mangajino iyo baganti-ganti, masiang-masiang mambaco sa'ain'. Katiko ambo tingga di Baliakpapan, kami biaso sumbayang tarawiah dari rumah ka rumah sasamo karyawan. Jadi indak ado acara tadaruih. Ambo biasono mangaji sajo surang di rumah pulang sumbayang tarawiah. Tapi ambo tahu bahaso di musajik Istiqamah di Baliakpapan, urang ado tadaruih. Sajak pindah ka Jatibening di akhir taun 1993, di musajik komplek kami tatap ado tadaruih ko. Di malam-malam partamu sampai malam ka duopuluah sa juz sajo tiok malam. Nan mangaji, walaupun alah tuo-tuo, tapi ado nan baru baraja mangaji, mambaco tatatiah-tatiah. Tapi ambo manyaksikan babarapo urang dari apak-apak ko nan muloi baraja mangaji babarapo tahun nan lalu akhirno lanca juo kajino. Muloi malam 21 kami mangaji sampai wakatu sahur, kadang-kadang diselingi jo diskusi. Jadi rato-rato sabulan Ramadhan tamaik paliang indak duo kali mambaco al Quran. Di musajik komplek kami ko iyo lai lo juadah katam tadaruih nan dibuek dek jamaah ibu-ibu. Dan harino katiko jamaah ibu-ibu mangatamkan bacaan mareka. Kami apak-apak sato makan-makan no sajo, walaupun kami biasono alah katam sahari sabalun ibu-ibu ko. Biasono makanan sederhana sajo sarupo nasi soto. Jadi indak jo gulai kambiang juo do. Baa kaadaan urang batadaruih di kampuang awak kini kurang jaleh di ambo. Baru ka sadar awak bahaso sajak maninggaan kampuang di tahun 1970 ampia indak panah lai ambo manjalani puaso di kampuang.... Wassalamu'alaikum Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi -------------------------------------------- On Sun, 6/21/15, Sjamsir Sjarif <sjamsirsja...@gmail.com> wrote: Subject: [R@ntau-Net] Tadaruih To: rantaunet@googlegroups.com Date: Sunday, June 21, 2015, 11:58 AM Dek carito Dearborn lah panjang amek, ado masalah nan ingin Makngah tanyoan saketek. Iko manyangkuik juo jo masalah speaker pangareh suaro. Dahulu katu Makngah ketek-ketek kami "tadaruih" di surau. Di kampuang banyak surau, kami acok balega tadaruih ka surau-surau nan dakek-dakek. Lamaknyo tadaruih ko bilo lah tibo khatam tadaruih, makan gulai kambiang basamo-samo. Eloknyo juo khatam tadaruih ko wakatunyo indak samo sahinggo awak pun dapek makan kambiang dalam malam nan babeda. Dalam praktek tadaruih di tiok surau kami, partispant duduak kuliliang baco Al Quran kareh-kareh balega sambuang manyambuang ayat. Sampai akhir-akhir puaso tammat dan khatam tadaruih. Nah tanyo MakNgah: Apokoh tadaruih ko ado di kampuang awak sajo. Baa di rantau kuliliang saroman rantau rancak tanah Jawo misanyo? Apokoh tadaruih ko budaya lokal? Mangko baitu tanyo Makngah, di rantau jauah Makngah indak ado mancaliak urang tadaruih doh. Sadangkan mambaco Al Quran kareh-kareh sajo perseorangan indak ado doh. Urang baco Quran dalam hati sajo sambia angguak-angguak atau geleng-geleng surang. Dahulu Makngah indak tahu, masuak suatu musajik Makngah baco Quran basuaro indak kareh bana doh. Tapi urang mambasuik "ssssst" jo isyarat jan mahiruak! Mangganggu urang! Awak mangaji dikecekkannyo mahiruak. Makngah baco astagfirullah sajo... Salam, -- Makngah Sjamsir Sjarif -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet~ * Isi email, menjadi tanggung jawab pengirim email. =========================================================== UNTUK DIPERHATIKAN, yang melanggar akan dimoderasi: * DILARANG: 1. Email besar dari 200KB; 2. Email attachment, tawarkan & kirim melalui jalur pribadi; 3. Email One Liner. * Anggota WAJIB mematuhi peraturan (lihat di http://goo.gl/MScz7) serta mengirimkan biodata! * Tulis Nama, Umur & Lokasi disetiap posting * Hapus footer & seluruh bagian tdk perlu dlm melakukan reply * Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/ --- Anda menerima pesan ini karena Anda berlangganan grup "RantauNet" dari Google Grup. Untuk berhenti berlangganan dan berhenti menerima email dari grup ini, kirim email ke rantaunet+unsubscr...@googlegroups.com. Untuk opsi lainnya, kunjungi https://groups.google.com/d/optout.
