Assalaamu'alaikum wa rahmatullaahi wa barakaatuhu
Bukik Tinggi
Pakan nan lapeh ambo pulang. Lalok di Bukik Tinggi ampek malam. Karano ado
hajat. Adokaparaluan. Nanpartamu, ipa ambo baminantu. Nankaduo ado karajo
gadang nan alah sajak lambek dimuloi di kampuang. Alah baransua jaleh juo.
Insya Allah taun ko alah ka dimuloi manjalankan karajo nan alah dirintis sajak
lamo tu.
Ikolah laporan pandangan mato nan iyo paralu ambo sampaikan. Alah ado kamajuan
tampak di ambo.
Di Bandara, ambo ambiak taksi. (ampek bulan nan lapeh ambo di japuik dunsanak
sapupu dan diantaanno pulo baliak ka bandara). Aturan taksi alah sarupo jo di
Tabiang daulu, ado tampek awak mamasan taksi. Lai jaleh ongkoih nan ka dibayia
sajak samulo. Untuak ka Bukik Tinggi dalam kotaongkoihno Rp 220,000. Arago ko
baru sajo naiak dari 185,000 sabalun BBM naiak. Biaya sakitu itu mungkin agak
sabandiang sajo jo arago di Jakarta, muskipun di Jakartaawak mabayia sasuai jo
argometer. Tapi manuruik pandapek ambo bapadananlah. Onkoih ka
kotaPadangmanuruik carito supir taksi Rp 100,000, untuak jarak 20 kilo labiah,
labiah kurang sapadan bana juo jo arago di Jakarta. Dari carito supir taksi,
argometer memang indak jalan di Padangatau di Bukik Tinggi do (walau alaik tu
lai tapasang di oto). Ongkoih dalam kotaminimum 20,000. Paralo baago-ago
sabalun naiak.
Sabalun naiak taksi, dek alah bapangalaman, ambo jalehi bana di counter taksi
tu nan bahaso taksi lai ba AC. Alhamdulillah lai. Sabab ambo alah bapangalaman
soal nan ciek ko.
Layanan angku supir taksi standar sajo. Lai paota dan lai lamak otano. Katiko
ambo ajak sato makan (alah pukuah satangah tigo siang, di pesawat kami indak
dapek apo-apo), amuah no sato dan itu sah-sah sajo. Bahkan diambiakno lo rokok
sabungkuih, dietong sajo biko pak, ambo indak ado pitih ketek, jano. Indak
bagai juo di ambo do. Bahkan mambayia ongkoihno indak ambo kurangi saketek juo
doh.
Kami manginap di mes PLN di jalan Luruih (jl A. Karim). Mambayia antaro 90,000
jo 135,000 samalam. Nan buliah manompang nan ado karik barik jo urang PLN. Ipa
ambo nan baminantu ko pansiunan PLN. Mes ko sadang-sadang elok sajo, lai
barasiah. Di ambo nan katuju bana dek talatak persis di muko musajik Nurul Haq,
dakek ambo pai sumbayang.
Catatan nomor satu nan paralu bana ambo pelok-i, indak ado lai tadanga bunyi
bakatintam-katintam tangah malam di Bukik Tinggi. Dulu katiko kami manompang
pulo labiah kurang 5 tahun nan lapeh di mes ko, bunyi tu nan mamakak bana.
Mariangik bana rasono, bunyi heboh nan tadanga sangaik kareh nan konon kalua
dari diskotek. Manyumpah-nyumpah ambo katiko itu. Alhamdulillah rupono alah
lamo baranti, baitu manuruik informasi patugas mes PLN ko.
Bukik Tinggi rami jo oto BM (dari Pakan Baru). Badirik-dirik parkir di
maa-dimaa. Tampek parkir basalingkik. Ongkoih parkir 2000 sakali tagak, indak
ado kuricih. Patugas parkir indak babaju saragam bagai doh.
Pasa ateh indak ado parubahan, becek, kumuah. Urang awak maraso sangaik biaso
sajo manyampak-an sarok sakandak ati. Mungkin dalam pikiran mareka, biko ado
tukang sapu nan ka mambarasiahan. Adodaun bungkuih sate basalemak sajo
tacampak, bukan di tampek sarok. Ambo indak singgah di kadai nasi Kapau uni
Lis, nan sakali ko (maklum dalam susana baralek). Tapi carito ipa ambo, kadai
tu alah barubah kini dari segi raso sarato arago. Indak sarupo daulu lai. Makan
ampiang badadiah lai balakik-an juo. Nandi tangah pasa.
Jalan di muko Bank Nasional (sambungan dari jalan kampuang Cino jo jalan luruih
arah ka tembok) jadi pasa lambuang di malam hari. Macam-macam galeh urang. Nasi
goreng, sate, bakso, konon ado pecel lele bagai tapi indak nampak diambo.
Adonan manggaleh bandrek bagai. Banyak pulo warnet di sabalah kasuok jalan.
Panginapan cukuik banyak dan umumno panuah. Sajak dari kelas The Hills (ex
Novetel) sampai ka kelas melati. Adociek hotel di ateh ngarai, lupo ambo namono
nan kabano jadi langganan urang Malaysia.
Ari Akaik tanggal 6 Juli kapatang ari alek Katam Kaji di Bukik Tinggi jo
sakitarno tamasuak di kampuang ambo. Lai talakik mancaliak arak-arak katam kaji
nan heboh jo drum band sarato rabano. Masih sarupo itu juo.
Ampek malam di Bukik Tinggi, ampek kali ambo pai minum pagi ka Garegeh, ka
lapau langganan ambo nan katanno lamak kamek dimakan jo goreng pisang rajo
(salalu pisang rajo). Lapau ketek nan indak barubah sajak ambo singgah di taun
1990. Nanbarubah di balakang lapau tu kini alah tagak rumah tembok cukuik
rancak. Palanta kadaiko jadi hiasan blog ambo di Blogspot.
Bukik Tinggi di wakatu subuah adolah Bukik Tinggi nan syahdu. Azan subuah duo
kali. Nanpartamu pukuah satangah limo, ka untuak panjagoan urang lalok.
Nankaduo katiko masuak wakatu, pukuah limo. Ari Jumaik subuah, ambo lakik-an
pai sumbayang ka musajik raya, lalu ka janjang Minang. Sabab satau ambo,
sumbayang subuah di musajik ko imam mambaco surek Alif Laam Miim Tanzil jo
ayaik sajadah. Iyo lai sarupo itu juo. Jamaah subuah indak sampai duo puluah
urang apak-apak doh. Sasudah sumbayang subuah ado wirid (pangajian). Pagi ari
kaduo jo sataruihno, dek urang rumah manuruik nak pai ka musajik samantaro
awakno indak kuaik mandaki janjang, kami sumbayang di musajik Nurul Haq, persis
di muko panginapan. Pulang sumbayang, komentarno, rupono ado juo NU di
Bukiktinggi ko. Sabab imam mambaco qunut katiko sumbayang. Kecek ambo, disiko
indak NU namono doh, tapi PERTI. Jamaah subuah di musajik Nurul Haq agak labiah
banyak pado nan di musajik raya. Adokiro-kiro 30 urang
dan jamaah ibu-ibu mungkin lai sabanyak itu pulo.
Lembang Alam
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
