Minggu nan lalu kami sempat pulang ka kampuang baliak (untuak urusan
dinas sabananyo...)
Barangkek dari Jakarta jo Garuda jam 6 pagi. Dari jam 3 subuah alah kalua dari
rumah, sampai di Padang jam 7.45. Bakarjo sabanta di kantua cabang padang,
dilanjuikkan ka cabang solok.
Salasai di cabang solok, malam harino tibo di bukittinggi. Saharian di
Bukittinggi, bisuak pagi no lah haruih barangkek pulo ka bandara MIA untuak
baliak ka Jakarta, karano alah manunggu pulo karajo di kantua hari itu.
Subuah dari Bkt, tibo di bandara MIA jam 7.55 (jam 8 kurang 5 menit).
Kapatabang tu lapeh landeh pukua 8.20 tatulih di tiketno. Namun sabalunno alah
bakontak kawan di Padang, untuak minta tolong di "cek in" kan dulu, untuak
antisipasi kalau agak talambek tibo. Kawan nan alah mancek in kan tadi
mengecekkan alah diagiah nomor sit ndek patugeh garuda tu, tingga manunggu KTP
nan kabarangkek sajo lai, untuak mamastikan nyo maagiah boarding pass.
Tapi a nan tajadi?? Counter tampek cek in dun alah batutuik 5 menit nan lalu.
Kami indak buliah lai naiak ka pesawat (walaupun pintu pesawat masih mangango
dan barang-barang bagasi alun salasai masuak sado alahno lai). Anak gadih
rancak nan batugeh di counter tu masih akan bausaho untuak malayani, karano ano
memang alah mamacik boarding pass nan ano siapkan cako wakatu kawan man cek in
kan.
Tapi disampiang no tagak dengan sangaik aroganno, seorang apak-apak nan mamakai
papan namo berlambang patugeh bandara (angkasa pura)..kami sabuik arogan karano
mangecek indak ado sopan-santun no doh...sangaik kasa ditalingo kami.
Dengan mamburanguih ano mengecekkan bahaso indak buliah lai naiak pesawat
karano counter alah batutuik, pesawat alah panuah, tiket alah bajua kasadono,
sahinggo ndak ado tampek lai untuak ibuk sekalipun ibuk indak mambao barang
bagasi........??? Dengan tanang kami jalehgan sagalo halno, namun indak ciek
juo nan didangano doh, nan dino sen nan badanga....(apo mungkin ndek kami
tanang sen ano tambah manjadi-jadi mancaliakgan "sia aden" no?). Batigo urang
kami nan mangalami hal itu, nan baduo li bantuakno mahasiswa,disuruah no
manjadi penumpang cadangan untuak sore hari. Mahasiswa dun punyo tiket jenis K,
untuak barangkek beko sore (jam 19) harus manambah mambaia karano tiket nan ado
untuak jenis Y (tapurangah kadua mahasiswa dun) Samantaro kami nan punyo tiket
Y dicadangkanno di M tapi ndak dipulangkan kalabiahan uang tiket no
doh....(antah a lah mukaisuik no go.....)
Akhia kato kami mangalah sen li, karano memang talaik 5 menit dari katantuan
cek in. Bacari sen tiket lain, Walaupun penerbangan pagi dun sangaik padek,
alhamdulillah lai ado nan malapangkan jalan, dapek pesawat lion jam 9.50. kami
barangkek, tiket garuda cako baagiahkan ka kawan nan maantakan, kalau lai bisa .
Sapaningga kami, kawan nan manarimo tiket dun indak sanang ati diuruih no ka
pimpinan garuda satampek.... akhiano urang garuda dan urang bandara dun minta
maaf ateh perlakuan patugehno, dan pitih tiket diganti no sapanuahno di urang
garuda dun.
Setelah duduak di pesawat, kami senyum-senyum surang sen. Alhamdulillah tadi
lai bisa jo saba maadok i urang nan mamburanguih dun....
Takana kecek ibu, "kalau kita suka memberi kemudahan kepada orang lain, maka
percayalah bahwa Allah pun akan suka memberi kemudahan buat kita, tapi
sebaliknya, bila kita senang mempersulit orang lain, maka diri kitapun
cenderung akan selalu mendapat kesulitan".....
Sambia senyum-senyum di pesawat kami bapikia untuak introspeksi diri, mungkin
kami mandapek kesulitan hari iko karano kamipun pernah indak sangajo mampasulik
urang lain... dan diberi kemudahan juo bisa mandapek tumpangan lain, karano
kami pernah pulo malapangkan urang........ mudah2an lain kali kami labiah
banyak malapangkan jalan urang dari pado mampasulik urang.............
Jakarta, 20 Agustus 2008
Deded
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
