Dunsanak di Palanta nan Ambo hormati, ambo kirimkan "guritiak dari Palanta Mak
Sati" khususnyo untuak urang awak nan manjadi "wong kito" nan sadang praktek
bademokrasi langsung model di tampek tingga "Mak Ngah".
Pesta demokrasi iko babeda jo adagium adat Minang Kabau nan menyebutkan:
Kamanakan barajo ka mamak, mamak barajo ka pangulu, pangulu barajo ka mufakat,
mufakat barajo ka alua nan patuik.
Catatan:
Tg.
4 September 2008 akan dilaksanakan pemilihan Gubernur Sumatera Selatan, dimana
kedua calon tersebut adalah urang awak kaduonyo.
Calon
nomor urut 1 ialah: Dt. Sri Paduko Bagindo H.
Alex Nurdin (mamak).
Calon nomor urut 2 ialah: H.
Syahrial Oesman glr. Tuanku Bagindo nan Kayo (sumando)
Kedua calon ini didukung
oleh tim sukses yang bernama: Kinantan Center
(Alex Nurdin) dan Gumarang Center (Syahrial Oesman).
Kedua
tim sukses ini saling memperebutkan suara orang Minang yang jumlahnya cukup
banyak di Sumsel, maka sering tajadi perbedaan pandapek sasamo awak.
Dan inilah pesan-pesan Mak Sati dari palantanyo.
DIALOG PILGUB
SUMSEL
di PALANTA
MAK SATI
Hari lah pukua sambilan. Palanta Mak Sati lah tabukak,
ruang partamuan lah rapi, si Usuik regah malayani tamu malatakkan aia sarobaek,
teh, kopi sasuai jo kandak urang nan tibo. Nan
hadir iyolah urang-urang bagehe.
Oto kijang kapsul mamasuki
pakarangan palanta. Dari dalam oto kalua
Mak Sati diiringi urang-urang nan labiah bagehe, mereka manjapuik Mak Sati.
“Assalamualaikum”. Mak Sati
masuak ka ruangan partamuan.
“Alaikumsalam” nan di dalam sarantak manjawaok. Sado nan hadir
lah duduak. Mak Sati lansuang maambiak posisi di kurisi tinggi, di tampaek nan
biaso baliau mambarikan wejangan.
“Assalamualaikum” Mak Sati mangulangi salam sambia mangucap
kan tarimo
kasih, mamanciang hadirin/juru bicaro untuk manyampaikan mukasuik.
Sutan Pamenan mamburangkik
tagak. Sasudah mambukak kecek pandahuluan inyo langsuang ka pokok masalah.
“Mak Sati nan kami sagani, tema
kadatangan kami kamari kiniko iyolah PAMILIHAN GUBERNUR nan babarapo hari lai
kabalansuang. Dalam hal ko kami mintak pangarahan Mak Sati, baa maadoki
PAMILIHAN
GUBERNUR kiniko. Parsoalannyo iolah kaduo Cagub ko nan diawak bana kaduonyo.
Surang Mamak, nan
suranglai Rang Sumando. Di kida lamang, di suok tapai, namaa nan kadikaca, atau
supayo adia, awak GOLPUT sajo. Itu sajo Mak sati, nan lain biasa sajo.”
“Lah sampai di Menan tu?”. Jawab Mak Sati.
“Kok itu materinya, untuak pamacahannya ambo bao
duo termen. Partamo Mak Sati basurah; angku-angku manyimak. Nan kaduo
Angku-angku batanyo, ambo manjawaok”
“Kami satuju, silahkan Mak Sati”, Sutan Pamenan
manyilakan Mak Sati.
Mak Sati mulai mangecek. “Mudah-mudahan
karajo awak ko bamanfaat ka sagalo urang, jan sampai minyak abih samba ndak
lamak, arang abih basi binaso. Partamo ingek filsafat urang awak. Dima bumi di
pijak
disinan langik dijunjuang. Urang Minang indak buliah Golput. Golput itu indak
watak urang Minang. Urang Minang harus arif bijaksano, tahu diribuik ka
mandingin, tahu di dahan ka maimpok, baa urang, baitu pulo awak”.
Ajo Udin manunjuak, nampaknyo nak
mangecek pulo. “Silakan Ajo Udin” kato Mak Sati.
“Tatanggo awak di subarang ulu, duo baradiak
kanduang. Namonyo Hilman jo Cik Wi. Nan surang wae
ka ingkin, nan surang ka mayi. Baa pulo tu Mak Sati” Kato
Ajo Udin.
Jawab Mak Sati; ”Tatanggo ajo
Udin tu kaluarga urang cadiak. Pisaunyo, pisau
sirawuik, tajamnyo ujuang pangka, indak ujuang, pangka manganai. Caro urang
bakoa, inyo coki duo nokang. Kalau kecek anak mudo kini, kiri-kanan OK. Ndak
baa tu doh. Kapalo samo babulu, nan pandapek balain-lain”.
“Nan
sarupo tu diawak urang Minang lah ado pulo. Kinantan jo Gumarang, inyo duo
baradiak. Kinantan Centre pai jo Alek Noerdin, Gumarang Centre pulang jo
Syahrial.
Sia juo nan tapiliah, urang awak tataok manang.”
Nan hadir batapuak tangan
sadonyo, angek ati tamasuak kalompok urang cadiak. Mak Sati manaruihkan
wejangannyo. Kato Mak Sati.
“Dalam hal nan
sarupo iko, ado nan haruih kito jago,
1.
Sabarih kaji nan batikai,
jan Surau ditinggakan.
2.
Surang sumando, nan surang mamak. Urang sumando kato
malereang, kamanakan saparentah mamak. Itu artinyo samo jo di kida lamang di
suok tapai. Samo lamak kaduonyo. Nan paralu kito hati-hati. Bak maelo rambuik
dalam tapuang. Rambuik jan putuih, tapuang jan taserak. Mamiliah, jan dikaji
cacek urang, tapi lieklah kahebatannyo. Jan mamiliah nan saketek buruaknyo,
tapi piliah nan banyak eloknyo. Mamiliah
gunokan hati nurani, supayo jan tapiliah baruak Piaman.
3.
Kok tibo urang
marayu, awak lah punyo pilihan hati nurani, jan tagang mananggapi, iyokan nan
diurang, lakukan nan di awak.
Kok nyampang tapiliah nan sasuai jo harapan awak, jan
sakali-kali maajan tuah, ingek bahasa Arab Minang Buya Hamka. Ahajjanu tuahu,
tafancara cirtuaha. Aratinyo; kalau tuah
diajan, cirik nan tapanca.
Sakian
dulu, awak masuak termen ka duo, BATANYO DAN KOMENTAR.
“Ambo ciek Mak Sati” kato Indomo.
“Silahkan Domo” Mak Sati
mampasilakan.
“Ambo tatariak jo pribahaso Mak
Sati tadi. Sabarih kaji batikai, jan surau
ditinggakan. Kama tembaknyo tu Mak Sati? tanyo Sutan Indomo.
Jawaok Mak Sati; “Nan surang ka ingkin,
nan surang ka mayi. Nan surang piliah iko, nan lain piliah etan. Karano beda
pilihan, awak
mamutuihkan silaturrahmi. Supayo angku-angku tau, kiniko antaro Kinantan Centre
jo Gumarang Centre lah banyak nan indak basapoan. Iko indak buliah tajadi. Jan
Surau ditinggakan. Nan paralu diingek, usah
tatompang dibiduak tirih. Piliahlah parahu gadang. Biduak tirih maadang
karam, jo biduak gadang salamaik badan ka subarang.”
St. Marajo manunjuak jari pulo ka
ateh. “Silahkan
Marajo” Kato Mak Sati.
“Apo pulo mukasuiknyo, bak cando Baruak
piaman?” Tanyo Marajo ka Mak Sati. Mak Sati manjalehkan. “Bak cando baruak
piaman,
Baruak piaman tu gadang-gadang. Patuahnyo bapindah-pindah ka bakeh nan
mairiknyo. Katiko awak mairiknyo, inyo mancapak-capak, tando patuah ka awak.
Kutiko
diirik urang lain, awak dicibiakannyo”.
“Ambo ciek Mak Sati.” Mangkuto
mintak wakatu pulo.
“ Taruih lah Mangkuto” Jawaok Mak
Sati.
Tanyo Mangkuto: ”Baa bana
contohnyo urang maajan tuah tu, toloang jalehkan Mak Sati!”
“Urang maajan tuah. Karano tuahtu
indak ado, nan ado cuma cirik, mako cirik nan ka lua. Aratinyo, urang nan sok
bajaso, maaguang-aguangkan dirinyo, lupo jo asa muasanyo”.
Saharuihnyo kita pakai
pribahaso, “CABIAK-CABIAK BULU AYAM”
“Sia lai”, tanyo Mak Sati.
Peserta cukuik pueh. Sutan Pamenan tagak sambia
menutuik partamuan. “Partamuan awak cando bagarah-garah, tapi di kami nan hadir
mambuka wawasan dan pikiran, Assalamualaikum. Wr. Wb.
Sado
nan hadir tampak basalaman mesra jo Mak Sati. Si Usuik indak dilupokan karano
alah malayani tamu jo aie sarobaik.
Abraham
Ilyas 63th.
Untuk
guritiak dari Mak Sati lainnya, silakan lihat di www.nagari.org dan
www.nagari.or.id
-
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
