Manolah Mak Tan Lembang,
Ambo raso alah banyak masukan dari nan lain, nan ambo manambahkan sajo, nan
bantuak dan buninyo sabananyo samo, namun saketek lain dalam pengungkapan.
Kalaulah suami-istri itu lai sakampuang halaman, memang rancak bilo
dimanfaatkan tanah nan alah baganggam bauntuak bagi istrinyo itu. Kalau iko
ambo raso indak ado persoalan.
Kalau istrinyo itu balain kampuang, namun suami itu nak nio tinggal di tanah
mandeh, ado duo pandapek ambo :
Pertamo, kalau sekedar sepetak tanah untuak perumahan, lai dapek diusahokan.
Penjelasan ambo sampaikan berikut.
Kaduo, bilo nak diusahokan tanah labiah untuak perumahan misal untuk
tani/ladang, iyo tapakai kaji nan alah disampaikan Dt. Rajo Suleman.
Nan partamo tadi, ambo takana jo buya ambo almarhum, beliau menimbang kapado
kamanakan-kamanakan beliau nan kawin kalua, kok lah indak basosok bajurami,
barumah batanggo di kampuang halaman. Karono inyiak nan lai batanah laweh
basawah banyak, ado saketek tanah nan rancak untuak ka jadi perumahan. Dek buya
badunsanak lai sapakek bilo tanah itu dipagunokan oleh kamanakan beliau untuak
dibuek dangau, kalau-kalau sewaktu-waktu pulang ka kampuang lai barumah.
Jadi memang paralu timbang raso mamak-bundo sakaum sarato izin dari penghulu
andiko untuak mewadahi kamanakan nan kawin kalua sarato membina anak pisang
(batih). Adopun ulayat tetap dipegang oleh kaum tersebut, dan indak dapek
digadai atau diseokan oleh kamanakan dan anak pisang itu kapado pihak lain.
Ukuran saparumahan ambo raso dapek ditentukan di dalam kaum, misalnyo 100 m2,
sasuai keadaan.
Baitu kiro-kiro Mak, tambahan masukan dari ambo.
Wassalam,
-datuk endang
--- On Thu, 9/4/08, Boediman Moeslim <[EMAIL PROTECTED]> wrote:
Assalamu'alaikum Wr Wb.
Sabalunnyo Tan Lembang maucapkan salamaik bapuaso, sakaligus mando'akan samoga
puaso jo ibadah-ibadah awak lainnyo di ramadhan ko ditarimo oleh Allah swt.
Amin.
Maaf ka mamak jo bundo kanduang nan ado di palanta ko,
Iko ado kasus dari urang awak juo, disabuik indak masalah inyo ka manjadi
masalah bilo dipadiakan, dan bilo disabuik bamasalah....iyo alun lai. Yo, agak
tabedo, mak.
Kami nan di tampekkan sabagai "fasilitator" pun indak bisa manjaweknyo, sabab
alun pernah malakukannyo lai.
Baiko curitonyo,
Dunsanak awak si Fulan mampunyai tanah di kampuang. Yo, dek di kampuang, tantu
tanah tu adolah tanah ulayat, tanah adat. Nan kawantu tau hak pakainyo hanyo
tanah sapetak untuak rumah jo halaman sajo, sadangkan tanah ulayat kaumnyo
indak sajangkapun nan pernah atau sadang dipakainyo. Tanah-tanah nan lain
dipakai dek dunsanak lainnyo. Sajak bataun-taun kawantu tingga di rantau mulai
dari datuak (kakek) hinggo baminantu jo urang nan lain daerah (indak basuku
minangkabau). Kini, dakek pansiun inyo ka pulang ka kampuang untuak manyambuang
iduiknyo. Paling indak, kawantu sasampainyo di kampuang inyotu kamancubo
manggarap lahan nan mungkin bisa dipakainyo. Dek indak tau ka sia batanyo,
kawantu batanyo bakeh diri Tan Lembang. Tapi, Tan Lembang pun indak tau baa
manjaweknyo. Baiko pertanyaannyo: 1) Bisa ndak tanah ulayat nan kini sadang
dipakai dek dunsanaknyo dipakainyo untuak malanjuikkan iduiknyo di kampuang?,
2) Kamudian, bara bateh laweh tanah garapan
nan dipabuliahan untuak digarap dek urang saurang atau sakaluarga? , 3)
Kamudian, bara lamo saurang anggota kaum bisa manggarap lahan kaumnyo untuak
dipagunoan sabagai lahan usaho? , 4) Baa caro mahetong wakatu untuak suatu
tanah garapantu, apo samusim, sataun, atau bara lamo skala waktunyo?
Sabagai catatan, inyo tu indak pernah sakalipun manggarap tanah ulayat. Oh yo,
ado ndak aturan nan tatuang di karateh tantang hal-hal tasabuik. Baitu pulo,
tadi lah basabuik bahaso dunsanak kito tu ingin manggarap lahan sapasukuannyo
untuak kaluarganyo nan lain suku, nota bene untuak istri jo anak-anaknyo (bukan
lahan urang rumahnyo doh). Itulah nan manjadi masalah dari kawan awaktu. Inyo
alun mancaliak kasampatanko di lahan kaum anak-istrinyo doh, dalam artian alun
barani mangaluakan pandapek kapado mamak atau dunsanak-dunsanak dari bininyo.
Hanyo masih mancaliak paluang nan ado di lahan mandehnyo. Tan Lembang bapikia
juo, baa pulo bilo masalahko tajadi di lahan anak-bininyo tu? Andai dunsanak
indak kabaratan, Tan Lembang mintak bantuan ka dunsanak-dunsanak, tolong bantu
Tan Lembang untuak mamacahkan masalahko. Mudah-mudahan jo adonyo
pamacahan-masalahko, kawan awaktu agak ringan babannyo, maklum wakatu pansiun
lah mandakek.
Akhianyo, Tan Lembang ucapkan tarimo kasih atas solusi nan diagiahan.
Wassalam,
Tan Lembang (L, 52)
Bandung
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
