Assalamualaikum w.w. pak Abraham dan Angku Azmi Dt Bagindo, Sakironyo alun tamasuak dalam bahan 'Pitaruah Ayah' nan alah ditulih dek Angku Yus Dt Parapatiah Guguak, ambo ado usul untuak ditambahkan, yaitu: 1. Pitaruah untuak Mambuek Perencanaan Hiduik Jangko Panjang. Keterangannyo: banyak ambo caliak urang awak -- tamasuak babarapo adiak kanduang ambo nan sangsaro di maso tuonyo -- nan 'tajun bebas' sajo dalam iduik ko. Padohal Islam maajakan bahaso takdir memang di tangan Allah swt, tapi nasib di tangan manusia. Iduik manusia ko kan pado dasarnyo tadiri dari babak-babak nan jaleh: balita (sampai limo tahun) - kanak-kanak (sampai 12 tahun) -- pemuda (sampai 18 tahun) - dewasa (sampai 40 tahun) - baya (sampai 50 tahun) dan tuo ( di ateh 50 tahun). Untuak tiok babak tu ado ilmu dan kieknyo, nan bisa direncanakan malalui pendidikan dan latihan. Doronglah urang awak ko untuak merencanakan iduiknyo tu, jan dipraktekkan juo pepatah dima tumbuah dima disiangi. 2. Pitaruah untuak Manjago Martabat jo Harago Diri. Katarangannyo: mancari pitih tu paralu, kadang-kadang awak tapaso jadi anak buah urang. Tapi nan harus dijago adolah walau awak jadi anak buah urang, jan sampai kapalo kito diinjaknyo. Martabat jo harago diri paralu dijago bana-bana.Kalau martabat indak ado, harago diri diinjak-injak, untuak a kito ihuik lai ? 3. Pitaruah untuakJan Bautang, dan Jan Bapiutang. Alasannyo : Islam samo sakali indak suko urang bahutang. Jenazah indak buliah dimakamkan kalau masih ado hutangnyo. Dalam pancaliakan ambo, hutang piutang antaro sasamo urang badunsanak jarang bana nan dibayia, sahinggo indak jarang sampai putuih arang antaro sasamo urang badunsanak. Baitu juo jan mampiutangkan, bukan sajo karano pengalaman manunjuakkan sulik bana managiah hutang, tapi juo karano labiah rancak disumbangkan sajo dari diputangkan.Labiah ado kapastian. Kabiasoan ambo -- kalau ado rasaki -- adolah maagiah sajo sabanyak 10% dari jumlah nan diminta dunsanak untuak bahutang [kalau dimintak bahutang sajuta, ambo agiah sajo saratuih ribu]. Pitaruah untuak jan bahutang ko timbua dari pengamatan ambo surang, sadangkan pitaruah untuak jan bapiutang tu ambo dapek dari salah surang konco ambo. 4. Pitaruah untuak Jan Baduto joMangicuah. Baduto jo mangicuah manyababkan hilangnyo suasana saliang picayo mampicayoi, dan marusah rencana nan alah disepakati. 5. Pitaruah untuak Jan Korupsi dan Manyogok. Ambo mandapek ajaran jan korupsi ko dari sikap dan perilaku Ayah kanduang ambo, H. BaharoedinThaib Soetan Saidi, kondektur kereta api di Padang Panjang, nan sabana pantang maambiak pitih kuricih. Sasudah tu, kito tahu baa rusaknyo negara kito ko dek korupsi dan sogokan.. 6. Pitaruah untuak Manjago Kesehatan. Tuhan malalui urang gaek kito maagiah kito badan nan sehat dan utak nan hebat [duo miliar sel !] , tapi mungkin karano indak tahu, kito surang juo nan marusak badan jo utak kito tu. Ambo alah tigo kali kanai serangan jantuang [1983, 1991, 1999], karano salamo ko ambo suko bana makan tambunsu, sumsum, utak, udang, cumi, nan sadonyo panuah jo kolesterol nan manyampikkan saluran darah ka jantuang ambo. Kini di jantuang ambo tu alah ditanam duo buah stent nan haragonyo tahun 2003 dahulu adolah Rp 108. 000. 000 (saratuih salapan juta, nan untuang dibayia dek Semen Padang, karano wakatu tu ambi masih jadi komisaris utama.Dan tiok hari ambo harus minum ubek paten nan haragonyo masyaallah mahanyo. Tiok tigo bulan ambo harus mamaresokan jantuang ka Surabaya, ka dotor nan maoperasi ambo tahun 2003, karano dotor di RS Harapan Kita akah angkek tangan. Bayangkan kok harus mambayia surang, dari ma pitih ka dicari ? Sampai disiko dulu. Pikiran indak sakali tibo. Talabiah dahulu ambo ucapkan tarimo kasih. Ambo masih tetap mamasan saratuih buku saku tu, duo bahaso, Minang jo Indonesia.
Wassalam, Saafroedin Bahar (L, masuk 72 th, Jakarta) Alternate e-mail address: [EMAIL PROTECTED]; [EMAIL PROTECTED] --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
