Ambo baru pulang dari Gym gerak badan salamo 2 jam. Hari ujan-ujan lindok.
Sampai di rumah sumbayang luhua, elok-elok, khusyuaklah caro suraunyo. Sudah
ambo mandoa takana, tabayang wajau Inyiak Pi'i, baitu kami imbuaukan baliau
dalam panggilan jarak dekat...
Akhir Agustus 1958 Sadudah ambo barangkek dari Talu (Pasaman) manuju Natal via
Aia Bangih dengan penuh penglaman badai di Lauik (5 hari dalam pajalanan
ditimpo badai Barat) namun tujuan ke Natal sampai dan tugas lah dijalankan.
Dalam perjalanan baliak pulang, ambo (baduo jo kawan) taruih naiak ka Puncak
Gunuang Sorik Marapi menemui petugas-petugas penting di sinan untuak minta
laporan nan ka dikirimkan baliak ka Pak Iman nan manugaskan kami di Talu. Tapi,
sampai di Talu, Pak Imam indak di sinan lai. Baliau lah pai ka daerah Agam,
tadanganyo ka daerah Maninnjau. Dari Talu kami kaja ka Maninjau (jo Jeep) tapi,
tibo di Tantaman, Palembayang, dapek kaba tentera Sukarno lah masuak di Matua
manuju Maninjau. Kami tarimo berita dari Pak Camat Pelembayang bahaso inyo
dapek talipon dari Matua, tantara Sukarno ka datang bisuak ka Palembayan.
Bisuaknyo kami cubo malinteh marancah rimbo dari Tantaman ka Maninjau. Namun
di tangah rimbo gadang basuo jo rombongan Urang Ijok dari Maninjau karano
Maninjau lah diserang. Manuruik paretongan kami Pak Iman pasti mainda dari
Maninjau, baliak ka arah Pasaman malalui Tiku. Kami cubo babaliak ka Utara
sampai malam hari di Koto Alam (malalui jalan-jalan nan dikenal lah banyak
inyiak) Kami dapek kaba dari Pak Wali Kotoalam, Pak Imam lalu sanjo tadi di
Koto Alam dari arah Batukambiang manuju Pasaman. Bisuaknyo kami manyubarang
Batang Masang di Muaro Tontang, Sampailah kami ka Malampah basuo jo Rombongan
nan dikaja dan malamnyo mambarikan laporan ka Pak Imam (M. Natsir).
Biisuaknyo ambo berkenalan pribadijo Inyiak Pi'i (Engku M. Syafei Kayu Tanam)
wakatu ambo pai sumbayang luhua ka suatu surau ketek di Tapi Rimbo. Sudah kami
sumbayang, kami baduo sajo, kami sempat maota dan ambo banyak baraja dari
baliau karano takuaruang hujan labek. Suasana hujan galok-galok di Rantau Jauah
ko lah nan barangkali mangikngekkan ambo ka baliau sabanta ko dari Gym. Wakatu
tu (50 tqahun nan lalu) takana salah satu komentar baliau manganai sumbayang.
Baliau mangecekkan ka ambo, susah dek baliau sumbayang bajamaah, labiah sanang
baliau sumbayang surang-surang. "Awah alun sudah mambaco fatihah lai, Urang lah
rukuak kecek baliau." Sakitulah sakadar sabingkah kenangan jo Enkgu M. Sjefei
Kayutanam nantakana dari jarah jauah baikdari segi tampek, waktu, dan
lingkungan. Ambo doakan mudah-mudahan arwah baliau selalu dilinduangi Ilahi
Rabi di Alam Baqa.
Salam,
--MakNgah
www.usindo.net/hambo
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
