MANGOPI
By : Jepe
Masih ingek dek ambo email dari si Tur katiko inyo bacarito kehabisan gas jam
10 malam samantaro inyo indak bisa meha (menahan hasrat) untuak minum kopi
tapaso inyo kalua mancari kadai kopi, dari siko ambo dapek pelajaran mah baa
marasokan nikmatnyo kopi sejati atau si Tur memang penikmat kopi sejati.Baa
bantuak itu, ambo raso si Tur tantu punyo dispenser air mineral nan ado kran
air dingin, aia suhu kamar dan aia angek, kalau inyo ingin mambuek kopi tantu
tingga pencet sajo aia angek di dispenser tu,
Nampaknyo indak dilakukannyo bantuak itu, karano inyo pernah mangecek ka ambo
bahwa kopi harus disaduah atau ditembak jo aia nan mandidiah, aia nan harus
angek bana (suhu maksimal aia angek katiko lah manjadi uap air yo mandidiah
tu), keceknyo lai kok aia angek biaso Ndi kopi ko akan turun kualitas rasonyo,
si Tur maistilahkan agak asam
Mungkin iko juo si Tur kalau mangopi bisa tanpa gulo, dek inyo mandapekan raso
kopi sajati nan disaduah jo aia mandidiah bin manggigia (indak manggigia dingin
do tapi manggigia tagalencek malapuah kok kanai aia ko)
Nampaknyo yo co itu nan ambo raso, salamoko ambo mangopi yo indak taparatian
bana yang pantiang angek.Samanjak si Tur manjalehkan bantuak itu yo kini lah
ambo paratian bana kok ka mangopi ko dan ambo lah mancubo mambandiangkannyo yo
babeda rasonyo dan ambo kini sadang mancubo pulo mangopi tanpa gulo,
Kawan ambo sakantua nan istrinyo dari Tanah Gayo Aceh wakatu pulang lebaran
kapatang inyo agiah ambo kopi tanah gayo nan asli kualitas ekspor. Ambo cubo
tes rasonyo nan partamo ambo buek jo aia angek dispenser sajo nan indak
mandidiah yo babeda rasonyonyo dibandiangkan jo aia nan angek mandidiah (baru
dimasak), Jiko nan dimasak jo aia angek mandidiahko taraso raso kopi sejatinyo
walau awak minum indak bagulo. Tapi kok aia angek dispenser lah turun raso
sejatinyo itu nan mambuek ambo harus mamakai gulo agak saketek.
Samanjak dapek ilmu mangopi dari si Tur ko kini ambo mangopi kok dilapau dalam
perjalanan ambo minta ka urang kadai tu jo aia mandidiah nan baru dimasak
kadang-kadang ambo mancubo indak pakai gulo, tapi dek lidah ambo lah tabiaso
raso kopi bagulo ambo agiah juo agak sasendok ketek, alun permanent bana ambo
maminum kopi tanpa gulo ko lai. Baitu juo kok dikantua kopi gayo nan ambo baok
di kemasan tupper ware satiok ambo ka mangopi yo pai bana ka dapua kantua, ambo
mintak bana ka OB/OG aia angek nan mandidiah dalam jerek nan dipanehkan jo
listrik, lah manggalagak baru ambo saduah indak namuah ambo kini jo aia
dispenser lai.
Intinyo yo “taraso mangopi” awak deknyo kalau disaduah jo aia mandidiah, tapi
ado permasalahan atau ado nan alun ambo bisa maniru “style” si Tur maminum
kopi, si Tur indak paralu manunggu lamo-lamo maminum kopi jo aia angek
mandidiah ko, ibaratnyo kok samo minum kopi ambo jo inyo samantaro inyo lah
abih satangah galeh nan ambo baru kicok ka kicok juo saketek-ketek.. Ambo raso
si Tur indak punyo bagai do ilmu kebal lidah jo aia angek mandidiah tapi inyo
lah terlatih dan dapek slahnyo maminum kopi aia angek mandidiah sahinggo lidah,
muluik dan kerongkongannyo aman-aman sajo indak malapuah,
Nampaknyo paralu ambo latiah bantuak iko dalam maminum kopi, kok lah dapek
slahnyo tantu ambo bisa lo manikmati kopi nan angeknyo mandekati aia mandidiah
sahinggo raso tulen kopiko dapek dinikmati tanpa gulo.Ambo jadi takana jo urang
Jerman nan pangopi wakatu ambo di NGO dirumahnyo iyo lengkap alat mambuek kopi
jo aia mandidiah ko indak namuah inyo maminum kopi jo aia angek dispenser
sasudah tu inyo minum bantuak si Tur tu indak lamo bagai minum sacangkia kopi
ko. Cangkia kopi ambo masih mangaluakan asok ringan (salayang) nan inyo lah
salasai.
Inyo dek parakok lo, dulu lo abih kopi sacangkia ketek kopi ko dari sabatang
rokok Marlboro nan diisoknyo atau minimal samo-samo abih, samantaro ambo lah
duo batang lo ambo isok rokok Marlboro tu nan kopi masih ado, ambo malu juo
dimukonyo maminum kopi ala “ndeso” dilapau pakan Sabtu kampuang
ambo…itu..batuang-tuang lo ka tadah cangkia. Mako inyo ado pepatah Minang ala
urang lapau bantuak iko “Angek lo tadah dari pado cangkia” yo itu tadi kopi ko
lamo bana diminum sahinggo angek kopi dalam cangkia tadi maradiasi ka tadah.
Pepatah Minang ala urang lapau ko indak balaku dek urang Jerman, bagi inyo
harus tetap angek cangkia dari pado tadah, kok dapek angek cangkia ko jaan
pindah katadah, onde bisa sajo ambo mambuekan papatah buek Urang Jerman nan
banderanyo samo warnanyo jo bandera nagari Minang Kabau, Merah, Hitam dan
Kuniang..
Kalau baitu mangopi lah ambo ciek dulu jo aia angek mandidiah bin manggigia ko
di rumah.
Pekanbaru, 14 Nopember 2008 (Jam 21, Hari sadang hujan labek)
NB : Buek Tur..tolong agiah slah/tips saketek baa minum kopi aia angek
mandidiah ko.
___________________________________________________________________________
Dapatkan nama yang Anda sukai!
Sekarang Anda dapat memiliki email di @ymail.com dan @rocketmail.com.
http://mail.promotions.yahoo.com/newdomains/id/
--~--~---------~--~----~------------~-------~--~----~
===============================================================
UNTUK DIPERHATIKAN:
- Wajib mematuhi Peraturan Palanta RantauNet, mohon dibaca & dipahami! Lihat di
http://groups.google.com/group/RantauNet/web/peraturan-rantaunet
- Tulis Nama, Umur & Lokasi anda pada setiap posting
- Dilarang mengirim email attachment! Tawarkan kepada yg berminat & kirim
melalui jalur pribadi
- Dilarang posting email besar dari >200KB. Jika melanggar akan dimoderasi atau
dibanned
- Hapus footer & bagian tdk perlu dalam melakukan reply
- Jangan menggunakan reply utk topik/subjek baru
===============================================================
Berhenti, kirim email kosong ke: [EMAIL PROTECTED]
Daftarkan email anda yg terdaftar pada Google Account di:
https://www.google.com/accounts/NewAccount?hl=id
Untuk dpt melakukan konfigurasi keanggotaan di:
http://groups.google.com/group/RantauNet/subscribe
===============================================================
-~----------~----~----~----~------~----~------~--~---
