DIAM AMEH, ASBUN BASI BAKAREK
Oleh : Jepe Ado kawan sepermainan ambo wakatu ketek, iyolah hebat lo kini inyo marantau nan modalnyo pituah rang gaek kito sajo kok pai marantau "Tulang salapan karek jo ilmu". Kawan ambo ko ibaraiknyo lah tamasuak konco palangkin bana apolah lai inyo setipikal jo ambo suko bagarah-garah atau sekedar melempar joke-joke ringan nan mambuek ambo kadang-kadang kekeh dek galak. Pokoknyo kok lah basuo ambo jo inyo bajadi kami maota, badiskusi sambia bagarah. Kawan ambo ko banyak juo kato-kato bijak, kato-kato malereang khas kampuang awak kadang-kadang kato bijaknyo ko atau baphilosopy hasil kreasinyo surang antah dima asanyo inyo dapek istilah, nan jaleh kurang lazim awak mandanga kato-kato bijak ko. Sabuik sajo namo kawan ambo ko si John (bukan namo sabananyo), bantuak ikonyo babijak-bijak sambia bagurau jo ambo. Diam. Antok, haniang tu Ameh ..Jepe keceknyo, kalau kato bijak ko tantu ndak asiang lai tadanga ditalingo awak mah. Lalu inyo lanjuikan carito ko ka ambo, nah Jepe kalau awak indak tahu, indak tamakan dek awak kaji urang atau alun tamakan kaji urang, raso indak katadayuang dek awak mandebat urang dalam badiskusi rancak awak diam sajo manjadi pendengar yang baik, ambiak pelajaran dan hikmah dari urang nan pandai sadang badiskusi tu. Ohhh..kok basorak juo awak, itu ndak labiah indak kurang rajin batanyo bia awak santiang. Bialah nan sapele kadang-kadang awak batanyo, kenyataannyo memang awak indak tahu mungkin bagi urang lain bisa jadi nan tanyo awak sepele ko inyo cimeehkan, tapi awak kok ingin santiang (pintar) walau sepele nan awak ingin tahu tu yo jaan malu-malu batanyo, kan lah sudah lo kecek urang banyak kok bodoh tu jaan dipaliharo, walau bodoh sepele. Lalu Si John ko malanjuikan kaji babijak-bijaknyo sambia bagarah, keceknyo, nah kalau bisa awak jaan mamakai sabun mode kini mereknyo Asbun, tahu angku apo tu Asbun, sambia bagarah ambo jawek yo merek sabun lah kan co itu angku kecek tadi ndak. He..hehe..Asal Bunyi nan labiah tapeknyo Jepe. Iyo..iyo lai tahu ambo tu, lalu Asbun ko baa John. Awak mangecek, badiskusi atau badebat asa lai babunyi sajo, alasan awak indak argumentative pokoknyo indak manyambuang apo nan dibahas urang, lain lo nan awak sampaikan, tapi dek ati kareh ingin juo tampil kamuko nan pantiang lai babunyi alias Asbun. Tadi Diam itu Ameh, mako Asbun ko ambo istilahkan Basi Bakarek. Baa kok itu istilah angku John. Angku tahukan basi bakarek, lai laku juo tapi lah murah dijua bakilo sajo lai ka tukang boto, ah ikonyo lai tahu angku tukang boto. Tahu banalah ateh namo urang nan gadang di Padang jaman awak ketek-ketek dulu tukang boto ko pernah ambo berurusan sangaik pantiang mah. Kok ado boto-boto didapua, paruik alumunium tabuak, kuali lah boco tantu awak banego sajo lai ka tukang boto ko, lumayan mah dapek pitih balanjo ka sakolah jaman SD, bisa awak bali es lilin nan raso sarikayo..yo ndak. Ha..ha iyo..iyo..tukang boto sahabat anak-anak dulu mah, bahaso kininyo mungkin pemulung. Masih tabayang juo awak sorak tukang boto ko...Botooooooo.....Botooooooo...kadang-kadang inyo ganjua lo saketek mangecek Boto ko sambia bairama "b'tooo...b'tooo" Jadi asbun tu basi bakarek lai jaleh dek angku tu, contoh lain basi bakarek adolah paku bakarek kok sempat awak injak paku tu lalu luko awak bisa jadi awak kanai tetanus.Kadang-kadang lai paguno juo Asbun basi bakarek ko sekedar maramikan sorak sajo indak masuak etongan kecek dan sarannyo tu dalam badiskusi, ibaraik basi bakarek tadi aragonyo lah murah bakilo sajo lai dibali tukang boto. Yo lah John santiang bana angku mah nan dari dulu suko babijak-bijak jo mangecek kato malereang caro kampuang awak.lalu si John lah mulai lo bagarah ka ambo baliak, bantuak iko ambo inyo karajokan. Jepe..Jepe angku masih marokok yo yo masih lah John sabatang-sabatang. La iyo lo mah kecek angku tu, indak kamungkin lo do rasonyo sakali limo batang angku isok, nah nio ndak angku baranti total marokok ko, ambo ado resepnyo. Buliah juo tu dicubo kok yo paten resep baa caro baranti total maisok rokok Caronyo baka ujuang pangka rokok tu, indak bisakan awak maisoknyo lai, siko ambo contohkan baok mari sabatang rokok Jisamsu angku tu. Lah inyo baka ujuang pangka rokok jisamsu ko dek si John, inyo ambuih stek sahinggo api rokok jisamsu ujuang pangka ko mambaro, lalu inyo unjuakan ka ambo rokok ko dek si John Jepe..cubolah angku isok ko, bisa ndak, nah itu resep baranti marokok dari ambo Ahhh..bagarah se angku mah John, sangko ambo resep nan saban resep baa awak bisa baranti marokok...itu icak-icak sajo, karajo iseng angku sajo mah. Ohhh..kalau angku protes indak mangkuih resep baranti marokok dari ambo ko, bantuak iko selah kesimpulannyo. Si John inyo patahkan ditangah rokok jisamsu nan babaro dek api ujuang pangkanyo. Jepe ko untuak angku saparoh, saparoh lai untuak waden..lah..maisok lamak awak baduo, ambopun masih candu marokok....Hua..hua...ha...ho..Yo hebat si John kawan ambo ko Jepe, Pku 2 Desember 2008 --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi atau dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Email attachment DILARANG! Tawarkan disini & kirim melalui jalur pribadi - DILARANG posting email besar dari 200KB. - Hapus footer & seluruh bagian tidak perlu dalam melakukan reply - Untuk topik/subjek baru buat email baru, tidak dengan mereply email lama =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
<<inline: image002.jpg>>
