Waalaikum Salam Mamak M. Dafiq Saib. Sadang talamak ambo mambaco curito mamak, baa kok taanti sajo sampai di sinan? Baa kalanjutannyo, mak? Apokah Inyiak Palo Nan Tabik Buransang ko akhianyo mangkambiang hitamkan wartawan pulo, mak? Baa pulo gaya "jatuah" kapalo Inforkom kampuang ko? Apo baliau mangatokan pulo bahaso wartawan lah nan suko manggadang-gadangkan curito, Mak? sahinggo nan sajari jadi sajangka, nan sajangka jadi saeto, nan saeto jadi sadapo. Apokah kato "lampok" nan dimakasuik Angku Palo ko dalam arati kiasan pulo mak? Bukan lampok sacaro fisik? Kalau batua saroman itu kelanjutan carito Mamak, ...... iyolah pandai jatuah bana Angku Paloko. Takuik dikatokan indak becus maurus buruang merpati, wartawan nan disalahkan.
Salam Aidinil Intan Batuah 38 KL ________________________________ Dari: Muhammad Dafiq Saib <[email protected]> Kepada: [email protected] Terkirim: Senin, 22 Desember, 2008 07:29:58 Topik: [...@ntau-net] Tabik Buransang Assalaamu'alaikum wa rahmatullaahi wa barakaatuhu Tabik Buransang Lah heboh kaba di pakan. Heboh sampai ka sabalik nagari. Malayok sampai ka rantau. Manaro musajik ka dilampokno di Nyiak Palo. Baa mangko mantun? Sabab manaro ko kini dijadian urang kandang merpati. Indak, marapati manjadian manaro tu kandangno. Jadi heboh. Indak suara abang Tuanku Musajik lai nan tadanga dari manaro tu tapi bunyi karuah buruang marapati. Bunyi karuah, kukuru..kukuruu..kukuruu.. labiah kareh lo lai dari bunyi abang. Jadi manyeso. Jadi mambuek kacau. Jadi ragu urang, antah nan maa nan ka didangai. Antah suaro abang antah suaro kukuru..kukuruu marapati cako tu. Lah sasek-sasek urang di wakatu sumbayang. Mulo-mulono bana Tuanku Musajik nan komplain. Indak amuah do go marapati ko dipabiyaan baranak pinak di ateh manaro ko, jano. Heboh, sudah tu kumuah. Caliaklah, ciik marapati bakapantiangan sabalik. Tapi sainggo itu pulo sajo no. Indak talok di Tuanku Musajik manggareteh labiah jauah sabab nan punyo marapati, dauluno, sabalun pindah ka ateh manaro musajik ko adolah Muncak Rantak, kapalo kaamanan nagari. Urang nan kareh rantak, capek kaki ringan tangan. Kudian angku Imam gai alah sato lo komplain. Alah batandiang-tandianglo bacoan Imam jo bunyi kukuruu..kukuruu marapati. Tapi nan angku Imam pandai sakadar bangih ka Tuanku Musajik sin no. Labiah pado itu indak lo talok dino do. Katiko Tuanku Musajik mangecek-an, sampaianlah dek Imam ka Muncak Rantak, iyo tabedo kaji dek Imam. Tapaso awakno tanang sin pulo lai. Sudah tu angku Katik lah sato lo bangih. Basicapek sajo di baliauko kaji. Angku Katik kasudahanno pai maadok ka Nyiak Palo. Dijalehanno sagalo masalah nan tajadi jo buruang marapati. Nan kecek Nyiak Palo, alau malah buruang tu dari sinan. 'Baa lo ka maalau buruang nan alah basarang di ateh tu nyiak,' jano angku Katik. 'Baa, ka maalau ? Pungkang bagai manah jo batu ?' 'Baa inyiak go. Dipungkang jo batu, tabangno sabanta sudah tu baliak lo no kian suruik.' 'Jadi baa nan ka rancak, jano Katik ?' 'Kok inyiak tolong mangecek-an ka Muncak Rantak baa no ?' 'Oo mantun. Jadilah, bialah biko ambo kecek-an.' Mako mangeceklah Nyiak Palo ka Muncak Rantak. Antah dek sagan ka Nyiak Palo, nan Muncak Rantak indak basulik-sulik bana di no kaji do. Alaulah buruang tu dari sinan, baitu jano. Pasanko disampaian Nyiak Palo baliak ka angku Katik. 'Alah ambo kecek-an ka Muncak Rantak. Nan jano alau sin lah buruang tu dari sinan,' kecek baliau. Dek angku Katik disampaianno pulo barito tu ka Tuanku Musajik. Alau sin lah marapati tu dari ateh manaro tu. 'Alah kami cuboan maalau angku Katik, baliak jo no baliak. Amuahno diunyian bana pulo sarupo urang manggaro sawah. Sia lo urang nan ka maunyian?' Alah baabih ari lo, nan marapati ba kukuru..kukuruu juo baru di ateh manaro tu. Angku Imam nan alah abih saba, pai lo maadok ka Nyiak Palo sudah itu. Kecek Nyiak Palo, 'Kanalah ambo suruah alau. Alah ambo sampaian baitu ka angku Katik sabalun ko.' 'Bialah nak ambo cubo maalau kalau baitu nyiak,' jawek angku Imam. Tapi urusan indak juo salasai do. Iyo indak amuah dialau marapati tu do. Dek jadi tumpuan bangih juo tiok ari, kasudahanno Tuanku Musajik lo nan pai maadok ka Nyiak Palo. Etongan nan dibaono itu juo. Iyo tabik burangsang Nyiak Palo. 'Mangkolah kok indak. Nak dilampok sin lah manaro tu lai. Ka manyeso bana tampakno,' jano baliau. 'Kadilampok nyiak ?' tanyo Tuanku Musajik taparangah. 'Iyo, ka ambo lampok. Dibungkuih jo kain itam, nak abih tabang buruang tu dari sinan.' Mako pacahlah kaba. Babagai-bagai lah carito urang. Nanbahaso Nyiak Palo indak sangenek juo. Nanindak dikarajoan urang ka baliau karajoan. Heboh sampai ka pakan. Heboh sampai ka rantau. Indak karajo nan ka dikarajoan Nyiak Palo. Lah kasipaik kaba. Nan sajari jadi sajangka. Nan sajangka jadi saeto. Nan saeto jadi sadapo. Tibo di rantau tadanga kaba nan bahaso Nyiak Palo ka mambungkuih musajik. *** Bersenang-senang di Yahoo! Messenger dengan semua teman. Tambahkan mereka dari email atau jaringan sosial Anda sekarang! http://id.messenger.yahoo.com/invite/ --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
