Lambang-Lambang Partai Nagari Awak
By : Jepe
Katiko Bung Riri kawan ambo di
dunia maya mancaritokan didirinyo ado
pemikiran nan “complicated”, lalu ambo tibokan lo ka badan diri ambo, nampaknyo
ambo punyo pemikiran nan samo jo Bung Riri ado kecendrungan jalan pikiran ambo
ko “complicated”, Kok ambo bawokan ka diri ambo
mungkin iko tamasuak juo ciri-ciri urang nan jalan atau caro bapikianyo
cukuik complicated yaitu suko mancaliak, memparatikan, manyigi nan unik-unik
nan sakironyo ado stek anomaly atau penyimpangan dari kelaziman atau pakemnyo,
itu manuruik pikiran ambo yo alun tantu jo pemikiran urang lain.
Salah satunyo lambang partai di
Negara awak ko nan ka balago di Pemilu tahun muko tapeknyo di bulan April 2009.
Dari 34 partai nan kini sumarak bakibar
apokah dalam bantuak spanduk, baliho, marawa, umbua-umbua, bandera mulai sagadang buku anak SD sampai
sagadang dua kali meja pimpong bakibar
di satiok suduik jalan-jalan di kota-kota besar sampai ka pelosok desa bahkan
dusun (kampuang). Nan tagak bandera ko
bamacam-macam ado nan asa jadi saruman ayam dek akuak sajo mancacah tanah sampai nan
cogoh jo tiang nan “bapokok” bana, biasonyo partai-partai gadang nan banderanyo
tagak tali bana berkibar. Partai-partai ketek apolai pandatang baru nan alun
popular dek alun banyak bana pokok ko takumpua atau pitih pot , banderanyo
kadang-kadang jo kayu asa jadi sajo, datang angin apolai hujan badai lah
mancium tanah sajo lai bandera ko.
Adiak sepupu ambo nan bausaho di
bidang multimedia yo panen inyo kini dek banyak orderan dari partai-partai nagari
kito nan ka balago ko, diruang karajonyo lengkap lambang-lambang partai baitu
juo nan disimpan di komputernyo (soft copy), jadi sempat juo ambo amati lambang
partai ko. Mulai dari gambar banteng babagai
gaya, dari nan
bamuluik putiah, mato merah nan
mananduak mungkin sadang mangamuak bantuak banteng ketataton kecek urang jawa,
tu ado banteng nan abstrak bantuak tando tangan badannyo sampai potret badan
diri kapalo banteng sajo. Lalu gambar binatang sarupo buruang garuda , merpati sampai lambang buruang nan sakironyo
sulik diidentifikasi nan pantiang kalau buruang past basayok..
Indak lupo juo lambang tumbuh-tumbuhan
sarupo pohon beringin jo cemara ado juo dikombinasikan jo padi dan kapas,
rantai , bulan, bintang, matahari, gerigi metal pokoknyo semarak kombinasi lambang partai kota masuk juo gambar
kiblat kito yaitu bangunan Ka’bah. Ado
juo partai nan lambangnyo sederhana sajo yaitu permainan warna dalam bantuak
geometris misalnyo bulek atau persegi panjang, nan agak unik saketek balambang
payuang jo pulau-pulau di nusantara
Dari babarapo lambang partai nan
lolos verifikasi KPU untuak ikuik pemilu di bulan April 2009 tantu nan paliang
menarik dek ambo lambang partai nan kini benderanyo sadang bakibar disimpang
jalan manjalang ka rumah ambo yaitu partai nan banomor pungguang 16 yaitu PDP, merupakan sempalan partai PDIP dengan tokohnyo
Laksamana Sukardi jo kawan-kawannyo nan salamo ko bagabuang di PDIP maraso
indak pueh lalu mambuek partai ko, Cukup unik dan ekspresif serta tampil beda
lambang partai PDP ko, sepintas dari jauh bantuak tando tangan kalau kecek
kawan ambo maistilahkan bantuak banang alang-alang nan kusuik, kalau disigi
bana dakek-dakek masih bantuak garis-garis vertical sarupo tando tangan yo agak
abstrak stek ambo caliak, nan agak jaleh hanyo tanduak banteng nan runciang duo
buah jo kapalonyo lah ramuak (abstrak juo).
Lalu ambo batanyo ka adiak sepupu
ambo ko, ado dapek orderan mambuek spanduk, baliho atau kaos partai ko, apokah
rumik mambueknyo, Adiak ambo ko manjawek alun ado lai Bang, seandainyo ado
orderan bantuak iko kami tarimo juo indak bagai susah dan rumik kami mambuek
karano dek perkembangan multimedia teknologi computer jo sagalo programnyo
(soft ware) tingga mautak atik sajo, nan pantiang lah ado master dari lambang
partai nan lah ditetapkan KPU. Lalu adiak ambo malanjuikan tanyo ambo ko, kok
rumiknyo Bang mambuek embel-embel partai PDP ko dikarajokan sacaro manual
mode-mode sablonan tu, tu gambarnyo dibuek dulu (sablon), tantu banyak maleset
dari lambang nan aslinyo baik ukuran maupun tinggi randah garih-garih nan
bantuak tando tangan tu.
Baa lai bantuak itu dulu awak
berdemokrasi panuah jo warna warni
lambang partai Negara awak ko kini, nan jaleh lah tantu banyak
mahabiskan pitih nagara untuak mancetak tando gambar atau kertas suaro ko bisuak
katiko pemilu jiko dibandiangkan kito punyo partai misalnyo sapuluah sajo. Baa
kecek sebuah artikel iko akibat nafsu para elit nan menggebu-gebu memburu
kekuasaan indak namuah bagabuang sajo jo partai-partai nan sakironyo samo
ideologinyo, sahinggo partai ko makin lamo samakin banyak sajo. Indak lolos
verifikasi untuak ikuik pemilu sasuai jo ketentuan undang-undang pemilu indak
jadi masalah tingga buek partai baru jo lambang baru nan urangnyo itu ka itu
sajo..
Bagi ambo sabagai rakyat
kebanyakan indak muluk-muluk harapan ambo. Walau ambo ikuik bagabuang jo salah satu partai sebagai
wujud hak politik ambo nan indak nio golongan putiah alias indak mamiliah, bagi
ambo kok buruak sadoalahe partai ko mako nan ambo piliah ko bukan nan
terburuak, sabaliaknyo jiko elok sadoalahe partai ko mako partai nan ambo piliah
ko adolah nan paliang elok, iko labiah rancak dari pado cuek bebek sajo alias
golput.
Adopun harapan ambo bisuak nan
indak muluk-muluk tu sia sajo nan bakuaso nanti dari partai apo sajo, sia sajo
nan kaduduak manjadi anggota dewan. para
pemimpin, elit pemerintah dan parpol ko dapek hendaknyo menyelenggarakan
pendidikan dengan biaya murah dan terjangkau oleh semua masyarakat terutama
ditingkat masyarakat miskin, kesehatan yang murah, tersedianya bahan kebutuhan
hidup yang murah dan terjangkau, berdenyut sector rill dimasyarakat banyak
melalui program pemberdayaan yang berpihak kepada pertanian dan petani anak
bangsa dan semakin banyaknyo para elit ko menciptakan lapangan kerja baru nantinyo
setelah bakuaso.
Itulah harapan ambo nan paliang
utamo, kok duduak bisuak korupsi, mamangua kepeang Negara jo memeras
perusahaan, gratifikasi, uang sogok, uang semir, uang pelican, kong kali kong bia
lah diurus dek KPK dan para hokum lainnyo serta lembaga-lembaga nan kredibel
memantau ko disampiang sorak sorai “parlemen jalanan” anak-anak mahasiswa nan
idealisnyo masih barapi-rapi. Tapi kok ndak talok juo atau yo indak bisa bana
disentuh hukum elit nan cingkahak urang ko mungkin dek kuek dan gadang
pengaruhnyo kito sarahkan sajo ka nan kuaso lai, iko lah pengadilan diakhirat
nanti nan maha adil, tangguanglah doso nan dipabuek di dunia dan
pertanggungjawabkan lah dimato tuhan nan kuaso Allah Swt. Semoga sanak-sanak
nan barasa dari ranah minang ka maju manjadi caleg tatap sadar jo kato-kato “Ingek
Iduik ka Mati”
Pekanbaru, 26 Desember 2008
