KALEREANG BOCET
By : Jepe
Baragam parmainan kito wakatu
ketek-ketek dulu baiak katiko sakolah maupun katiko wakatu libur, awak bamain
lapeh basanda gurau indak banyak baban pikiran katiko tu, lah sarupo awak sajo
nan punyo dunie kok lah bamain samo gadang dulunyo. Sabuik sajo permainan
wakatu ketek ko main kajay, sipak tekong, maadu alang-alang maco, potok lele
dan kalereang nan biasonyo bamusim-musim, Artinyo kok tibo musim permainan
kajay kalereang indak dimainkan baitu
pulo sebaliknyo
Nah ingek ambo jo permainan kalereang
jo kawan-kawan sabaya dulu katiko SD, sabalun main kalereang ko baduo, batigo
bahkan labiah nan main, a kalereang ko disigi dulu sabalun di pasang, misalnyo
tiok pamain lah sapakat mamasang kalereang tigo sorong nah buah pasangan ko
saliang disigi dek satiok pemain, hanyo kalereang nan tulen alis mulus indak
bocet nan bisa dimainkan (masuak galanggang), Kok kelereangnyo bocet mako indak
buliah sato atau diganti jo buah kalereang lain nan tulen. Jaan kan ka bocet gadang
kalereang ko sempat bocet aluih sajo jadi masalah mah, kalereang nan bocet
aluih ko kami istilahkan bocet batindiak,
Lah samo tulen kalereang nan kami
pasang, masuak galanggang tanah datar
nan baagiah garih luruih lalu jo jarak tertentu ditantukan tampek mambae
kalereang ko. Partamo diundi dulu sia nan kamulai main jo malemparkan gundu ka
garis nan dibuak ditanah data tadi, sia nan dakek garih gundu nan dilempa tadi
inyo nan dulu main maambuangkan kalereang
tulen nan dikumpuakan tigo sorang.Katiko tibo giliran diambuang lai
kalereang ko lalu lawan manunjuak nan ka dibae kalereang nan baserak ko, jiko
kanai dek gundu kalereang ko orong kalua garih kaduo-kaduonyo tanpa kesalahan
(misalnyo baradu jo kalereang nan lain ) mako inyo nan manang berhak mandapek
sado alahe kalereang nan di pasang tadi,
Main diulang baliak sarupo samulo
mamasang kalereang nan tulen sasuai kesepakatan basamo nan main. Kok ado kawan
nan kalereangnyo bocet sajo jaan diarok dapek main masuak galanggang nan diadu
hanyo nan punyo kalereang tulen sajo. Nah katiko dalam permainan ado istilah
main parok, kalereang ko diampok sakuek tanago jaraknyo dakek dari pemain,
biasonyo sabanyak nan gagal tantu banyak juo nan barasil manang jo caro main
parok ko, Kok gagal manang biasonyo kalereang nan diampok sakuek tanago ko
resikonyo bocet atau malah kalereang ko balah, Permainan ko yo fair bana sia
nan mambocetkan kalereang katiko main
indak “game”: inyo harus mangganti jo kalereang nan tulen,
Lalu baa tingkah laku caleg,
anggota dewan, elit partai dan kekuasaan bamain “kalereang” digalanggang nan
alah ditantukan, nampaknyo sangail babeda jo caro-caro ambo ketek bamain
kalereang nan fair dan jujur. Urang-urang nan Cingkahak caleg, Dewan, elit
partai dan kekuasaan ko partamo sabalun main yo lai mambaok kalereang tulen
tapi salagi dapek inyo kicuah panonton (rakyaik) inyo pasang juo kalereang nan
bocet. Kalereang tulenn itu ndak labiah indak kurang adolah janji-janji muluk
manih di bibia melalui spanduk, baliho, kutiang setiker nan di pasangnyo
manjalang balago. Kok nan kalereang bocetnyo melalui intrik, sikut manyikut,
tohok menohok, mangguntiang dalam lipatan baik sa partai maupun lawan dari
partainyo nan ka bataruang.
Lah duduak tapiliah Cingkahak ko
di galanggang mamainkan “kalereang” nan diambuangnyo ka galanggang, disiko
mulai cingkahak ko bamain cekakak-cekikik, wakakak wakikik bantyak baruak dapek
camin, samakin bocet kelereangnyo ko samakin sero permainan diantaronyo. Agak
ka pacah balah kelereang ko inyo main taruih, nan panonton lah manggarumeh
mancaliak Cingkahak urang ko mamainkan kalereang bocet, tapi baa lai kalereang
tulen dulu sabalun tapiliah tingga diateh spanduk, baliho, embel-emebel,
kutiang setiker sajo..
Nan Cingkahaj ko basitungkin
taruih mamainkan kalereang bocet, walau lah orong indak paduli main taruih, nan
pantiang kumpuakan kalereang (pitih) sabanyak-banyaknyo, iyo indak beraturan
lai Cingkahak urang ko lai mamainkan kalereang, sabana bocet-bocet (baca:
Sakik) hati rakyaik banyak mancaliak kelakuan Cingkahak ko. Cingkahak ko yo
pendek bana jalan utak jo hatinyo”Alun
tantu waden lai periode ka muko dapek main kalereang”, kini den pupuah lu main
sapueh-puahnyo pokoknyo sagalo caro waden halal kan main ko, indak paduli bagai
do mah kalereang nan den bae ko la bocet-bocet, ado kesempatan hampai taruih”
Baitulah Caleg, Anggota Dewan,
Elit Partai dan Penguasa nan Cingkahak ko kini, sabananyo sabalun masuak
galanggang kalereang nan dibaoknyo ko lah BOCET mah, nan tulen tu Lips Sercice
sajo manjalang tapiliah untuak duduak bakuaso di Parlemen dan Pemerintahan
IYOLAH ASLI BANA CINGKAHAK URANG NAN MAMIMPIN NAGARI KO BOCET, NAN
ELOK-ELOK NAN MAMPARATIKAN IDUIK RAKYAT BANYAK JO NEGARA TANTU URANG-URANG NAN
TULEN.
Jepe- Pekanbaru, 28 Desember 2008
Nan
mangalami keki. tabedo, sansai jo marasai basamo kawan-kawan sakarajo
dipamainkan, diperas dek anggota Dewan nan Cingkahak Urang.Diusulkan ka
pimpinan baa kok awak kadukan ka Mr X, Mr X
penegak hukum, jawek pimpinan “ kaliankan lah cubo ndak percuma sajo
ibaraiknyo “awak maurus ayam ilang, tajua deknyo kabiang malah bisa-bisa jawi
awak ilang”
